আমেৰিকাৰ ষ্টেচু অফ লিবাৰ্টিতকৈ অধিক লোকে ভ্ৰমণ কৰে ভাৰতৰ ষ্টেচু অফ য়ুনিটি

আমেৰিকা যুক্তৰাষ্ট্ৰৰ ষ্টেচু অফ লিবাৰ্টিতকৈ ভাৰতৰ ষ্টেচু অফ য়ুনিটি অধিক সংখ্যক লোকে ভ্ৰমণ কৰিছে।

গুজৰাটৰ অতিৰিক্ত মুখ্য সচিৱ ৰাজীৱ গুপ্তাই দেওবাৰে এইদৰে উল্লেখ কৰে।

কোভিড মহামাৰীৰ পূৰ্বে প্ৰতিদিনে ১৩,০০০ অধিক লোকে ষ্টেচু অফ য়ুনিটি ভ্ৰমণ কৰিছিল আৰু বিগত মাহত মাত্ৰ ১০,০০০ লোকে আমেৰিকা যুক্তৰাষ্ট্ৰৰ ষ্টেচু অফ লিবাৰ্টি ভ্ৰমণ কৰিছিল।

ভাৰতৰ ষ্টেচু অফ য়ুনিটি আন্তঃৰাষ্ট্ৰীয় মানদণ্ডৰে সৈতে পৰিয়ালৰ বাবে এক উৎকৃষ্ট পৰ্যটন স্থান হিচাপেও ৰাজীৱ গুপ্তাই উল্লেখ কৰে।

ষ্টেচু অফ য়ুনিটি হৈছে বৰ্তমান সময়ত বিশ্বৰ ভিতৰত সৰ্বোচ্চ প্ৰতিমুৰ্তি। স্বাধীন ভাৰতৰ প্ৰথম গৃহ মন্ত্ৰী লৌহ মানৱ বল্লভ ভাই পেটেলৰ প্ৰতি সন্মান জনাই তেখেতৰ ১৪৩ সংখ্যক জন্মজয়ন্তীত প্ৰধান মন্ত্ৰী নৰেন্দ্ৰ মোদীয়ে ষ্টেচু অফ য়ুনিটি মুকলি কৰিছিল।

গুজৰাটৰ নৰ্মদা নদীৰ পাৰত নিৰ্মাণ কৰা ষ্টেচু অফ য়ুনিটিৰ উচ্চতা হৈছে ১৮২ মিটাৰ (৫৯৭ফুট)।

২০১৩ চনত নিৰ্মাণ কাৰ্য্য আৰম্ভ কৰা ষ্টেচু অফ য়ুনিটি ২০১৮ চনত ২,৯৮৯ কোটি টকা ব্যয় সাপেক্ষে সম্পুৰ্ণ হৈ উঠে।