সেই ৰামো নাই, অযোধ্যাও নাই। এই কথাষাৰৰ সাৰমৰ্ম যেন ভালদৰে বুজি উঠিছে ৰাষ্ট্ৰীয় স্বয়ংসেৱক সংঘই। অৰ্থাৎ আৰএছএছ-এ ভালদৰে বুজি উঠিছে যে এতিয়া যিদৰে মোদীৰ মেজিকে কাম নকৰা হৈছে ঠিক সেইদৰে মোদীৰ ইমেজো নিৰ্বাচনত ভোটাৰক প্ৰভান্বিত কৰিব নোৱাৰা হৈ আহিছে। যোৱা ৯ বছৰে দেশৰ প্ৰধানমন্ত্ৰীৰ গাদীত বহি থকা প্ৰধানমন্ত্ৰী নৰেন্দ্ৰ মোদী আৰু শাসকীয় দল বিজেপিক এই দৰে সতৰ্ক কৰি দিছে আৰএছএছ-এ।
বিভিন্ন সমীক্ষা সংস্থাৰ মতে, দেশৰ জনপ্ৰিয় নেতাৰ শীৰ্ষত থাকিলেও এতিয়া বিজেপিৰ জয়ৰ বাবে কেৱল নৰেন্দ্ৰ মোদীৰ মুখখনেই এতিয়া যথেষ্ট নহয়। আৰএছএছৰ ইংৰাজী মাউথপিছ ‘অৰ্গেনাইজাৰ’ৰে এই সতৰ্ক বাণী কৰিছে।
কিছুদিন পূৰ্বে ‘অৰ্গেনাইজাৰ’ত প্ৰকাশিত সম্পাদকীয় এটাই স্পষ্ট কৰি দিছে যে কেৱল মোদীৰ জনপ্ৰিয়তা বা হিন্দুত্বই বিজেপিক শক্তিশালী কৰিব নোৱাৰে। বিজেপিয়ে যদি জয়ী হ’ব বিচাৰে তেন্তে দেশত শক্তিশালী নেতৃত্ব গঢ়ি তোলাৰ প্ৰয়োজন।
‘অৰ্গেনাইজাৰ’ৰ সম্পাদকীয় স্তম্ভত কোৱা হৈছে যে কেৱল মোদীৰ ভাবমূর্তি আৰু হিন্দুত্ববাদী ৰাজনীতিৰে নির্বাচনত জয়ী হ’বলৈ যথেষ্ট নহয়৷ আঞ্চলিক পৰ্যায়ত দক্ষ নেতৃত্ব গঢ়ি তোলাৰ প্ৰয়োজন। সেই সম্পাদকীয়ত লগতে কোৱা হৈছে যে এইটোৱেই বিজেপিৰ জ্ঞানলৈ অহাৰ উপযুক্ত সময়।
অৱশ্যে, এইদৰে কোৱাৰ পাছতো মোদীৰ নেতৃত্বক লৈ কোনো প্ৰশ্নই উত্থাপন নহয় বুলি কোৱা হৈছে। আদৰ্শ আৰু নেতৃত্ব তেতিয়াহে বাস্তৱত সম্পদত পৰিণত হ’ব যেতিয়া ৰাজ্য চৰকাৰসমূহে সঠিকভাৱে কাম কৰিব পাৰিব। গতিকে বিজেপিয়ে ৰাজ্যত শক্তিশালী নেতৃত্ব গঢ়িব লাগিব। তেওঁলোকৰ কাৰ্যকৰী ভূমিকা অবিহনে মোদীৰ ভাবমূৰ্তি আৰু হিন্দু ধৰ্মই যথেষ্ট নহয়।
দৰাচলতে বিগত ৯ বছৰে প্ৰধানমন্ত্ৰী মোদীৰ জনপ্ৰিয়তাৰ ওপৰত নিৰ্ভৰ কৰি বিজেপিয়ে লোকসভা আৰু বিভিন্ন ৰাজ্যৰ নিৰ্বাচনত জয়ী হৈ আহিছে। কিন্তু বিগত কেইটামান নিৰ্বাচনত, বিশেষকৈ পশ্চিমবংগ, হিমাচল প্ৰদেশ আৰু কৰ্ণাটকত মোদীৰ ইমেজ আৰু যাদু দুয়োটাই বেয়াকৈ মুখথেকেচা খাইছে।
আৰএছএছ-এ এই তিনিটা নিৰ্বাচনত বিজেপিয়ে পৰাস্ত হোৱাৰ পাছত গেৰুৱা শিবিৰৰ বাবে আগন্তুক পথ যে পূৰ্বৰ দৰে সহজ হৈ থকা নাই সেয়া স্বীকাৰ কৰি লৈছে।
