এয়া যেন সাধাৰণ এলিমিনেটৰ নহয়। এয়া আছিল দুই প্ৰজন্মৰ যুঁজ। সেইটো টেষ্ট ক্ৰিকেটত হ’ব পাৰে। কিন্তু আই পি এলত দেখা গ’ল নতুন পুৰণি দ্বন্দ্ব। এফালে কেইদিনমান পূৰ্বে টেষ্টৰ পৰা অৱসৰ লোৱা ৰোহিত শৰ্মা আৰু আনফালে তেওঁৰ ‘বিকল্প’ হিচাপে নাম উঠি অহা ছাই সুদৰ্শন।
দুয়োৰে পৰা ‘দৃষ্টিনন্দন’ ইনিংছৰ সাক্ষী হৈছিল আই পি এল এলিমিনেটৰ। কিন্তু শেষত ৰোহিতৰ ‘পুৰণি প্ৰজন্ম’ই জয়ী হ’ল। দ্বিতীয় কোৱালিফায়াৰত হাৰ্দিকৰ মুম্বাইয়ে গীলৰ গুজৰাটক ২০ ৰানত পৰাস্ত কৰে। তাত তেওঁলোকে পঞ্জাৱ কিংছৰ মুখামুখি হ’ব।
শুকুৰবাৰে মুলানপুৰ ষ্টেডিয়ামত টছত জয়লাভ কৰি মুম্বাইৰ অধিনায়ক হাৰ্দিক পাণ্ডিয়াই প্ৰথমে বেটিং কৰাৰ সিদ্ধান্ত লয়। এই আই পি এলত ৰোহিতে নিজৰ চিনাকি ছন্দ দেখুৱাব পৰা নাছিল। মাজে মাজে যদিও আভাস পোৱা গৈছিল, তথাপিও আচল ৰূপটো যেন এলিমিনেটৰৰ বাবে ধৰি ৰখা হৈছিল।
অৱশ্যে তেওঁ দুবাৰকৈ জীৱনদান পাইছিল। প্ৰথমবাৰ ৩ ৰাণত, দ্বিতীয়বাৰ ১২ ৰানত। ৰোহিতৰ কেচ মিছৰ পৰিণতি কি হ’ব পাৰে গীলহঁতে ভালদৰে বুজি পাইছিল। জনী বেয়াৰষ্ট’ৰ সৈতে তেওঁ ধুমুহাৰ সৃষ্টি কৰিছিল। ইংৰাজ বেটছমেনজনে অলপৰ বাবে অৰ্ধশতকৰ পৰা বঞ্চিত হয়। তেওঁ ২২টা বলত ৪৭ ৰান সংগ্ৰহ কৰি উভতি আহে।
কিন্তু ৰোহিতক কোনে বাধা দিব পাৰে? তেওঁৰ ৫০টা বলত ৮১ ৰান সংগ্ৰহ কৰা ইনিংছটো ৪টা ছয় আৰু ৯টা চাৰিৰে সজাই তোলা হৈছিল। শেষত প্ৰসিদ্ধ কৃষ্ণৰ বলত ৰছিদ খানৰ হাতত কেচ দি উভতি আহে। এই মেচতো সূৰ্যকুমাৰ যাদৱে ধাৰাবাহিকতা বজাই ৰাখিছিল। তেওঁ ২০টা বলত ৩৩ ৰান সংগ্ৰহ কৰে। আনহাতে, তিলক ভাৰ্মাই ১১টা বলত ২৫ ৰানৰ এক গুৰুত্বপূৰ্ণ ইনিংছ খেলে। শেষত ৫টা উইকেট হেৰুৱাই মুম্বাইৰ স্ক’ৰ ২২৮ ৰান হয়। হাৰ্দিক পাণ্ডিয়াই ৯টা বলত ২২ ৰানৰ আক্ৰমণাত্মক ইনিংছ খেলিছিল।
