বিজেপি বিধায়ক শিলাদিত্যৰ মতে, ১ কোটিতকৈ অধিক বাংলাদেশী মুছলমানৰ নাম আজি প্ৰকাশ হোৱা এন আৰ চিত সোমাল।
আজি উন্নীতকৃত চূড়ান্ত ৰাষ্ট্ৰীয় নাগৰিকপঞ্জী প্ৰকাশৰ পিছতে এই অদ্ভুত দাবীৰেই প্ৰথম প্ৰতিক্ৰিয়া বিধায়কজনৰ। শিলাদিত্যই তেওঁৰ বিধায়ক আৱাসত এখন সংবাদমেল দি এই প্ৰতিক্ৰিয়া কৰিছে।
সততে বিতৰ্কিত মন্তব্য কৰি অহা বিধায়কজনক ৩০ আগষ্টত সংবাদমেল দিয়াৰ পৰা তেওঁৰ দলেই বাৰণ কৰিছিল।
উল্লেখ কৰিব পাৰি, ২০১১ চনৰ লোকপিয়ল মতে, অসমত মুছলমান লোকৰ সংখ্যাটো হ’ল ১,০৬,৭৯,৩৪৫গৰাকী (এক কোটি ছয় লাখ ঊনাশী হাজাৰ তিনিশ পঞ্চলিচ)।
হোজাইৰ বিধায়কজনে বাদ পৰা ১৯ লাখৰ বেছি সংখ্যকেই হিন্দু লোক বুলি কৈ বিধায়কজনে হিন্দু শৰণাৰ্থীৰ নাম এন আৰ চিৰ পৰা বাদ পৰা বুলিও ক্ষোভ ব্যক্ত কৰে।
“বহু ভাৰতীয় হিন্দু লোক ১৯৭১-ৰ পূৰ্বে অহা সত্ত্বেও তেওঁলোকৰ হাতত নথি-পত্ৰ নথকা বাবে বিদেশী হ’ব লগীয়া হ’ল”, সংবাদমেলত বিধায়কজনৰ মন্তব্য।
হিন্দুসকলৰ এই দুৰ্দশাৰ বিপৰীতে ১৯৭১ চনৰ পাছত অসমলৈ অহা মুছলমান বাংলাদেশীৰ নাম অহাৰ কাৰণ “নথি-পত্ৰৰ জালিয়াতি আৰু টকাৰ খেল” বুলি দাবী বিধায়ক দেবৰ।
“মুছলমানে হাজেলাক ফোন কৰি দম দিয়া বাবেই ভয়তে বাংলাদেশী মুছলমানৰ নাম অন্তৰ্ভুক্ত কৰি দিলে”, হাজেলাৰ ফোন কল ডিটেইল উলিয়াই তদন্ত কৰিলেই কথাটো পোহৰলৈ আহিব বুলি কৈ অদ্ভুত দাবী বিধায়কজনৰ।
তেওঁ নিজেও বাংলাদেশী মুছলমানৰ বিৰুদ্ধে মাত মাতি ফোনত দিনে ৪০০-অতকৈও অধিক বাংলাদেশী মুছলমানৰ দম সহিব লগীয়া হৈছিল বুলি জানিবলৈ দিয়ে।
“টকাৰ বাবেও হয়তো হাজেলাই বাংলাদেশী মুছলমানৰ নাম সুমুৱাইছে” বুলিও সন্দেহ প্ৰকাশ কৰে বিধায়কজনে।
এন আৰ চি অসমীয়াৰ ৰক্ষাকৱচ আৰু জাতীয় দলিল নহৈ হ’লগৈ বাংলাদেশী মুছলমানক ৰক্ষণাবেক্ষণৰ আহিলা, বিধায়কজনৰ মন্তব্য।
আছু নেতৃত্বক কটাক্ষ কৰি বিধায়কজনে কয়, “আছু নেতৃত্বই খচৰা প্ৰকাশৰ সময়ত মিঠাই খাই আনন্দ কৰিছিল। কিন্তু আজি কিয় দুখ কৰি কান্দি আছে? তেওঁলোকে স্বীকাৰ কৰিব লাগিব তেওঁলোকে যে মিঠাই খাই ভুল কৰিছিল।”
তেওঁৰ মতে, অসম আন্দোলন কাটা তাঁৰেৰে পাৰ হৈ অহা বাংলাদেশী মূলৰ মুছলমানৰ বিৰুদ্ধেহে হৈছিল, হিন্দু শৰণাৰ্থীৰ বিৰুদ্ধে হোৱা নাছিল।
