বাংলাদেশৰ অন্তৱৰ্তীকালীন চৰকাৰৰ মুৰব্বী মহম্মদ ইউনুছে পদত্যাগ কৰিব বুলি ব্যক্তিগতভাৱে মন্তব্য দিয়া দুদিনৰ পাছতে, শনিবাৰে তেওঁৰ মন্ত্ৰীসভাৰ এজন উপদেষ্টাই প্ৰকাশ কৰে যে তেওঁ এতিয়াও নিজৰ পদত বহাল আছে। নেচনেল চিটিজেন পাৰ্টি (এনচিপি)-ৰ ছাত্ৰ নেতৃত্বৰ সৈতে হোৱা আলোচনাত তেওঁ আগতীয়াকৈ পদত্যাগৰ ইচ্ছা প্ৰকাশ কৰিছিল, কাৰণ তেওঁ অনুভৱ কৰিছিল যে বর্তমান পৰিস্থিতিত কাম কৰি যোৱাটো কঠিন হৈ পৰিছে।
পৰিকল্পনা উপদেষ্টা ৱাহিদুদ্দিন মাহমুদে সংবাদমাধ্যমৰ আগত কয়, “তেওঁ যাব বুলি কোৱা নাছিল, মাথোঁ কৈছিল যে দায়িত্ব পালনত বাধা আহি আছে, কিন্তু সেইবোৰ অতিক্ৰম কৰিবলৈ চেষ্টা কৰিছো।” তেওঁ স্পষ্টভাৱে কয়, “মহম্মদ ইউনুছ নিশ্চিতভাৱে থাকিব।”
ঢাকাৰ শ্বেৰ-ই-বাংলা নগৰত অনুষ্ঠিত ৰাষ্ট্ৰীয় অৰ্থনৈতিক পৰিষদৰ বৈঠকৰ পিছত ইউনুছে হঠাৎ এক গোপন বৈঠক আহ্বান কৰে। বৈঠকত মূলতঃ নিৰ্বাচনৰ সময়সূচী, সংস্কাৰ এজেণ্ডা আৰু যোৱা জুলাইত ঘোষিত ইস্তাহাৰৰ বিষয়ে আলোচনা কৰা হয় বুলি উল্লেখ কৰিছে।
উপদেষ্টা ছ্যেদা ৰিজৱানা হাছানে সংবাদমাধ্যমৰ আগত কয়, এই আলোচনাসমূহ তৎকালীন ছাত্ৰ বিদ্ৰোহৰ পৰা উদ্ভৱ হোৱা পৰিৱর্তনৰ চেষ্টাৰ অংশ। ইউনুছক দেশ আৰু গণআন্দোলনৰ স্বাৰ্থত দৃঢ়ভাৱে থিয় দিবলৈ আহ্বান জনাইছে এনচিপিৰ আহ্বায়ক নাহিদ ইছলামে ।
ইউনুছে খালেদা জিয়াৰ নেতৃত্বৰ বিএনপি আৰু জামাত-ই-ইছলামীৰ নেতাসকলৰ সৈতে বৈঠকত মিলিত হয়। বিএনপিৰ জ্যেষ্ঠ নেতাসকলে উল্লেখ কৰে, তেওঁলোকে আশা কৰিছিল ইউনুছে হঠাতে পদত্যাগ নকৰে, আৰু নিৰ্বাচন সম্পন্ন কৰি সন্মানে পদ ত্যাগ কৰিব। তেওঁ অৰু কয় যে অন্তৱৰ্তীকালীন চৰকাৰৰ উদ্দেশ্য মাথোঁ নিৰ্বাচন নহয়, বরঞ্চ সমাজত ন্যায় আৰু সংস্কাৰ আনি সুস্থ ৰাজনীতি প্ৰতিষ্ঠা কৰা।
উল্লেখযোগ্য যে, সেনাই ২০২৪ চনৰ ছাত্ৰ বিদ্ৰোহৰ সময়ত দমন নকৰি শ্বেইখ হাছিনাক ভাৰতলৈ নিৰাপদে প্ৰেৰণ কৰিবলৈ সহায় কৰিছিল। পিছত ইউনুছক মুখ্য উপদেষ্টা হিচাপে নিযুক্তি দিয়াটো এনচিপিৰ গঠন প্ৰচেষ্টাৰ অংশ আছিল।
শেহতীয়াকৈ ইউনুছৰ চৰকাৰে আৱামি লীগৰ বহু নেতাক, প্ৰাক্তন মন্ত্ৰীসহ, মানৱতাৰ বিৰুদ্ধে অপৰাধৰ অভিযোগত কাৰাবন্দী কৰে। এন সময়তে বিভিন্ন ৰাজনৈতিক দল, বিশেষকৈ বিএনপি, আগতীয়াকৈ নিৰ্বাচনৰ দিন ঘোষণা কৰিবলৈ চাপ দি আহিছে। ইফালে ইউনুছৰ পদত্যাগৰ সম্ভাৱনাৰ খবৰ বাহিৰ হোৱাৰ পাছতে দেশজুৰি প্ৰতিবাদ মুখৰ হৈ পৰিছে।
