দেশত সন্ত্ৰাসবাদী কাৰ্যকলাপ ৰোধ কৰিবলৈ কেন্দ্ৰীয় চৰকাৰে কঠোৰ বেআইনী কাৰ্যকলাপ (প্ৰতিৰোধ) আইন বা অৰ্থাৎ UAPA প্ৰৱৰ্তন কৰিছে। কিন্তু এই আইনৰ অধীনত গ্ৰেপ্তাৰ হোৱা অধিকাংশ অভিযুক্তই নিৰ্দোষী বুলি প্ৰমাণ হৈছে। বুধবাৰে সংসদত কেন্দ্ৰীয় গৃহ ৰাজ্যিক মন্ত্ৰী নিত্যানন্দ ৰায়ে দিয়া এক প্ৰশ্নোত্তৰত চাঞ্চল্যকৰ তথ্য প্ৰকাশ পাইছে।
কেন্দ্ৰীয় মন্ত্ৰীগৰাকীয়ে প্ৰকাশ কৰা অনুসৰি ২০২১ চনলৈকে এই আইনৰ অধীনত প্ৰায় ৪০০০ গোচৰৰ তদন্তই হোৱা নাই। ইফালে ২৮০০ গোচৰৰ বিচাৰৰ আৰম্ভ হোৱাই নাই। আনহাতে, ২০১৯ চনৰ পৰা ২০২১ চনৰ ভিতৰত ৪৮৯০ টা ইউএপিএ গোচৰৰ ভিতৰত মাত্ৰ ১৭৬ জন লোকক শাস্তি দিয়া হৈছে। গৃহমন্ত্ৰী অমিত শ্বাহৰ মন্ত্ৰণালয়ে দিয়া এই তথ্যই প্ৰমাণ কৰিছে UAPAৰ অধীনত চৰকাৰে বাদ বিচাৰ নোহোৱাকৈ সন্দেহৰ ভিত্তিটো বহু লোকক গ্ৰেপ্তাৰ কৰিছে।
ইফালে বুধবাৰে সংসদ কেৰেলাৰ সাংসদ টি এন প্ৰথাপন আৰু তামিলনাডুৰ সাংসদ বিষ্ণু প্ৰসাদে এম কে চৰকাৰক বিগত তিনি বছৰত ইউ এ পি এৰ অধীনত গ্ৰেপ্তাৰ হোৱা লোকৰ সংখ্যা ৰাজ্যভিত্তিক হিচাপ দিবলৈ অনুৰোধ জনায়। ইয়াৰ উপৰিও অভিযুক্ত ব্যক্তিৰ বয়স আৰু ধৰ্মৰ ওপৰত ভিত্তি কৰিও তথ্য বিচাৰিছিল সাংসদ দুগৰাকীয়ে।
ইউএপিএত থকা কয়দীসকলৰ ক্ষিপ্ৰ বিচাৰৰ ব্যৱস্থা কৰিবলৈ চৰকাৰৰ কিবা পৰিকল্পনা আছে নেকি সেয়াও জানিব বিচাৰিছিল। ইউএপিএৰ গোচৰত সাধাৰণতে তদন্তৰ পৰা বিচাৰ আৰু শাস্তি প্ৰদানলৈকে কিমান সময় লাগে আৰু এই আইনৰ অধীনত গ্ৰেপ্তাৰ হোৱা কিমানজন লোকৰ বিৰুদ্ধে অভিযোগ উত্থাপন কৰিব নোৱাৰি, সেই বিষয়েও প্ৰশ্ন উত্থাপন কৰে সাংসদসকলে।
ইয়াৰ প্ৰত্যুত্তৰত কেন্দ্ৰীয় গৃহ ৰাজ্যিক মন্ত্ৰী নিত্যানন্দ ৰায়ে আজি লোকসভাত কয় যে ধৰ্মভিত্তিক কোনো পৰিসংখ্যা পৃথকে ৰখা নহয়। তেওঁ কয় যে ইউএপিএত তদন্তসমূহ মূলতঃ ৰাজ্যসমূহৰ আৰক্ষীয়ে কৰে।
কিন্তু এই আইনত কেন্দ্ৰীয় সংস্থাটোৱে সন্ত্ৰাসবাদকে ধৰি বিভিন্ন গোচৰৰ তদন্তৰ বাবে আৰক্ষী বাহিনীৰ ক্ষমতা বৃদ্ধি কৰাৰ চেষ্টা কৰে। ইয়াৰ উপৰিও মন্ত্ৰীগৰাকীয়ে কয় যে ৰাষ্ট্ৰীয় অনুসন্ধান সংস্থা (এন আই এ)ৰ হাতত ইউ এ পি এৰ কিছুমান গোচৰ আছে।
চৰকাৰী তথ্য অনুসৰি ২০২১ চনত ইউএপিএৰ অধীনত ১৬২১ জন লোকক গ্ৰেপ্তাৰ কৰা হৈছিল। ইয়াৰে ৬২ জন লোকক দোষী সাব্যস্ত কৰা হৈছে। ২০২০ বৰ্ষত ইউএপিএৰ অধীনত ১৩২১ জন লোকক গ্ৰেপ্তাৰ কৰা হৈছিল। ইয়াৰ মাজত পাঁচজন নাবালকো আছিল। ইয়াৰে ৮০জন লোকক শাস্তি প্ৰদান কৰা হৈছে। আনহাতে, ২০১৯ চনলৈকে গ্ৰেপ্তাৰ হোৱা ১৯৪৮ জন লোকৰ ভিতৰত ৬ জন নাবালক। আৰু ইয়াৰে চাৰিজনৰ বয়স ১২ৰ পৰা ১৬ বছৰৰ ভিতৰত।
নেচনেল ক্ৰাইম ৰেকৰ্ডছ ব্যুৰ’ৰ তথ্যৰ উদ্ধৃতিৰে কেন্দ্ৰীয় চৰকাৰে কয় যে ২০২১ চনলৈকে দেশত ৩৯৯৮টা ইউএপিএৰ গোচৰৰ তদন্ত হোৱা নাই। ইয়াৰে ২০৪১টা গোচৰ তিনি বছৰতকৈ অধিক সময় ধৰি চলি আছে। মণিপুৰত সৰ্বাধিক ২১৭৮ টা UAPA গোচৰ তদন্ত কৰিবলৈ আছে।