ডিব্ৰুগড়ৰ অসম মেডিকেল কলেজ হাস্পাতাল(এএমচিএইচ)ত ১০০খন বিচনাযুক্ত আইচিইউ স্থাপনৰ বাবে যুৱৰাজ সিং ফাউণ্ডেশ্যন আৰু এএমচিএইচৰ মাজত শুকুৰবাৰে এখন বুজাবুজিৰ চুক্তি স্বাক্ষৰিত হয়।
বুজাবুজিৰ চুক্তি অনুসৰি, যুৱৰাজ সিং ফাউণ্ডেশ্যনে কোভিড-১৯ অতিমাৰীৰ সময়ত শিশুসকলৰ আপাতকালীন চিকিৎসাৰ বাবে এএমচিএইচক ১০০খন বিচনাযুক্ত আইচিইউৰ বাবে পুঁজি আগবঢ়াব।
এএমচিএইচৰ অধ্যক্ষ তথা মুখ্য অধীক্ষক ডাঃ সঞ্জীৱ কাকতিয়ে কয়,’’সাধাৰণতে যুৱৰাজ সিং ফাউণ্ডেশ্যনে শিশুৰ কৰ্কটৰোগৰ বাবে কাম কৰে যদিও কোভিড-১৯ অতিমাৰীৰ পাছত তেওঁলোকে গোটেই ভাৰতবৰ্ষতে ১০০বিচনাযুক্ত শিশুৰ আইচিইউৰ বাবে সাহায্য দিয়াৰ ব্যৱস্থা গ্ৰহণ কৰিছে।‘’
‘’তেওঁলোকে প্ৰথম পৰ্যায়ত ৫০খন বিচনাৰ বাবে পুঁজি আগবঢ়াব আৰু তাৰ পাছত বাকী ৫০খন বিচনাৰ বাবে দিব,’’-তেওঁ কয়।
‘’পেডিয়েট্ৰিক আইচিইউৰ এই ১০০খন বিচনাৰ ভিতৰত ২০খন বিচনাত সম্পূৰ্ণ ভেন্টিলেটৰৰ ব্যৱস্থা থাকিব আৰু বাকী ৮০খন অক্সিজেন যুক্ত বিচনা এএমচিএইচৰ শিশু ৱাৰ্ডত স্থাপন কৰা হ’ব,’’-ডাঃ কাকতিয়ে জানিবলৈ দিয়ে।
প্ৰসিদ্ধ ভাৰতীয় ক্ৰিকেটাৰ যুৱৰাজ সিঙে স্থাপন কৰা যুৱৰাজ সিং ফাউণ্ডেশ্যন হৈছে এটা নন-প্ৰফিট অৰ্গেনাইজেশ্যন।
এই ফাউণ্ডেশ্যনটোৱে ককৰ্ট ৰোগৰ সৈতে সম্পৰ্কিত সমস্যাৰ প্ৰতি লক্ষ্য ৰাখি ব্যাপকভাৱে স্বাস্থ্যখণ্ডত কাম কৰি আহিছে।
অঞ্চলটোত উন্নত চিকিৎসা সেৱা আগবঢ়োৱাৰ উদ্দেশ্যৰে ১৯৪৭চনত ডিব্ৰুগড়ত অসম মেডিকেল কলেজ হাস্পাতালখন স্থাপন কৰা হৈছিল।
