আছুত থাকিবনে নাথাকে আছুৰ পিতামহ? সঁচাকৈয়ে দুলীয়াজান অধিৱেশন অনুষ্ঠিত হোৱাৰ পূৰ্বে ঘোষণা কৰাৰ মতেই আছু ত্যাগ কৰিব নে? নে পুনৰ মৰাণ আৰু দুধনৈৰ অধিৱেশনত ঘোষণা কৰাৰ পাছতো আছুত থাকি যোৱাৰ দৰে এইবাৰো থাকি যাব নেকি তেওঁ? সামাজিক মাধ্যমত বহুলভাৱে চলা এনে বহু চৰ্চাৰ অন্ত পেলালে ডঃ সমুজ্জ্বল কুমাৰ ভট্টাচাৰ্য্যই নিজেই।
নিজৰ বিবেকেৰে কথা পাছত, সদৌ অসম ছাত্ৰ সন্থা এৰিব নোখোজে আছুৰ পিতামহ ডঃ সমুজ্জ্বল কুমাৰ ভট্টাচাৰ্য্যই।
সদৌ অসম ছাত্ৰ সন্থাতে থাকিব আছুৰ মুখ্য উপদেষ্টাগৰাকী।
আজি গুৱাহাটী বিশ্ববিদ্যালয়ত অনুষ্ঠিত হোৱা নতুন কেন্দ্ৰীয় বিষয়ববীয়াৰ শপতগ্ৰহণ অনুষ্ঠানত এই কথা ঘোষণা কৰে ডঃ সমুজ্জ্বল কুমাৰ ভট্টাচাৰ্য্যই।
ছাত্ৰ সংগঠনটোৰ সতীৰ্থসকলৰ আহ্বানক সন্মান জনাইহে তেওঁ আছুতে থকাৰ সিদ্ধান্ত লোৱা বুলি ভাষণত উল্লেখ কৰে। আনকি আছুত থাকিয়ে দলীয় কাম-কাজ চলাই যোৱাৰ কথা ঘোষণা কৰে ভট্টাচাৰ্য্যই।
‘সদৌ অসম ছাত্ৰ সন্থাৰ প্ৰতিনিধিসকলৰ অনুৰোধৰ প্ৰতি সন্মান জনাই বিভিন্ন জনগোষ্ঠীয় সংগঠনৰ নেতৃত্ব আৰু বিশিষ্ট নাগৰিকৰ পৰামৰ্শৰ প্ৰতি সন্মান জনাই সদৌ অসম ছাত্ৰ সন্থাৰ উপদেষ্টা হিচাপে কাৰ্য্যনিৰ্বাহ কৰাত সন্মতি প্ৰকাশ কৰিলো।‘ এইদৰে কয় সমুজ্জ্বলে।
উল্লেখযোগ্য যে, আছুৰ দুলীয়াজানৰ সপ্তদশ অধিৱেশনৰ প্ৰাক মুহূৰ্তত আছু ত্যাগ কৰাৰ কথা ঘোষণা কৰিছিল ড০ সমুজ্জ্বল ভট্টাচাৰ্য্যই। কিন্তু পূৰ্বতে সজাই থোৱা চিত্ৰনাট্য অনুসৰিয়েই তেওঁ আছু ত্যাগ কৰিম বুলি সভাত ঘোষণা কৰাৰ পাছতে প্ৰতিনিধিসকলে আছু ত্যাগ নকৰিবলৈ ভট্টাচাৰ্য্যক আহ্বান জনোৱাৰ লগতে সমুজ্জ্বল ভট্টাচাৰ্য্য জিন্দাবাদ ধ্বনি দিয়া পৰিলক্ষিত হৈছিল।
তাৰ পাছতে সুৰ সলাইছিল আছুৰ উপদেষ্টাগৰাকীয়ে। পূৰ্বতে তেওঁ আছু ত্যাগ কৰিম বুলি কৰা ঘোষণা পুনৰ বিবেচনা কৰি ‘বিবেকক সুধি চাম’ বুলি মন্তব্য কৰিছিল।
তাৰ পাছতে আজি পুনৰ আছুতেই উপদেষ্টা হৈ কাৰ্যনিৰ্বাহ কৰি যাব বুলি ঘোষণা কৰাটোৱে প্ৰায়সংখ্যকেই আশ্চৰ্য্য কৰি তুলিছে।
উল্লেখযোগ্য যে, আছুৰ মৰাণ আৰু দুধনৈ অধিৱেশনৰ পূৰ্বেও আছু ত্যাগ কৰিম বুলি ঘোষণা কৰি উপদেষ্টা হিচাপে দুটাকৈকৈ কাৰ্যকাল আছুৰ মুখ্য উপদেষ্টা হিচাপে কাৰ্য্নিৰ্বাহ কৰিছিল ডঃ সমুজ্জ্বল কুমাৰ ভট্টাচাৰ্য্যই।