অসমত এতিয়া নিৰ্বাচনী বতৰ। হাজাৰ হাজাৰ লোকৰ সমাৱেশেৰে মনোনয়ন পত্ৰ দাখিলৰ প্ৰতিযোগিতাত অৱতীৰ্ণ হৈছে বিভিন্ন ৰাজনৈতিক দলৰ প্ৰাৰ্থী। আনহে নালাগে, ৰাজ্যখনৰ স্বাস্থ্যমন্ত্ৰীগৰাকীয়েই কৰ’নাক ভেঙুচালি কৰি হাজাৰ হাজাৰ সমৰ্থকক আনি দাখিল কৰে মনোনয়ন পত্ৰ।
ভাৱিলে আচৰিতেই লাগে, কৰ’নাৰ আৰম্ভণিৰ সময়ত অসমত বাটে পথে ওলোৱা জনসাধাৰণক আৰক্ষীয়ে লাঠীৰে কোবাই কৰ’নাৰ বিৰুদ্ধে আতংক সৃষ্টি কৰাৰ কথা।
কিন্তু কৰ’না ব্যৱস্থাপনাৰ বিশাল মহা আয়োজনৰ পাছত লাহে লাহে পৰিস্থিতি স্বাভাৱিক হৈ অহাৰ পাছতে কৰ’না নিজেই এলাগী হৈ পৰিল!
আনৰ বাবে যিয়েই নহওক, ৰাজনৈতিক নেতাসকলে কৰ’নাক এক প্ৰকাৰ নিৰস্ত কৰি নিৰ্বাচনী প্ৰত্যাশা পূৰণত জঁপিয়াই পৰিছে।
পিচে, দেশত পুনৰ এবাৰ কৰ’নাৰ ব্যাপক সংক্ৰমণৰ খৱৰে যি শংকাৰ সৃষ্টি কৰাৰ কথা তালৈ যেন কাৰোৱেই ব্ৰূক্ষেপ নাই। সামাজিক ব্যৱধানৰ বিধি এতিয়া বিসৰ্জন দিয়া হৈছে সামাজিক প্ৰতিষ্ঠাৰ নামত।
শেহতীয়া তথ্য অনুসৰি, বিগত ২৪ ঘন্টাত দেশত ৪০হাজাৰতকৈয়ো অধিক লোক কৰ’নাত আক্ৰান্ত হৈছে। সেইদৰে ১৮৮ জন লোকৰ মৃত্যু হৈছে।
শনিবাৰে কেন্দ্ৰীয় স্বাস্থ্য মন্ত্ৰ্যালয়ে সদৰী কৰা তথ্য অনুসৰি, যোৱা ২৪ ঘন্টাত ভাৰতত ৪০হাজাৰ ৯৫৩জন লোক কৰ’নাত আক্ৰান্ত হৈছে।
দেশত এতিয়ালৈকে কৰ’নাত আক্ৰান্ত হৈছে ১ কোটি ১৫লাখ ৫৫হাজাৰ ২৮৪জন লোক। ইয়াৰে সুস্থ হৈ উঠিছে ১ কোটি ১১লাখ ৭হাজাৰ ৩৩২জন লোক।
দেশত এতিয়ালৈকে কৰ’নাত আক্ৰান্ত হৈ ১লাখ ৫৯হাজাৰ ৫৫৮জন লোকে প্ৰাণ হেৰুৱাইছে।
বিশেষজ্ঞসকলে কৈছে কৰ’না সম্পৰ্কীয় স্বাস্থ্যবিধি মানি চলিলেই সংক্ৰমণ ৰোধ কৰাটো সম্ভৱ। জনসাধাৰণক এই বিষয়ত সতৰ্ক কৰি ৰখাটো অত্যন্ত গুৰুত্বপূৰ্ণ। কিন্তু চৰকাৰ বাহাদুৰেই যেতিয়া কৰ’নালৈ পিঠি দিছে, তাত সাধাৰণ মানুহক সজাগ কৰিব কোনে?
