দেশৰ আটাইতকৈ ধনৱন্ত ব্যক্তি তথা ৰিলায়েন্স ইণ্ডাষ্ট্ৰীজৰ অধ্যক্ষ মুকেশ আম্বানীলৈ আহিছে মৃত্যুৰ ভাবুকি। এক মেইলযোগে অচিনাক্ত ব্যক্তিয়ে এই ভাবুকি প্ৰেৰণ কৰিছে।
প্ৰকাশিত খবৰ অনুসৰি ভাবুকি প্ৰদান কৰা ব্যক্তিগৰাকীয়ে আম্বানীৰ জীৱনপণ হিচাপে দাবী কৰিছে ২০ কোটি টকা।
লগতে এই হত্যাকাণ্ডক ফলৱৰ্তী কৰিব পৰাকৈ দেশৰ শ্ৰেষ্ঠ শ্বুটাৰ তেওঁলোকৰ ওচৰত আছে বুলি দাবী কৰিছে ভাবুকি প্ৰেৰকে।
ভাবুকিপূৰ্ণ ইমেইলটোত কোৱা হৈছে, “আপুনি যদি আমাক ২০ কোটি টকা নিদিয়ে তেন্তে আমি আপোনাক হত্যা কৰিম। আমাৰ ওচৰত ভাৰতৰ শ্ৰেষ্ঠ শ্বুটাৰ আছে।”
২৭ অক্টোবৰত ছাদাব খান নামৰ এজন ব্যক্তিয়ে এই ভাবুকি প্ৰেৰণ কৰিছিল বুলি আৰক্ষীয়ে জানিবলৈ দিছে।
আৰক্ষীয়ে লগতে কয় যে আম্বানীৰ মুম্বাইৰ বাসগৃহ এন্টিলিয়াৰ নিৰাপত্তাৰক্ষীয়ে মৃত্যুৰ ভাবুকি সম্পৰ্কে প্ৰকাশ কৰাৰ পিছত অভিযোগ দাখিল কৰা হৈছে।
মুম্বাইৰ গামদেৱী আৰক্ষীয়ে আই পি চিৰ ৩৮৭ আৰু ৫০৬ (২) ধাৰাত অচিনাক্ত ব্যক্তিৰগৰাকীৰ বিৰুদ্ধে গোচৰ ৰুজু কৰি তদন্ত আৰম্ভ কৰিছে।
উল্লেখ্যে যে, মুকেশ আম্বানীলৈ এইদৰে মৃত্যুৰ ভাবুকি এয়াই প্ৰথম নহয়। যোৱা বছৰো আম্বানী আৰু তেওঁৰ পৰিয়ালৰ সদস্যক হত্যা কৰা হ’ব বুলি এক ভাবুকি আহিছিল।
এক ফোনকল যোগে প্ৰদান কৰা হৈছিল এই ভাবুকি। ইয়াৰ পিছতে তাৎক্ষণিক তদন্তৰ পিছত মুম্বাই আৰক্ষীয়ে বিহাৰৰ এজন লোকক গ্ৰেপ্তাৰ কৰিছিল।
আনহাতে ২০২১ চনত দক্ষিণ মুম্বাইত আম্বানীৰ বাসগৃহৰ ওচৰত এখন বিস্ফোৰক ভৰ্তি এছ ইউ ভি উদ্ধাৰ হৈছিল।
