ক্ৰিকেট পণ্ডিতৰ সকলো হিচাপ-নিকাচ ওলট-পালট কৰি দিলে মহম্মদ ছামীয়ে। আঘাতৰ পৰা প্ৰত্যাৱৰ্তন কৰিয়েই তেওঁৰ বলিঙৰ তীক্ষ্ণতাৰ প্ৰমাণ দাঙি ধৰিলে। তেওঁ এদিনীয়াত ২০০ উইকেটৰ মাইলৰ খুঁটিত উপনীত হোৱা দ্ৰুততম বলাৰ হিচাপে পৰিগণিত হয়।
চেম্পিয়নছ ট্ৰফীৰ প্ৰথমখন খেলত ৫টা উইকেট দখল কৰে ছামীয়ে। তেওঁ দহ অভাৰ বল কৰিছিল। তেওঁ ৫৩ ৰান দিয়ে। খেলপথাৰৰ বাহিৰত তেওঁৰ ফিটনেছ সম্পৰ্কীয় সকলো প্ৰশ্নৰ উত্ত দিলে।
ছামীয়ে দেখুৱাই দিলে যে তেওঁ য’ত শেষ কৰিছিল ঠিক তাতেই আৰম্ভ কৰিছে। ২০২৩ চনৰ বিশ্বকাপৰ ফাইনেলত ছামীয়ে বিধ্বংসী বলিং কৰিছিল। বিশ্বকাপৰ পাছত গম পোৱা যায় যে তেওঁ গোৰোহাৰ আঘাতৰ লৈয়ে খেলিছিল। অস্ত্ৰোপচাৰৰ ১৪ মাহৰ পাছত পুনৰ আন্তঃৰাষ্ট্ৰীয় ক্ৰিকেটলৈ উভতি আহে।
চেম্পিয়নছ ট্ৰফীত বুমৰাহৰ অনুপস্থিতিত ছামী হৈছে ৰোহিত শৰ্মাৰ প্ৰধান অস্ত্ৰ। চেম্পিয়নছ ট্ৰফীৰ প্ৰথমখন খেলত ২০০টা এদিনীয়া উইকেটৰ গৰাকী হৈ পৰে ছামী। মহম্মদ ছামীয়ে ১০৪খন মেচত এই অভিলেখ গঢ়িবলৈ সক্ষম হয়। কিন্তু তেওঁৰ বলৰ সংখ্যা ৫১২৬টা। মিচেল ষ্টাৰ্কে তেওঁতকৈ ২খন কম মেচ খেলি ২০০ উইকেটৰ মাইলৰ খুঁটিত উপনীত হয়। কিন্তু তেওঁ বেছি বল কৰিছে। অষ্ট্ৰেলিয়ান তাৰকাগৰাকীৰ ডেলিভাৰীৰ সংখ্যা ৫২৫০টা।
পাকিস্তানৰ স্পিনাৰ ছাকলাইন মুস্তাকেও ১০৪খন মেচত ২০০ উইকেটৰ মাইলৰ খুঁটিত উপনীত হৈছিল। তেওঁ ৫৪৫১টা বলত ২০০ উইকেটৰ মাইলৰ খুঁটিত উপনীত হৈছিল। চতুৰ্থ আৰু পঞ্চম স্থানত আছে ব্ৰেট লী আৰু ট্ৰেণ্ট ব’ল্ট।
আজি জাকিৰ আলীৰ উইকেটেৰে নতুন মাইলৰ খুঁটিত উপনীত হ’ল ছামী। ইয়াৰ পূৰ্বে আইচিচিক দিয়া এক সাক্ষাৎকাৰত ছামীয়ে কয় যে, ‘’বিশ্বকাপত মই দুৰ্দান্ত ফৰ্মত আছিলো। তাৰ পৰা অপাৰেচন টেবুললৈকে, মোৰ বাবে বৰ কঠিন আছিল।”
ছামীয়ে লগতে কয় যে ‘’প্ৰথম দুমাহ ধৰি মোৰ সন্দেহ আছিল যে আঘাতৰ পিছত মই পুনৰ খেলিব পাৰিম নে নাই। ক্ৰিকেটৰ পৰা ১৪ মাহৰ দূৰত্বই এজন ক্ৰিকেটাৰৰ পৰা সকলো কাঢ়ি নিব পাৰে।”
চেম্পিয়নছ ট্ৰফীৰ প্ৰথমখন মেচতে ছামীয়ে এক অভিলেখ গঢ়ি তুলিলে।
