অসম জাতীয়তাবাদী যুৱ ছাত্ৰ পৰিষদৰ কেইগৰাকীমান নেতা-কৰ্মীকে ধৰি অসম গণ পৰিষদ, বিজেপিৰ সদস্যই AJP ত আজি আনুষ্ঠানিকভাৱে যোগদান কৰে।
উজানবজাৰস্থিত কুমাৰ ভাস্কৰ বৰ্মণ নাট্যমন্দিৰত অনুষ্ঠিত হোৱা এই যোগদান কাৰ্য্যসূচীত পাঁচ শতাধিক লোকৰ যোগদানে শক্তি বৃদ্ধি কৰিলে অসম জাতীয় পৰিষদৰ ৰাজ্যিক সমন্বয়ক জগদীশ ভূঞাৰ।
গাত বল পায়েই বিজেপিক কঠোৰ ভাষাৰে সমালোচনা কৰে ভূঞাই।
‘ৰাইজৰ মাজত আমি আছোৱেই। যোৱা চাৰে চাৰিটা বছৰত পৰিৱৰ্তনৰ নামত যিটো দেখিলো সেয়া হয়তো ৰাজ্য চৰকাৰৰ মুৰব্বীজনেও ক’ব নোৱাৰিব আচলতে পৰিৱৰ্তন কি হ’ল? জনসাধাৰণৰ মনৰ মাজত অভাৱ-অভিযোগ আৰু বেদনাসমূহ আছেই।‘ এইদৰে কয় ভূঞাই।
তাৎপয্যপূৰ্ণভাৱে, বিজেপিক ইমান ডাঙৰ শক্তি বুলি ভাবি লোৱা নাই বুলি উল্লেখ কৰি ভূঞাই কয় ‘বিজেপিৰ সাংগঠনিক শিপা মাটিৰ ইমান তললৈ নাই যে উভালি পেলাবলৈ অসুবিধা হ’ব।২০১৬ চনৰ পূৰ্বলৈকে যিটো দলৰ মাত্ৰ ৫ জন বিধায়ক আছিল সেই দলৰ শিপা ইমান তললৈ আছে বুলি কেনেকৈ ভাবি লৈছে নাজানো।‘
ইপিনে, বিজেপিৰ নিজৰ কামৰ বিৱৰণ দিবলৈ একেবাৰেই নাই বুলি দাবী কৰে ভূঞাই।
তেওঁ কয় ‘যেতিয়া নিজৰ কৰিবলগীয়া একো নাথাকে তেতিয়া আনৰ বিষয়সমূহ আধাৰ হিচাপে লয়। ৰাজ্য চৰকাৰৰ ৪ বছৰীয়া
ব্যৰ্থতা অদক্ষতা ঢাকিবৰ বাবে তেওঁলোকে আৰম্ভ কৰিলে মোগল, বাবৰ, ঔৰংগজেৱ ইত্যাদি বুৰঞ্জীৰ চৰিত্ৰসমূহ আনি আনি জনসাধাৰণক বিপথগামী কৰাৰ বাবে চেষ্টা কৰিছে।‘
‘নিৰ্বাচনটো দুটা মেৰুত হ’ব। এটা মেৰুত সাম্প্ৰদায়িক শক্তি আৰু ৰাষ্ট্ৰীয় দলসমূহ আৰু আনটো মেৰুত আঞ্চলিক শক্তিসমূহ।‘ ভূঞাই এইদৰে কয়।
ইপিনে, অসম জাতীয় পৰিষদ লাচিত বৰফুকনৰ পদ্ধতিৰে আগবাঢ়িব বুলি উল্লেখ কৰে জগদীশ ভূঞাই।
তেওঁ আৰু কয় ‘অসমৰ ৰাইজ হাইকামাণ্ড হ’ব অসম জাতীয় পৰিষদৰ।নেতাকেন্দ্ৰিক নহয় সকলোৱে একেলগে আগবাঢ়ি যাব লাগিব।‘