কেন্দ্ৰীয় চৰকাৰে দেশৰ গ্ৰাহক সকলৰ অধিকাৰ সুৰক্ষিত কৰাৰ বাবে গ্ৰাহক সুৰক্ষা বিধেয়ক খন সোমবাৰৰ পৰা কাৰ্যকৰী হোৱাকৈ বলৱৎ কৰিছে। এই বিধেয়ক খনে গ্ৰাহকক সুৰক্ষিত কৰিব পাৰিব বুলি আশা কৰা হৈছে।
গ্ৰাহক সুৰক্ষা আইন ২০১৯ এ ১৯৮৬ চনৰ আইনখন বিলোপ কৰি গ্ৰাহকক অধিক শক্তিশালী কৰি তুলিব। নতুন আইনখন অনুসৰি গ্ৰাহকে কেতবোৰ বিশেষ অধিকাৰ ভোগ কৰিব।
উপভোক্তাই যিকোনো উপভোক্তা আদালতত গোচৰ তৰিব পাৰিব আৰু পূৰ্বৰ আইনখনত এনেধৰণৰ সুযোগ নাছিল।
গ্ৰাহক সুৰক্ষা আইন ২০১৯ বলবৎ হোৱাৰ ফলত এতিয়া অনলাইন ব্যৱসায়ত উপভোক্তাসকলক উপেক্ষা কৰা কোম্পানীবোৰে সমস্যাৰ সন্মুখীন হ’ব পাৰে।
এই আইনে বিভ্ৰান্তিমূলক বিজ্ঞাপন সন্দৰ্ভত হ’ব ব্যৱস্থা গ্ৰহণৰ বাট মোকোলাই দিছে।
নতুন আইনৰ অধীনত উপভোক্তা আদালতৰ লগতে এক কেন্দ্ৰীয় উপভোক্তা সংৰক্ষণ প্ৰাধিকৰণো গঠন কৰা হৈছে।
যিকোনো উপভোক্তাই সামগ্ৰী ক্ৰয় কৰাৰ পূৰ্বেও সেই সামগ্ৰীৰ মানক লৈ চিচিপিএত অভিযোগ দাখিল কৰিব পাৰিব।
এই আইনৰ অধীনত বিভ্ৰান্তিমূলক বিজ্ঞাপনত অংশ লোৱাৰ বিৰুদ্ধেও ব্যৱস্থা গ্ৰহণৰ সুবিধা আছে।
উপভোক্তা অধিকাৰ সুৰক্ষা অধিনিয়ম ২০১৯ বলৱৎ হোৱাৰ পিছত যিকোনো উপভোক্তাই আদালতত অতি সহজে গোচৰ তৰিব পৰা যাব।
পূৰ্বৰ উপভোক্তা অধিকাৰ সুৰক্ষা অধিনিয়ম ১৯৮৬ত এই সুবিধা নাছিল। ইয়াক উদাহৰণ হিচাপে আপুনি এনেকৈ বুজিব পাৰে।
আগতে গ্ৰাহকে য’ত সামগ্ৰী ক্ৰয় কৰিছিল তাতেই অভিযোগ দাখিল কৰিব লাগিছিল যদিও এতিয়াৰে পৰা দেশৰ যিকোনো স্থানতে অভিযোগ কৰিব পৰা যাব।
উপভোক্তা সুৰক্ষা আইন, ২০১৯ৰ কেইটামান বিশেষ দিশ—
কেন্দ্ৰীয় উপভোক্তা সংৰক্ষণ প্ৰাধিকৰণ স্থাপন। এই বিভ্ৰান্তিমূলক বিজ্ঞাপনদাতাক ২বছৰৰ পৰা ৫বছৰ পৰ্যন্ত জে’লৰ লগতে ৫০লাখ টকা পৰ্যন্ত জৰিমনা বিহিব পাৰিব।
উপভোক্তা বিবাদ নিবাৰণ আয়োগ জীৱনৰ কাৰণে বিপজ্জনক আৰু ত্ৰুটিপূৰ্ণ বস্তু আৰু সেৱাৰ বিক্ৰী কৰাৰ বিৰুদ্ধে অভিযোগ গ্ৰহণ কৰিব ।
গ্ৰাহকে জনস্বাৰ্থ জৰিত আৱেদন কনজিউমাৰ ফ’ৰামত দাখিল কৰিব পাৰিব। পূৰ্বৰ আইনত এই ব্যৱস্থা নাছিল।
নতুন আইনখনে অনলাইন আৰু টেলিশ্বপিং কোম্পানীক প্ৰথমবাৰলৈ সামৰি লৈছে।
সামগ্ৰীৰ ভেজালকৰণ কৰা কোম্পানীসমূহৰ বিৰুদ্ধে কঠোৰ ব্যৱস্থা গ্ৰহণ।
কনজিউমাৰ ফ’ৰামত এক কোটি টকা পৰ্যন্ত ক্ষতিপূৰণ বিচাৰি গোচৰ তৰিব পাৰিব।
ৰাজ্যিক কনজিউমাৰ ৰিড্ৰেচেল কমিচনত এক কোটিৰ পৰা দহ কোটি টকা ক্ষতিপূৰণ বিচাৰি গোচৰ তৰিব পাৰিব।
নেচনেল কনজিউমাৰ ডিচপুট ৰিড্ৰেচেল কমিচনত দহ কোটিৰ ওপৰৰ গোচৰৰ শুনানি হ’ব।
চিনেমা হ’লত খোৱা–বোৱা বস্তুৰ বেছি দাম ল’ব নোৱাৰিব আদি।
কেৰি বেগৰ কাৰণে কোনো বিপনীয়ে গ্রাহকৰ পৰা ধন লোৱা বে–আইনী বিবেচিত হ’ব।
