পোহৰলৈ আহিছে এক চাঞ্চল্যকৰ ঘটনা। গুৱাহাটীৰ সাতগাঁৱত সংঘটিত হৈছে এই ঘটনা।
খবৰ অনুসৰি যোৱা, মে মাহৰ ১৭ তাৰিখে ৮ পাষণ্ডৰ দলবদ্ধ ধৰ্ষণৰ বলি হৈছিল এগৰাকী দিব্যাংগ বৃদ্ধা মাতৃ আৰু তেখেতৰ দিব্যাংগ কন্যা।
যদিও ঘটনাটো মে মাহতে সংঘটিত হৈছিল, তথাপিও মঙলবাৰেহে এই ঘটনা চৰ্চালৈ আহিছে। অভিযোগ অনুসৰি খোদ আৰক্ষীয়ে গাপ দি ৰাখিছিল এই জঘন্য ঘটনাটো।
জানিব পৰা মতে, এই ৮ পাষণ্ডই বৃদ্ধা দিব্যাংগ মাতৃ আৰু তেখেতৰ বাকহীনা ২২ বছৰীয়া কন্যাক ধৰ্ষণ কৰিয়েই ক্ষান্ত নাথাকি তেওঁলোকৰ গুপ্তাংগত জলকীয়া গুৰিও সানি দিয়ে।
লাভ কৰা তথ্য অনুসৰি ২২ বছৰীয়া কন্যাগৰাকীয়ে বিবাহ বিচ্ছেদ হোৱাৰ পিছত গুৱাহাটীৰ সাতগাঁৱৰ তালতলাত থকা নিজৰ বাসগৃহত মাতৃৰ সৈতে বাস কৰিছিল। সেই সময়ছোৱাত ৫৫ বছৰীয়া অৰুণ প্ৰধান ওৰফে লুটে প্ৰধান নামৰ এজন ব্যক্তিয়ে মাতৃগৰাকীক প্ৰেমৰ প্ৰস্তাৱ দিছিল। কিন্তু এই সম্পৰ্ক প্ৰধানৰ পৰিয়ালে মানি লোৱা নাছিল যাৰ বাবে দুয়োটা পৰিয়ালৰ মাজত বিবাদৰ সৃষ্টি হৈছিল।
এই বিবাদ তুংগত উপনীত হোৱাৰ লগে লগে অৰুণ প্ৰধানৰ পুত্ৰ অমিত প্ৰধানৰ লগতে আন সাতজন লোকে ভুক্তভোগীৰ ঘৰত প্ৰৱেশ কৰি মাতৃ-কন্যাক দলবদ্ধ ধৰ্ষণ কৰি দুয়োৰে গুপ্তাংগত জলকীয়াৰ গুৰি লগাই দিয়ে।
ঘটনাৰ বিষয়ে জানিব পাৰি চুবুৰীয়াই সাতগাঁও থানাত এজাহাৰ দাখিল কৰে। ঘটনাস্থলীত উপস্থিত হৈ আৰক্ষীয়ে অজ্ঞান অৱস্থাত দুই ভুক্তভোগীক উদ্ধাৰ কৰি সংকটজনক অৱস্থাত গুৱাহাটী চিকিৎসা মহাবিদ্যালয়লৈ প্ৰেৰণ কৰে। জৰুৰীকালীন স্বাস্থ্যসেৱাৰ জৰিয়তে চিকিৎসালয় কৰ্তৃপক্ষই দুয়োৰে জীৱন ৰক্ষা কৰিবলৈ সক্ষম হয়।
ইয়াৰ পিছত সাতগাঁও আৰক্ষীয়ে ভাৰতীয় দণ্ডবিধিৰ ৪৫৬, ২৯৪, ৩৫৪ আৰু ৩৫৪ (বি) ধাৰাত অভিযোগৰে ৯২/২৩ নম্বৰৰ গোচৰ ৰুজু কৰি বিষয়টোৰ তদন্ত আৰম্ভ কৰে। কিন্তু আৰক্ষীয়ে প্ৰথমে তেওঁলোকৰ গোচৰত ধৰ্ষণৰ অভিযোগ পঞ্জীয়ন কৰা নাছিল।
প্ৰাথমিক তদন্তৰ পিছত আৰক্ষীয়ে অভিযুক্ত অমিত প্ৰধান, বিমল চেত্ৰী, ছয়া প্ৰধান আৰু সন্ধিয়া সোণাৰক গ্ৰেপ্তাৰ কৰে। কিন্তু পুত্ৰ আৰু আনজন অভিযুক্তক জেলৰ পৰা উলিয়াই অনাৰ লক্ষ্যৰে অৰুণ প্ৰধানে মহিলাগৰাকীক বিয়া কৰোৱাৰ লগতে কৌশলেৰে মহিলাগৰাকীৰ দ্বাৰা গোচৰৰ সকলো অভিযোগ উঠাই লয় যদিও জি এম চি এইচৰ চিকিৎসা প্ৰতিবেদনত ধৰ্ষণ নিশ্চিত হোৱাৰ পিছতহে বিষয়টো চৰ্চালৈ আহে আৰু যাৰ ফলত আৰক্ষীয়ে গোচৰটোত আই পি চিৰ ৩৭৬ ধাৰাৰ অভিযোগ সংযোজন কৰিবলৈ বাধ্য হৈ পৰে।
জানিব পৰা মতে, এই ঘটনাৰ চাৰিজন অভিযুক্তক কাৰাগাৰলৈ নিক্ষেপ কৰাৰ বিপৰীতে পলাতক অৱস্থাত আছে বাকী চাৰিজন অভিযুক্ত।
লগতে পঢ়কঃ আজি হীৰুদাৰ একাদশ মৃত্যুবাৰ্ষিকী; ‘অযুত তৰাৰ ঘুমটি ভাঙি’ উৰি আহিছে ‘সুগন্ধি পখিলা’
লগতে পঢ়কঃ ‘PUBG’ গেম খেলিয়েই প্ৰেম! চাৰিটা সন্তানক কোলাত লৈ ভাৰতত পাকিস্তানী মহিলা; আটক আৰক্ষীৰ
লগতে পঢ়কঃ যুৱকে আপত্তিজনক ফটো অনলাইনত পোষ্ট কৰাৰ পিছতে মহানগৰীত আত্মহনন ১৯ বছৰীয়া যুৱতীৰ
