এমাহ পূৰ্বে গৰিমা শইকীয়া গাৰ্গে যি আশংকাত দিন কটাইছিল, শুকুৰবাৰৰ বৰষুণজাকে যেন সেই আশংকাই সঁচা প্ৰমাণ কৰিলে। গুৱাহাটী মহানগৰীৰ লগতে ইয়াৰ কাষৰীয়া অঞ্চলত হোৱা প্ৰবল বৰষুণৰ ফলত জুবিন ক্ষেত্ৰৰ পৰিৱেশ এতিয়া একেবাৰে শোচনীয় হৈ পৰিছে। সংগীতৰ যাদুকৰ জুবিন গাৰ্গৰ স্মৃতি ক্ষেত্ৰখনত থকা তম্বু আৰু টাৰ্পলিনসমূহ ফাটি যোৱাৰ লগতে সমগ্ৰ ঠাইখিনি বোকাময় হৈ পৰিছে। অনুৰাগীসকলে শ্ৰদ্ধাৰে জ্বলোৱা বন্তি আৰু মমবাতিসমূহ বৰষুণত নুমাই গ’ল আৰু চেনেহৰ গামোচাসমূহো পানীত তিতি জুৰুলি-জুপুৰি হ’ল। এই পৰিস্থিতিয়ে স্মৃতি ক্ষেত্ৰখনৰ আন্তঃগাঁথনিৰ অভাৱটো স্পষ্টকৈ দাঙি ধৰিছে। বাৰিষা অহাৰ আগতেই কিয় নিৰ্মাণ কাৰ্য সম্পূৰ্ণ কৰা নহ’ল, তাক লৈ এতিয়া তীব্ৰ প্ৰশ্ন উত্থাপন হৈছে।
দীৰ্ঘদিন ধৰি জুবিন গাৰ্গৰ পত্নী গৰিমা শইকীয়া গাৰ্গ আৰু জুবিনৰ অজস্ৰ অনুৰাগীয়ে চৰকাৰক এই নিৰ্মাণ কাৰ্য খৰতকীয়া কৰিবলৈ আহ্বান জনাই আহিছিল। শ্ৰদ্ধা জনাবলৈ অহা লোকসকলৰ সুবিধাৰ বাবে ঠাইখনৰ অৱস্থা উন্নত কৰাটো খুবেই জৰুৰী আছিল। আনকি একাংশ অনুৰাগীয়ে চৰকাৰে এই দায়িত্ব ল’ব নোৱাৰিলে নিজে ধন সংগ্ৰহ কৰি স্মৃতি ক্ষেত্ৰখন নিৰ্মাণ কৰিবলৈও সাজু বুলি জনাইছে। ফেব্ৰুৱাৰী মাহতে গৰিমাই সতৰ্ক কৰি দিছিল যে বাৰিষা আহিলে পাহাৰৰ পৰা পানী নামি আহিব আৰু সমগ্ৰ অঞ্চলটো বোকাময় হৈ পৰিব। সেই সময়ত তেওঁ কৈছিল যে বৰষুণ দিলে মানুহে ইয়াত খোজ দিব নোৱাৰা অৱস্থা হ’ব আৰু এতিয়া ঠিক তেনেকুৱাই হ’বলৈ ধৰিছে।
গৰিমা শইকীয়া গাৰ্গে প্ৰায়েই জুবিন ক্ষেত্ৰ ভ্ৰমণ কৰি পৰিষ্কাৰ-পৰিচ্ছন্নতাৰ দিশটোত চকু দিয়ে। তেওঁ অনুৰাগীসকলকো এই পবিত্ৰ স্থানখনৰ মৰ্যাদা ৰক্ষা কৰিবলৈ অনুৰোধ জনাই আহিছে। তেওঁৰ সপোন আছিল যে এই ঠাইখনক এটা সাংস্কৃতিক কেন্দ্ৰ হিচাপে গঢ়ি তোলা হ’ব, য’ত জুবিনৰ স্মৃতি হিচাপে এটা ন ফুট উচ্চতাৰ মনোলিথ আৰু এটি সংগ্ৰহালয় স্থাপন কৰা হ’ব। কিন্তু নিৰ্মাণ কাৰ্যত হোৱা বিলম্বই সকলোকে হতাশ কৰিছে। ইফালে ছচিয়েল মিডিয়াতো জুবিনৰ মৃত্যুৰ ছয় মাহৰ পাছতো ন্যায়ৰ দাবীৰে অনুৰাগীসকল সৰৱ হৈ পৰা দেখা গৈছে। বৰষুণে উদঙাই দিয়া এই দুখজনক ছবিয়ে এতিয়া সকলোৰে মনত ক্ষোভৰ সৃষ্টি কৰিছে।
