দেশৰ আগশাৰীৰ প্ৰকৃতি সুৰক্ষা সংগঠন আৰণ্যকে উত্তৰ বংগৰ এশিঙিয়া গঁড়ৰ সুৰক্ষাৰ বাবে পশ্চিম বংগৰ বন বিভাগলৈ ৮খন মটৰ চাইকেল প্ৰদান কৰিছে।
পশ্চিম বংগৰ কোচবিহাৰ বনাঞ্চলত এশিঙিয়া গঁড়ৰ পুনৰ সংস্থাপনৰ বাবে গঠিত বিশেষক্ষ সমিতিৰ প্ৰথমখন বৈঠকতেই আৰণ্যকে পশ্চিম বংগৰ বন বিভাগক এই ৮খন ১৫০ চিচি পালচাৰ মটৰ চাইকেল প্ৰদান কৰে।
মটৰ চাইকেল গ্ৰহণ কৰি প্ৰধান মুখ্য বন সংৰক্ষক গৰাকীয়ে গঁড় সংৰক্ষণৰ কামৰ বাবে মটৰ চাইকেল ৮খন সংশ্লিষ্ট বন বিষয়াৰ হাতত হস্তান্তৰ কৰে।
ইয়াৰে ৩খন জলদাপাৰা বন সংমণ্ডলক, ২খন গৰুমৰা বন সংমণ্ডলক, ২খন কোচবিহাৰ বন সংমণ্ডলক আৰু এখন জলফাইগুৰি বন সংমণ্ডলক প্ৰদান কৰা হয়।
জলদাপাৰা ৰাষ্ট্ৰীয় উদ্যানৰ হলং ফৰেষ্ট গেষ্ট হাউচত অনুষ্ঠিত এই বিশেষ অনুষ্ঠানত পশ্চিম বংগ বন বিভাগৰ উত্তৰ মণ্ডলৰ মুখ্য বন সংৰক্ষক জি পি ছেত্ৰী, বন বিষয়া উজ্বল ঘোষৰ উপৰি বি এফ অ’ সকল উপস্থিত থাকে।
আন্তঃৰাষ্ট্ৰীয় সংগঠন বৰ্ন ফ্ৰী আৰু হিমালয়ান নেচাৰ এণ্ড এডভেঞ্চাৰৰ সহযোগত এই সাহায্য প্ৰদান কৰা বুলি আৰণ্যকৰ সচিব প্ৰধান তথা এচিয়ান ৰাইনো স্পেচিয়েলিষ্ট গ্ৰুপৰ প্ৰধান ড০ বিভৱ কুমাৰ তালুকদৰে জনায়।
উত্তৰ বংগৰ বনাঞ্চলৰ গঁড় সুৰক্ষাৰ লগতে অঞ্চলটোৰ বিভিন্ন স্থানত গঁড় পুননৰ সংস্থাপনতো এই মটৰ চাইকেলে বন কৰ্মীক সহায় কৰিব বুলি মন্তব্য কৰে ৰাজ্যখনৰ প্ৰধান মুখ্য বন সংৰক্ষক এছ বিহাৰীয়ে আৰু ইয়াৰ বাবে আৰণ্যকৰো শলাগ লয়।