বৰ্তমানৰ আই পি এলৰ শ্ৰেষ্ঠ অ’পেনিং যুটি গুজৰাটৰ ছাই সুদৰ্শন আৰু শুভমন গীল বুলি কোৱা হৈছে। সুদৰ্শন টেষ্টত ৰোহিত শৰ্মাৰ বিকল্প হ’ব পাৰে বুলি তীব্ৰ চৰ্চা চলিছে। গীলে ৰোহিতে এৰি থৈ যোৱা স্থানত টেষ্টৰ অধিনায়ক হৈ পৰিছে। ৰাণৰ লক্ষ্য অনুসৰণ কৰাৰ সময়ত গীলে ৰান নাপালে। প্ৰথম অভাৰত মাত্ৰ ১ ৰান সংগ্ৰহ কৰি উভতি আহে ট্ৰেণ্ট ব’ল্টৰ বলত।
কিন্তু ৰোহিতৰ ইনিংছৰ পিছত ছাই সুদৰ্শনে যি ধুমুহাৰ সৃষ্টি কৰিলে সেয়া আই পি এলৰ মঞ্চত যেন ভাৰতীয় দলৰ বাবে কমাণ্ড সলনিৰ ইংগিত। ক’ব পাৰি যে সুদৰ্শনৰ আধিপত্যত মুম্বাইৰ বাবে যোগ্যতা অৰ্জনৰ সপোন ভংগ হ’ব পাৰিলেহেঁতেন। কুশল মেণ্ডিছে ধুমুহাৰ গতিৰে আৰম্ভ কৰিছিল যদিও আচৰিত ধৰণে হিট উইকেট হৈ উভতি আহে।
কিন্তু সুদৰ্শনৰ লগত আছিল ‘সুন্দৰ’ ৱাশ্বিংটন (৪৮)। ট্ৰেণ্ট ব’ল্টৰ দৰে বলাৰৰ ওপৰতো তেওঁ আক্ৰমণাত্মক খেলিছিল। হাৰ্দিকেও ৰান দিছিল। এই পৰিস্থিতিত মুম্বাইৰ অধিনায়কজনে যি কৰিব পাৰে তাকেই কৰিলে। তেওঁ বুমৰাহক বলিং কৰিবলৈ আনিলে। সুন্দৰক তেওঁৰ য়ৰ্কাৰে বল্ড কৰে।
তাৰপিছত অৱশ্যে সুদৰ্শনৰ বেটো বেছি নচলিল। ৰোহিততকৈ মাত্ৰ এটা ৰান কম ৮০ ৰানত আউট হয় তেওঁ। ৰোহিততকৈও এটা কম বলো খেলিছে। এটা ছয় মাৰিলেও তেওঁৰ বেটৰ পৰা আহিছিল ১০টা চাৰি। এফালে ৰাদাৰফোৰ্ডে ভালদৰে বেট কৰি আছিল। কিন্তু সুদৰ্শন ঘূৰি যোৱাৰ লগে লগে ৰান ৰেট লেহেমীয়া হ’ল। তাৰ ভিতৰত বুমৰাহৰ অন্তিম অভাৰত মাত্ৰ ৯ ৰানহে লাভ কৰে।
অশ্বনী কুমাৰ আৰু নমন ধীৰহঁতে ভাল বল কৰে। শেষ দুটা অভাৰত ৩৮ ৰানৰ প্ৰয়োজন হৈছিল। চাপত পৰি ৰাদাৰফোৰ্ডে ব’ল্টক উইকেট দিয়ে। গোটেই মেচখনত ট্ৰেণ্ট ব’ল্টে যথেষ্ট ৰান দিছিল। কিন্তু ডেথ অভাৰত এতিয়াও তেওঁ অতুলনীয়। গ্লিছনে আঘাতপ্ৰাপ্ত হোৱাৰ পিছতো শেষ অভাৰত মুম্বাইৰ মেচ জয় নিশ্চিত কৰে। বাকী তিনিটা বল কৰে অশ্বনীয়ে। শেষত মুম্বাইয়ে ২০ ৰানত জয়লাভ কৰে।
সংক্ষিপ্ত স্কোৰঃ
মুম্বাই ইণ্ডিয়ানছঃ ২২৮/৫ (ৰোহিত ৮১, বেয়াৰষ্টো ৪৭, ছাই কিশোৰ ৪২/২)
গুজৰাট টাইটানছঃ ২০৮/৬ (সুদৰ্শন ৮০, সুন্দৰ ৪৮, ব’ল্ট ৫৬/২)
মুম্বাই ইণ্ডিয়ানছে ২০ ৰানত জয়লাভ কৰে।
