গোবৰৰ পৰা কেঞ্চাৰৰ ঔষধ! গৱেষণাৰ নামত ৩.৫ কোটি টকা ব্যয় কৰিলে মধ্যপ্ৰদেশৰ বিশ্ববিদ্যালয়ে

গোবৰ আৰু গোমূত্ৰৰ পৰা তৈয়াৰী পঞ্চগব্যই কৰ্কট ৰোগ নিৰাময় কৰিব পাৰেনে? এই সন্দৰ্ভত গৱেষণাৰ বাবে মধ্যপ্ৰদেশৰ নানাজী দেশমুখ পশু চিকিৎসা বিজ্ঞান বিশ্ববিদ্যালয়ক ৩.৫ কোটি টকা দিছিল ৰাজ্যখনৰ বিজেপি চৰকাৰে। সেই ধন ২০১১ চনত দিয়া হৈছিল। কিন্তু সেই গৱেষণাৰ ফলাফল কি?

শেহতীয়াকৈ এই কথা জানিবলৈ তদন্তৰ নিৰ্দেশ দিয়া হৈছে। আৰু তাতেই পোহৰলৈ আহিছে চাঞ্চল্যকৰ তথ্য। গৰুৰ গোবৰ আৰু গোমূত্ৰৰ পৰা কৰ্কট ৰোগৰ ঔষধ তৈয়াৰ কৰাৰ গৱেষণাৰ নামত চৰকাৰী ধনৰ অপচয় হৈছে।

প্ৰায় দুই কোটি টকা খৰচ হৈছে কেৱল গৰুৰ গোবৰ, গোমূত্ৰ, বাচন-বৰ্তন আদি কেঁচামাল কিনিবলৈ! আনকি জবলপুৰৰ সেই পশু বিজ্ঞান বিশ্ববিদ্যালয়ৰ গৱেষকসকলে গোৱা আৰু বাংগালুৰু ভ্ৰমণতো বহু টকা খৰচ কৰিছিল। এখন গাড়ীও কিনি লোৱা হৈছিল।

গৱেষণাৰ ফলাফল জানিবলৈ জিলা দণ্ডাধীশে তদন্তকাৰী দল গঠনৰ নিৰ্দেশ দিয়ে। তদন্তৰ প্ৰতিবেদনত কোৱা হৈছে যে গৱেষণাৰ নামত যি ধৰণে ধন খৰচ কৰা হৈছিল সেয়া আচৰিত। বজাৰৰ মূল্যতকৈ অধিক মূল্যত প্ৰতিটো বস্তু কিনা হৈছিল। প্ৰস্তাৱিত সামগ্ৰীৰ উপৰিও বিভিন্ন ব্যয়বহুল সামগ্ৰী ক্ৰয় কৰা হৈছে।

প্ৰশাসনিক সূত্ৰ অনুসৰি বিশ্ববিদ্যালয়খনে গৱেষণাৰ বাবে ৮ কোটি টকাৰ অনুদানৰ বাবে আবেদন জনাইছিল। প্ৰথম অৱস্থাত মাত্ৰ ৩.৫ কোটি টকাহে আবণ্টন দিয়া হৈছিল। ২০১২ চনৰ পৰা আৰম্ভ হোৱা এই গৱেষণা ২০১৮ চনলৈকে চলিছিল।

তদন্তত দেখা গৈছে যে গৰুৰ গোবৰ আৰু বিভিন্ন মেচিনকে ধৰি ১৫-২০ লাখ টকাত লাভ কৰিব পৰা সামগ্ৰীৰ বাবে প্ৰায় ২ কোটি টকা ব্যয় কৰা হৈছে। গৱেষকসকলে গোৱা, বেংগালুৰুকে ধৰি বিভিন্ন চহৰলৈ ২৩ৰ পৰা ২৪ বাৰ উৰা মাৰিছিল। তদুপৰি ৭.৫ লাখ টকাত এখন গাড়ী ক্ৰয় কৰা হয়। যিটো চৰকাৰক দাখিল কৰা প্ৰাৰম্ভিক তালিকাত নাছিল। গাড়ীখনৰ ইন্ধন আৰু ৰক্ষণাবেক্ষণৰ বাবেও প্ৰায় ৭.৫ লাখ টকা ব্যয় কৰা হয়।

সেইদৰে, বাজেটৰ বাহিৰত ১৫ লাখ টকাৰ টেবুল আৰু ইলেক্ট্ৰনিক সঁজুলি ক্ৰয় কৰা হয়। শ্ৰমিকসকলক ৩.৫ লাখ টকা প্ৰদান কৰা হয়। আৰু আটাইতকৈ ডাঙৰ কথাটো হ’ল এই সকলো ব্যয়ৰ পিছতো গৱেষণাত উল্লেখযোগ্য একো পোৱা নগ’ল।

তদন্তৰ দায়িত্বত থকা অতিৰিক্ত জিলা দণ্ডাধীশ ৰঘুবৰ মাৰাৱীয়ে কয় যে বিশ্ববিদ্যালয় কৰ্তৃপক্ষই কৃষকসকলক বিভিন্ন প্ৰশিক্ষণ প্ৰদান কৰা বুলি দাবী কৰিছে। কিন্তু কি প্ৰশিক্ষণৰ কোনো উল্লেখ নাই।

অৱশ্যে বিশ্ববিদ্যালয় কৰ্তৃপক্ষই সকলো অভিযোগ অস্বীকাৰ কৰিছে। পঞ্জীয়ক ড° এছ এছ টোমৰে দাবী কৰে যে, “সকলো নিয়ম অনুসৰি কৰা হৈছে। আমি এতিয়াও যুৱক-যুৱতী আৰু কৃষকসকলক প্ৰশিক্ষণ দি আছো।”