বঙাইগাঁও জিলাখনক দুৰ্ঘটনামুক্ত জিলা হিচাপে গঢ়ি তুলিবলৈ উপায়ুক্ত ডা:এম এছ লক্ষ্মী প্ৰিয়াৰ চিন্তা-চৰ্চাৰে “প্ৰকল্প মৃত্যুঞ্জয়”ৰ শুভাৰম্ভ কৰা হয়।
জিলা পৰিবহন বিষয়া কাৰ্যালয়ৰ চৌহদত আনুষ্ঠানিকভাৱে এই প্ৰকল্পৰ শুভাৰম্ভ কৰে বঙাইগাঁও বিধান সভা সমষ্টিৰ বিধায়ক ফণীভূষণ চৌধুৰী আৰু উপায়ুক্ত ডা:এম এছ লক্ষ্মী প্ৰিয়াই।
মৃত্যুঞ্জয় প্ৰকল্প শুভাৰম্ভ কৰি বিধায়ক চৌধুৰীয়ে নিজৰ বক্তব্যত দুৰ্ঘটনামুক্ত বঙাইগাঁও গঢ়িবলৈ জিলা প্ৰশাসনক ৰাইজে সহযোগিতা আগবঢ়াব লাগিব বুলি উল্লেখ কৰে।
আনহাতে জিলা উপায়ুক্তগৰাকীয়ে জিলাখনত সকলো গাড়ীচালকে চীট বেল্ট মাৰক, দুচকীয়া বাহনত আৰোহীয়ে হেলমেট পিন্ধি গাড়ী চলাওক, সুৰাপান কৰি গাড়ী চলোৱা পৰিত্যাগ কৰক, গাড়ী চলোৱাৰ সময়ত মোবাইলত কথা পতা অভ্যাস পৰিত্যাগ কৰি জিলাখনক দুৰ্ঘটনামুক্ত জিলা হিচাপে স্বীকৃত কৰিবলৈ সকলোকে সহযোগ কৰিবলৈ আহ্বান জনায়৷
জিলা পৰিবহন বিষয়া দীপজ্যোতি নেওগে উদ্দেশ্য ব্যাখ্যা কৰা অনুষ্ঠানৰ অংশ হিচাপে অগ্নি নিৰ্বাপক বাহিনীৰ বিষয়া অমিত বৰ্মনৰ পৰিচালনাৰে উক্ত বিভাগ আৰু যান-বাহন আৰক্ষীয়ে দুৰ্ঘটনাত আঘাতপ্ৰাপ্ত লোকক তাৎক্ষণিকভাৱে কষ্ট নোপোৱাকৈ কেনেদৰে প্ৰাথমিক সাহায্য আগবঢ়াব পাৰে তাৰ কিছুমান সহজ কৌশল প্ৰদৰ্শন কৰে।
অনুষ্ঠানত গাড়ী চলোৱা নিয়মসমূহ মানি চলাৰ বাবে শপত বাক্য পাঠ কৰোৱায় উপায়ুক্ত ডা:এম এছ লক্ষ্মী প্ৰিয়াই। উল্লেখ্য যে অনুষ্ঠানত নিয়ম মানি গাড়ী চলোৱা ৯ গৰাকী গাড়ীচালকক বঁটা প্ৰদান কৰা হয়।
“প্ৰকল্প মৃত্যুঞ্জয়” শুভাৰম্ভণি অনুষ্ঠানৰ আন এটা কাৰ্যসূচী আছিল বাইক সমদল।গাড়ী চলোৱাৰ নিয়মসমূহ প্লেকাৰ্ডত প্ৰদৰ্শন কৰি বাইক সমদল উলিওৱা হয় জিলা পৰিবহন বিষয়া কাৰ্যালয়ৰ পৰা আৰু এই বাইক সমদল পতাকা জোকাৰি শুভাৰম্ভ কৰে উপায়ুক্ত ডা:এম এছ লক্ষ্মী প্ৰিয়াই।
অনুষ্ঠানত জিলাৰ অতিৰিক্ত উপায়ুক্ত নৱজ্যোতি ওজা, জিলাখনৰ উপ আৰক্ষী অধীক্ষক মণিকান্ত চমুৱা , চক্ৰ বিষয়া ৰুণাভ ৰামচিয়াৰী, সহকাৰী আয়ুক্ত শিল্পীৰেখা পণ্ডিত, বঙাইগাঁও পৌৰসভাৰ কাৰ্যবাহী বিষয়া, যুটীয়া স্বাস্থ্য সেৱা সঞ্চালক,বিদ্যালয়সমূহৰ পৰিদৰ্শক আৰু জিলা প্ৰাথমিক শিক্ষা বিষয়া, লোকনিৰ্মাণ বিভাগৰ কাৰ্যবাহী অভিযন্তা, দুৰ্যোগ ব্যৱস্থাপনা বিভাগৰ জিলা প্ৰকল্প বিষয়া আৰু ক্ষেত্ৰ বিষয়াসকল, মৃত্যুঞ্জয় এম্বুলেন্স আৰু জিলা পৰিবহন বিষয়া কাৰ্যালয়ৰ কৰ্মকৰ্তাসকলৰ লগতে পথ দুৰ্ঘটনাত স্বামী হেৰুওৱা দুগৰাকী মহিলা জয়ন্তী বালা ৰায় আৰু জিনু ৰায় চৌধুৰীও এই “প্ৰকল্প মৃত্যুঞ্জয় ” ৰ শুভাৰম্ভণি অনুষ্ঠানত উপস্থিত থাকে ৷
