ৰাষ্ট্ৰীয় শিক্ষা গৱেষণা আৰু প্ৰশিক্ষণ পৰিষদৰ পাঠ্যপুথিত (NCERT Textbook) আন এক পৰিৱৰ্তন ঘটিছে। এইবাৰ মোগল আৰু চুলতানসকলৰ অধ্যায়টো আঁতৰাই দিয়া হৈছে। বৰঞ্চ সংযোজন কৰা হৈছে ২০২৫ চনৰ কুম্ভ মেলা। কেৱল সেয়াই নহয়, পাঠ্যপুথিত মগধ, মৌৰ্য, শুংগ, সতবাহন সাম্ৰাজ্যৰ কথাই স্থান পাইছে।
নতুন শিক্ষা নীতি অনুসৰি এনচিইআৰটিয়ে এইবাৰ সপ্তম শ্ৰেণীৰ বাবে নতুন সমাজবিজ্ঞানৰ কিতাপ প্ৰকাশ কৰিছে। আৰু তাতেই এই পৰিৱৰ্তন দেখা গৈছে। পুৰণি গ্ৰন্থখনৰ দৰে নতুন গ্ৰন্থখনত দিল্লীৰ মোগল আৰু চুলতান সাম্ৰাজ্য সন্নিবিষ্ট কৰা হোৱা নাই। সেই অধ্যায় সম্পূৰ্ণৰূপে বাতিল কৰি প্ৰাচীন ভাৰতীয় সাম্ৰাজ্যৰ নতুন অধ্যায় সংযোজন কৰা হৈছে।
সমগ্ৰ দেশৰ কেন্দ্ৰীয় ব’ৰ্ডৰ বিদ্যালয়সমূহত এনচিইআৰটিৰ পাঠ্যপুথি পাঠদান কৰা হয়। তেওঁলোকেই প্ৰথম শ্ৰেণীৰ পৰা অষ্টম শ্ৰেণীলৈকে বিভিন্ন গ্ৰন্থৰ পুনৰীক্ষণৰ কাম কৰে। তেওঁলোকৰ বিগত সময়ৰ কেইবাটাও সিদ্ধান্তই বিতৰ্কৰ সৃষ্টি কৰিছে।
কেতিয়াবা তেওঁলোকে ডাৰউইনৰ অধ্যায়টো বাদ দিছে, আকৌ কেতিয়াবা ভাৰতৰ সামাজিক বৈষম্যৰ ইতিহাসৰ অধ্যায়টো বাদ দিছে। বিভিন্ন পক্ষৰ পৰা অভিযোগ উত্থাপন হৈছে যে বিজেপি চৰকাৰৰ দৃষ্টিভংগী তৃণমূল পৰ্যায়ৰ পৰা ছাত্ৰ-ছাত্ৰীৰ ওপৰত জাপি দিয়া হৈছে।
কিন্তু এনচিইআৰটি কৰ্তৃপক্ষই এই অভিযোগ ভিত্তিহীন বুলি দাবী কৰিছে। তেওঁলোকৰ প্ৰতিযুক্তি হ’ল ই ছাত্ৰ-ছাত্ৰীৰ ওপৰত অপ্ৰয়োজনীয় চাপ সৃষ্টি কৰে। যিবোৰ কথা হয়তো ইমান গুৰুত্বপূৰ্ণ নহয় সেইবোৰো পঢ়িব লগা হয়। সেইবাবেই চাপ কমোৱাৰ বাবে এই সকলোবোৰ পৰিৱৰ্তন কৰা হয়। সেই পৰিৱৰ্তন বিভিন্ন শ্ৰেণীত ঘটে। ইয়াৰ ৰাজনীতিৰ লগত কোনো সম্পৰ্ক নাই। সেয়ে উত্থাপিত সকলো অভিযোগ ভিত্তিহীন।
