ভাৰতীয় ৭০০ তকৈও অধিক শিক্ষাৰ্থীক তেওঁলোকৰ ভিছা নথি ভুৱা বুলি পোৱাৰ পিছত কানাডাৰ পৰা ঘূৰাই পঠোৱাৰ জাননী দিয়া হৈছে। এই শিক্ষাৰ্থীসকলে অলপতে কানাডিয়ান বৰ্ডাৰ চিকিউৰিটি এজেন্সিৰ (চিবিএছএ)পৰা দেশলৈ উভতি যোৱাৰ এখন পত্ৰ পাইছিল।
বাতৰি অনুসৰি, এই শিক্ষাৰ্থীসকলে জলন্ধৰস্থিত শিক্ষা প্ৰব্ৰজন সেৱাৰ (এডুকেশ্যন মাইগ্ৰেশ্যন চাৰ্ভিছ) জৰিয়তে শিক্ষা ভিছাৰ বাবে আবেদন কৰিছিল। ব্ৰিজেশ মিশ্ৰ এই শিক্ষা প্ৰব্ৰজন সেৱাৰ মুৰব্বী। তেওঁ প্ৰিমিয়াৰ ইনষ্টিটিউট হাম্বাৰ কলেজত নামভৰ্তি মাচুলসহ সকলো ব্যয়ৰ বাবে এই প্ৰতিজন শিক্ষাৰ্থীৰ পৰা ১৬ লাখতকৈও অধিক টকা লৈছিল। কিন্তু ইয়াত বিমানৰ টিকট আৰু ছিকিউৰিটি ডিপ’জিট অন্তৰ্ভুক্ত নাছিল।
এই শিক্ষাৰ্থীসকলে ২০১৮-১৯ বৰ্ষত অধ্যয়ন কৰিবলৈ কানাডালৈ গৈছিল। শিক্ষাৰ্থীসকলে কানাডাত স্থায়ী বসবাসৰ বাবে আবেদন কৰাৰ পিছত ‘নামভৰ্তি অফাৰ পত্ৰ’ৰ প্ৰমাণীকৰণত জালিয়াতিটো চিনাক্ত হয়। চিবিএছএ-য়ে নথিবোৰ পৰীক্ষা কৰিছিল আৰু নিশ্চিত কৰিছিল যে এই শিক্ষাৰ্থীসকলৰ ‘নামভৰ্তিৰ অফাৰ পত্ৰ’ প্ৰকৃত নাছিল।
জানিব পৰা মতে এই শিক্ষাৰ্থীসকলৰ বেছিভাগেই ইতিমধ্যে পঢ়া শুনা সম্পূৰ্ণ কৰাৰ পিছত কাম কৰিবলৈ অনুমতি পাইছে। কিছুমানে চাকৰিৰ অভিজ্ঞতাও লাভ কৰিছে। তেওঁলোকে স্থায়ী বসবাসৰ বাবে আবেদন কৰিয়েই সমস্যাৰ সন্মুখীন হৈছে।
লগতে পঢ়ক: বিজেপি সাংসদ কিৰন খেৰৰ মন্তব্য-‘যিসকলে মোক ভোট নিদিলে তেওঁলোকক জোতা মাৰিব লাগে’
বিগত ১০ বছৰ ধৰি শিক্ষাৰ্থীসকলক কানাডালৈ পঠিওৱাৰ কাম কৰি থকা জলন্ধৰস্থিত এজন পৰামৰ্শদাতাই কয় যে এনে ধৰণৰ প্ৰৱঞ্চনাৰ সৈতে একাধিক কাৰণ জড়িত আছে। মহাবিদ্যালয়ৰ ভুৱা অফাৰ পত্ৰ প্ৰাপ্ত কৰাৰ পৰা ভিছা আবেদনৰ বাবে শিক্ষাৰ্থীসকলক মাচুল পৰিশোধ কৰালৈকে ভুৱা ৰচিদো দিয়া হয়। কিয়নো মহাবিদ্যালয়ত মাচুল জমা দিয়াৰ পিছতহে ভিছা দিয়া হয়।
কাপুৰথালাৰ এজন পৰামৰ্শদাতাই কয়, “এই ক্ষেত্ৰত বেছিভাগ শিক্ষাৰ্থীক এনে মহাবিদ্যালয়ৰ প্ৰস্তাৱ পত্ৰ দিয়া হৈছিল, কানাডালৈ যোৱাৰ পিছত তেওঁলোকে শেষলৈকে তাত পঢ়িব নোৱাৰিলে। তেওঁলোকক আন এখন মহাবিদ্যালয়লৈ স্থানান্তৰিত কৰা হৈছিল বা পৰৱৰ্তী ছেমিষ্টাৰৰ বাবে অপেক্ষা কৰিবলৈ কোৱা হৈছিল। অৰ্থাৎ ভিছাৰ বাবে আবেদন কৰোঁতে তেওঁলোকে নথিপত্ৰত দেখুওৱা ছেমিষ্টাৰত অধ্যয়ন কৰিব নোৱাৰিলে।
পৰামৰ্শদাতাগৰাকীয়ে লগতে কয় যে বহু সংখ্যক ভাৰতীয় শিক্ষাৰ্থীয়ে অধ্যয়নৰ বাবে কানাডালৈ যাব বিচাৰে। এই বিষয়টোক মূলধন কৰি লৈ কিছুমান প্ৰৱঞ্চক এজেণ্টে কানাডাস্থিত এখন ব্যক্তিগত মহাবিদ্যালয়ৰ সৈতে মিত্ৰতা কৰি এনে কৰিছিল।
