প্ৰবীণ নেতা সুব্ৰমণিয়াণ স্বামীয়ে সমালোচনা কৰিলে বিজেপিৰ নেতৃত্বক। সোমবাৰে পুৱা এক্সত স্বামীয়ে ইংগিত দিয়ে যে প্ৰধানমন্ত্ৰী নৰেন্দ্ৰ মোদীয়ে আগভাগ ল’লে বিজেপি টাইটানিকৰ দৰে ডুব যাব।
উল্লেখ্য যে বিজেপিৰ প্ৰবীণ নেতা সুব্ৰমণিয়াণ স্বামীয়ে কেতিয়াও প্ৰধানমন্ত্ৰী নৰেন্দ্ৰ মোদীৰ প্ৰতি সদয় হোৱা নাই। ইয়াৰ পূৰ্বেও প্ৰধানমন্ত্ৰীগৰাকীক কেইবাবাৰো সমালোচনা কৰি আহিছে স্বামীয়ে।
আনকি গৃহমন্ত্ৰী অমিত শ্বাহেও স্বামীৰ সমালোচনাৰ পৰা ৰেহাই পোৱা নাই। শেহতীয়াকৈ অনুষ্ঠিত হোৱা ১৩খন আসনৰ উপ-নিৰ্বাচনৰ ফলাফলৰ কথা কওঁতে স্বামীয়ে আজিৰ এক্সত পুনৰবাৰ প্ৰধানমন্ত্ৰী মোডীক লক্ষ্য কৰি লয়।
এক্সত স্বামীয়ে কয় যে যদি আমি বিজেপিক, দলটোক টাইটানিকৰ দৰে ডুব যোৱাটো চাব বিচাৰো, তেন্তে মোডী শ্ৰেষ্ঠ নেতা।
ইয়াৰ পিছত উপ-নিৰ্বাচনৰ ফলাফলৰ কথা উল্লেখ কৰি তেওঁ কয় যে উপ-নিৰ্বাচনৰ ফলাফলত বিজেপি বিভাজনৰ অৱস্থাত উপনীত হৈছে।
মন কৰিবলগীয়া যে সম্প্রতি দেশৰ বিধানসভা উপ-নির্বাচনৰ ১৩ আসনৰ ভিতৰত বিজেপিয়ে মাত্ৰ ২খন আসনহে লাভ কৰিছে৷ কংগ্ৰেছকে ধৰি বিৰোধীয়ে ১০খন আসন লাভ কৰিছে। বিহাৰৰ এখন আসনত জয়লাভ কৰিছে এজন নিৰ্দলীয় প্ৰাৰ্থীয়ে।
লোকসভা নিৰ্বাচনত ‘অযোধ্যা’ (ফৈজাবাদ)ৰ আসনখন হেৰুৱাৰ পিছত উত্তৰাখণ্ডৰ বদ্ৰীনাথ আসনখনতো পৰাজিত হৈছে বিজেপি প্ৰাৰ্থী। সেই আসনত জয় লাভ কৰিছে কংগ্ৰেছ প্ৰাৰ্থীয়ে। লোকসভা নিৰ্বাচনত অযোধ্যাৰ আসনত জয়লাভ কৰে সমাজবাদী পাৰ্টিৰ প্ৰাৰ্থীয়ে। যিটো সদ্য সমাপ্ত লোকসভা নিৰ্বাচনত বিজেপিৰ বাবে আটাইতকৈ ডাঙৰ আঘাত।
১২ জুলাইত যেতিয়া কেন্দ্ৰই প্ৰতি বছৰে ২৫ জুনক ‘সংবিধান হত্যা দিৱস’ হিচাপে ঘোষণা কৰিছিল, তেতিয়া স্বামীয়ে নিজৰ এক্স হেণ্ডেলত কেন্দ্ৰীয় নেতা দুজনক আক্ৰমণ কৰি কৈছিল- “জৰুৰীকালীন অৱস্থাৰ বিৰোধিতা কৰাত মোডী বা অমিত শ্বাহৰ ভূমিকা কি আছিল?”
