এয়াৰ ইণ্ডিয়াৰ বিপদে লগ এৰা নাই। এইবাৰ এয়াৰ ইণ্ডিয়াৰ (AI180 Boeing 777-200LR) ছান ফ্ৰান্সিস্কোৰ পৰা মুম্বাই অভিমুখী বিমান এখন যান্ত্ৰিক বিজুতিৰ বাবে কলকাতা বিমানবন্দৰত অৱতৰণ কৰে।
সোমবাৰে নিশা প্ৰায় ১:৪৫ বজাত কলকাতাত অৱতৰণ কৰে বিমানখন। সূত্ৰ অনুসৰি বিমানখন কলকাতা হৈ মুম্বাইলৈ যোৱাৰ কথা আছিল। কিন্তু বিমানখনৰ বাওঁপিনে ইঞ্জিনত এটা বিজুতি ধৰা পৰে।
যাত্ৰীসকলৰ সুৰক্ষাৰ বাবে কোনো ধৰণৰ ৰিস্ক লোৱা নাছিল পাইলটজনে। মঙলবাৰে পুৱা ৫:২০ বজাত সকলো যাত্ৰীকে বিমানখনৰ পৰা নামিবলৈ কোৱা হয়। এই বিমানখন নিশা ২ বজাত কলকাতাৰ পৰা মুম্বাইলৈ ৰাওনা হোৱাৰ কথা আছিল।
উল্লেখ্য যে সোমবাৰে পুৱা এয়াৰ ইণ্ডিয়াৰ হংকং অভিমুখী ড্ৰিমলাইনাৰ (AI315) যান্ত্ৰিক বিজুতিৰ বাবে মাজ আকাশৰ পৰা ওভতাই নিয়া হয়। এই বিমানখন আছিল বয়িং ৭৮৭-৮ ড্ৰিমলাইনাৰ।
যোৱা ১২ জুনত আহমেদাবাদৰ পৰা উৰণৰ কিছু সময়ৰ পিছতে একেধৰণৰ এখন বিমান দুৰ্ঘটনাগ্ৰস্ত হৈছিল আৰু ২৭০ জন লোকৰ মৃত্যু হয়। মৃত্যু হোৱা অধিকাংশই বিমানখনৰ যাত্ৰী আছিল।
এক সুকীয়া ঘটনাত চেন্নাই অভিমুখী ব্ৰিটিছ এয়াৰৱেজৰ বিমান (BA35) যান্ত্ৰিক বিজুতিৰ বাবে লণ্ডনৰ হিথ্ৰ’ বিমানবন্দৰলৈ উভতি যাবলৈ বাধ্য হয়। সূত্ৰই জনোৱা মতে, সেইখনো বয়িং ৭৮৭-৮ ড্ৰিমলাইনাৰ বিমানআছিল।
আহমেদাবাদৰ দুৰ্ঘটনাৰ পৰিপ্ৰেক্ষিতত অসামৰিক বিমান পৰিবহণৰ সঞ্চালক প্ৰধানে এয়াৰ ইণ্ডিয়া বয়িংৰ সকলো বিমানক জৰুৰীকালীন ৰক্ষণাবেক্ষণৰ নিৰ্দেশ দিছে। ইয়াৰ পিছতো এয়াৰ ইণ্ডিয়াৰ বিমানত সঘনাই যান্ত্ৰিক বিজুতিৰ সন্মুখীন হোৱাত যাত্ৰীসকলৰ সুৰক্ষাক লৈ প্ৰশ্ন উত্থাপন হৈছে।
