পুনৰ মানৱ সমাজক লজ্জানত কৰা এক ঘটনা সংঘটিত হৈছে গোৱালপাৰা জিলাত। জিলাখনৰ খাৰমুজাত এগৰাকী বিবাহিত মহিলাক প্ৰথমে ধৰ্ষণ আৰু তাৰ পাছত কেৰাচিন ঢালি জ্বলাই দিয়া ঘটনাই চাঞ্চল্যৰ সৃষ্টি কৰিছে।
জানিব পৰা মতে সোমবাৰে নিশা প্ৰায় ১ মান বজাত মহিলাগৰাকী নিজৰ দুই সন্তানৰ সৈতে ঘৰত শুই আছিল। স্বামীৰ অনুপস্থিতিক কথা জানিব পাৰি গাঁৱৰে মনোৱাৰ ওৰফে মধু নামৰ নৰপিশাচ এজনে ঘৰত প্ৰৱেশ কৰি মহিলাগৰাকীক বলপূৰ্বক ধৰ্ষণ কৰে।
ইফালে মহিলাগৰাকীয়ে সহায়ৰ বাবে চিঞৰাত পাষণ্ড মনোৱাৰে গাত কেৰাচিন ঢালি মহিলা গৰাকীক জীৱন্তে জ্বলাই দিয়ে।
ধৰ্ষিতা মহিলাগৰাকীক চিকিৎসাৰ বাবে গুৱাহাটী চিকিৎসা মহাবিদ্যালয় হস্পিতালত ভৰ্তি কৰোৱা হৈছিল যদিও মঙলবাৰে নিশা মৃত্যুবৰণ কৰে।
বুধবাৰে মহিলা গৰাকীৰ মৃতদেহ খাৰমুজা পোৱাৰ লগে লগে স্থানীয় লোকে এটা প্ৰতিবাদী সমদলৰ জৰিয়তে বলাৎকাৰী মনোৱাৰক গ্ৰেপ্তাৰ কৰি উচিত শাস্তি প্ৰদানৰ দাবী জনায়।
উত্তেজিত লোক সকলে খাৰমুজা আৰক্ষী চকী ঘেৰাও কৰাৰো চেষ্টা কৰা দেখা যায়। পৰিস্থিতি অধিক জটিল হৈ পৰাত ঘটনাস্থলত সদৰ আৰক্ষী থানাৰ আৰক্ষী বিষয়া দীপক তামুলি উপস্থিত হৈ পৰিস্থিতি নিয়ন্ত্ৰণ কৰাৰ লগতে অতি শীঘ্ৰে আৰোপীক গ্ৰেপ্তাৰ কৰা হ’ব বুলি প্ৰতিশ্ৰুতি প্ৰদান কৰে।
মঙলবাৰতে ভুক্তভোগী মহিলাগৰাকীৰ দেউতাকে ঘটনা সংক্ৰান্তত এখন এজাহাৰ দিছিল। সেই এজাহাৰৰ ভিত্তিত ভাৰতীয় দণ্ডবিধিৰ ৪৪৭/৪৪৮/৩৭৬/৫১১/৪৩৬ আৰু ৩০৭ ধাৰাৰ অধীনত গোচৰ ৰুজু কৰা হৈছে।
আনহাতে আৰক্ষীয়ে ঘটনা সংক্ৰান্তত ইকবাল হুছেইন (মুখ্য আৰোপী মনোৱাৰৰ দেউতাক )ক সোধা পোচাৰ বাবে বুধবাৰে গ্ৰেপ্তাৰ কৰা বুলি জানিবলৈ দিয়ে।