নাম প্ৰকাশত অনিচ্ছুক এই ৭০০ জন শিক্ষাৰ্থীৰ এজনে কয় যে তেওঁ কানাডাৰ চৰকাৰী মহাবিদ্যালয়ৰ পৰা কম্পিউটাৰ বিজ্ঞানৰ ডিপ্লোমা সম্পূৰ্ণ কৰিছে। ভিছাৰ বাবে আবেদন কৰাৰ সময়ত তেওঁক এখন ব্যক্তিগত মহাবিদ্যালয়ত নামভৰ্তিৰ প্ৰস্তাৱ দিয়া হৈছিল। কিন্তু কানাডালৈ যোৱাৰ পিছত তেওঁক এখন চৰকাৰী মহাবিদ্যালয়ত নামভৰ্তি কৰিবলৈ কোৱা হৈছিল। ইয়াৰ বাবে এজেণ্টজনে তেওঁৰ মাচুল ঘূৰাই দিছিল আৰু নতুন মহাবিদ্যালয়ত নামভৰ্তি কৰাত সহায় কৰিছিল।
ছাত্ৰজনে কয় যে পৰামৰ্শদাতাগৰাকীয়ে তেওঁক কৈছিল যে তেওঁ কানাডাত উপস্থিত হ’লে মহাবিদ্যালয় সলনি কৰিব পাৰে। এনে কেইবাটাও ঘটনা আছে য’ত শিক্ষাৰ্থীসকলে এজেণ্টজনক কিছু কমিছন দিয়াৰ পিছত কানাডাত উপস্থিত হয় আৰু তেওঁলোকৰ মহাবিদ্যালয় সলনি কৰে।
কেইবাজনো শিক্ষাৰ্থীয়ে কয় যে এজেণ্টজনে তেওঁলোকৰ মাচুল ঘূৰাই দিছিল। সেইকাৰণে তেওঁলোকে আন এখন মহাবিদ্যালয়ত ভৰ্তি হৈছিল। অৱশ্যে, তেওঁলোকে এই বিষয়ে কানাডিয়ান চৰকাৰক অৱগত কৰা নাছিল। মাচুল ঘূৰাই দিয়াৰ বাবে এজেণ্টজনৰ ওপৰত বিশেষ সন্দেহ হোৱা নাছিল।
উল্লেখ্য যে ইয়াৰ আগতে বিদেশী শিক্ষাৰ্থীৰ বাবে অধিক নামভৰ্তি মাচুল লোৱাৰ বাবে কুইবেক চৰকাৰে মন্ট্ৰিয়েলৰ কিছুমান মহাবিদ্যালয়ক ব্লেকলিষ্ট কৰিছিল। ভাৰতীয় উচ্চআয়োগে এই মহাবিদ্যালয়সমূহত ভৰ্তি হোৱা শিক্ষাৰ্থীসকলক উচ্চ শিক্ষা মন্ত্ৰালয়ৰ ওচৰত অভিযোগ কৰিবলৈ পৰামৰ্শ দিছিল। তাৰ পিছত শিক্ষাৰ্থীসকলক নেতিবাচক পৰ্যালোচনা দিয়া হৈছিল। কিন্তু এতিয়া কানাডিয়ান হাই কমিছনে তেওঁলোকৰ বিষয়টো সহানুভূতিৰে বিবেচনা কৰি আছে।
লগতে পঢ়ক:পুটিনৰ বাৰ্তা! ‘যিসকলে যুদ্ধৰ বিৰোধিতা কৰে তেওঁলোকক কঠোৰ শাস্তি দিব লাগিব’
বাতৰি অনুসৰি, এতিয়া এই ৭০০ জন শিক্ষাৰ্থীৰ বাবে একমাত্ৰ বিকল্প হৈছে জাননীখন আদালতত প্ৰত্যাহ্বান জনোৱা। কিন্তু এই প্ৰক্ৰিয়াটো চাৰি বছৰলৈকে চলিব পাৰে।
জলন্ধৰ আৰক্ষী আয়ুক্ত কুলদীপ সিং চাহালে কয় যে এই মুহূৰ্তত তেনে কোনো অভিযোগ তেওঁৰ দৃষ্টিগোচৰ হোৱা নাই।
ভুক্তভোগী শিক্ষাৰ্থীসকলে কয় যে এজেণ্টজনে কৌশলেৰে কামটো কৰিছিল কিয়নো তেওঁ কোনো আবেদনত স্বাক্ষৰ কৰা নাছিল। তেওঁ (এজেণ্টজনে) শিক্ষাৰ্থীসকলৰ দ্বাৰা স্বাক্ষৰিত সকলোবোৰ পাইছিল অৰ্থাৎ শিক্ষাৰ্থীসকলক আবেদনকাৰী কৰা হৈছিল। গতিকে এই প্ৰৱঞ্চনাত তেওঁৰ (এজেণ্টৰ) জড়িত থকাটো প্ৰমাণ কৰাটো অতি কঠিন। একে সময়তে শিক্ষাৰ্থীসকলৰ নিৰ্দোষতা প্ৰমাণ কৰাটোও কঠিন। কিন্তু বাস্তৱটো হ’ল যে সকলো শিক্ষাৰ্থীয়েই নিৰ্দোষী!
