নগাঁৱৰ পুৰণিগুদামৰ মাজগাঁৱত অলপতে উদ্ধাৰ হোৱা এখন চুৰি মটৰচাইকেলক লৈ শনিবাৰে নিশা অৰ্থাৎ ২৭ জুলাইত এক নতুন ৰহস্য পোহৰলৈ অহাত অঞ্চলটোত তীব্ৰ চাঞ্চল্যৰ সৃষ্টি হয়।
উল্লেখযোগ্য যে অলপতে মাজগাঁৱৰ চোনা আহমেদ নামৰ এজন লোকৰ ঘৰৰ সন্মুখত এ এছ ০১ ই বি ৩৮৮৫ নম্বৰৰ এখন চুৰি মটৰচাইকেল উদ্ধাৰ হৈছিল। চোনা আহমেদৰ পৰিয়ালৰ লোকে মটৰচাইকেলখন চিনাকি লোকৰ দাবী কৰিছিল। কিন্তু পিছত ঘটনাটো চছিয়েল মিডিয়াত প্ৰচাৰ হোৱাত শনিবাৰে মটৰচাইকেলখনৰ প্ৰকৃত গৰাকী আহি পুৰণিগুদামত উপস্থিত হয়হি।
ঘটনাৰ বিৱৰণি অনুসৰি চোনা আহমেদৰ পৰিয়ালৰ লোকে তেওঁলোকৰ চিনাকী লোকৰ বুলি দাবী কৰা মটৰচাইকেলখন প্ৰকৃততে গুৱাহাটীৰ গৌতম চৰকাৰৰ। গৌতমৰ মটৰচাইকেল ২৪ জুলাইত চুৰি হৈছিল।
ইফালে কালি অৰ্থাৎ শনিবাৰে গৌতম আহি মাজগাঁৱত উপস্থিত হোৱাৰ পিছতে আৰক্ষীও ঘটনাস্থলীত উপস্থিত হয়। আৰু ঘটনাৰ লগত জড়িত থকাৰ সন্দেহত দুজন যুৱকক সোধপোছৰ বাবে আটক কৰে। কিন্তু ইয়াৰে এজন যুৱকে আটক কৰিবলৈ লওঁতেই পলায়ন কৰে।
অৱশ্যে আজি পুৱা স্থানীয় ৰাইজে যুৱজনক কৰায়ত্ত কৰি চামগুৰি আৰক্ষীক চমজাই দিয়ে। লগতে স্থানীয় ৰাইজে ঘটনা সন্দৰ্ভত এক উচিত তদন্ত কৰাৰ বাবে আহ্বান জনায়।
আনহাতে ধৃত স্থানীয় যুৱক দুজনে দীৰ্ঘদিন ধৰি অঞ্চলটোত বিভিন্ন অসাধু কামৰ সৈতে জড়িত থাকি বহু কেইটা ঘটনা সংঘটিত কৰা বুলি স্থানীয় ৰাইজে গুৰুতৰ অভিযোগ উত্থাপন কৰিছে।
