মধ্যপ্ৰদেশৰ ভিন্দ জিলাৰ মলনপুৰ থানা এলেকাত এক হৃদয়বিদাৰক ঘটনাই চাঞ্চল্যৰ সৃষ্টি কৰিছে। ঘটনাক্ৰম অনুসৰি এগৰাকী মহিলাই নিজৰ মাত্ৰ ২৭ দিনীয়া পুত্ৰক ডিঙি চেপি হত্যা কৰাৰ উপৰিও স্বামীক দাৰে আক্ৰমণ কৰি গুৰুতৰভাৱে আহত কৰে।
প্ৰকাশিত তথ্য অনুসৰি মলনপুৰ থানাৰ ১৪ নম্বৰ ৱাৰ্ডত ভাড়াতীয়া হিচাপে থকা জগন্নাথ বাঘেলৰ পত্নী উষা বাঘেলে এই ভয়ংকৰ কাণ্ড সংঘটিত কৰে। আৰক্ষীৰ সূত্ৰ অনুসৰি, শুকুৰবাৰৰ নিশা এই ঘটনা সংঘটিত হয়।
আহত স্বামী জগন্নাথ বাঘেলে জনোৱা অনুসৰি, তেওঁৰ পত্নীয়ে তেওঁক আন এগৰাকী মহিলাৰ সৈতে সম্পৰ্ক থকাৰ সন্দেহ কৰিছিল, যাৰ ফলত তেওঁলোকৰ মাজত সঘনাই কাজিয়া হৈছিল।
শুকুৰবাৰে নিশা আহাৰ খোৱাৰ পিছত জগন্নাথ শুই পৰাৰ পিছত, পুৱা প্ৰায় ১:১৫ বজাত তেওঁৰ পত্নী উষাই মাত্ৰ ২৭ দিনীয়া পুত্ৰ দেৱক ডিঙি চেপি হত্যা কৰে। আৰু স্বামীয়ে নৱজাতক পুত্ৰক বচাবলৈ দৌৰি অহাৰ সময়ত উষাই দাৰে আক্ৰমণ কৰে আৰু জগন্নাথৰ যৌনাংগত গুৰুতৰভাৱে আঘাত কৰে।
জগন্নাথৰ চিঞৰ-বাখৰ শুনি চুবুৰীয়াৰ লোক ঘটনাস্থলীত উপস্থিত হৈ আৰক্ষীক খবৰ দিয়ে। আহত পিতৃয়ে কোনোমতে পুত্ৰ দেৱক চিকিৎসালয়লৈ নিবলৈ সক্ষম হয় যদিও চিকিৎসকে শিশুটিক মৃত বুলি ঘোষণা কৰে। পিতৃ জগন্নাথক চিকিৎসাৰ বাবে চিকিৎসালয়ত ভৰ্তি কৰোৱা হয় আৰু বৰ্তমান তেওঁ বিপদৰ পৰা মুক্ত বুলি জানিব পৰা গৈছে।
মলনপুৰ আৰক্ষী থানাৰ বিষয়া প্ৰদীপ ছোনীয়ে খবৰ লাভ কৰাৰ লগে লগে ঘটনাস্থলীত উপস্থিত হৈ অভিযুক্ত পত্নী উষা বাঘেলক গ্ৰেপ্তাৰ কৰে।
গ্ৰেপ্তাৰৰ পিছত মহিলাগৰাকীয়ে নিজৰ ভুল স্বীকাৰ কৰে। আৰু মলনপুৰ আৰক্ষীয়ে নিশ্চিত কৰিছে যে স্বামীৰ অন্য মহিলাৰ সৈতে সম্পৰ্ক থকাৰ সন্দেহৰ বাবেই এই ভয়ংকৰ ঘটনা সংঘটিত হয়।
আৰক্ষীয়ে ইতিমধ্যে হত্যাৰ গোচৰ ৰুজু কৰি তদন্ত আৰম্ভ কৰিছে। মৰণোত্তৰ পৰীক্ষাৰ অন্তত মৃতদেহটো পিতৃ জগন্নাথৰ হাতত গতাই দিয়া হয়।
