জয়ী হ’বলৈ প্ৰয়োজন হৈছিল মাত্ৰ ১১৭ ৰানৰ। ক’ব পাৰি যে মুম্বাই ইণ্ডিয়ানছৰ সন্মুখত তেনে কোনো চাপেই নাছিল। এটা সৰু লক্ষ্য যেনেদৰে অতিক্ৰম কৰিব লাগে ঠিক সেইদৰেই আৰম্ভণি কৰিছিল মুম্বাইয়ে ৷ দৃঢ় মনোবল অটুট ৰাখি তেওঁলোকে মাত্ৰ ১২.৫ অভাৰতে জয়ৰ বাবে প্ৰয়োজনীয় ৰান সংগ্ৰহ কৰে। বৰ্তমানৰ আই পি এলত এয়া তেওঁলোকৰ প্ৰথমটো জয়।
সোমবাৰে ৰিকালটনে আৰম্ভ কৰে আক্ৰমণ। আনহাতে, ‘হিট মেন’য়ে ১৩ ৰানতকৈ বেছি ৰান কৰিব নোৱাৰিলে। আন্দ্ৰে ৰাছেলৰ বলত পুল কৰিবলৈ চেষ্টা কৰি ৰোহিত শৰ্মাই হৰ্ষিত ৰানাৰ হাতত সহজ কেচ দি বিদায় লয়। তেওঁৰ এই দুৰ্বল প্ৰদৰ্শনে মুম্বাই দলটোক চিন্তাত ৰাখিব।
ৰোহিত আউট হ’লেও মুম্বাইৰ বাকী বেটছমেনসকলে লক্ষ্যত উপনীত হ’বলৈ অত্যন্ত দৃঢ় আছিল। অতি দমনীয় প্ৰদৰ্শনেৰে মেচখনত ৮ উইকেটত জয়লাভ কৰে। ৰিকেল্টনে ৪১টা বলত ৬২ ৰানৰ অপৰাজিত ইনিংছ খেলে। আনহাতে, সূৰ্যকুমাৰ যাদৱে ৯টা বলত ২৭ ৰান কৰি তেওঁৰ স্বকীয় শৈলীৰ পৰিচয় দাঙি ধৰে।
মুম্বাইৰ সৈতে শেহতীয়াভাৱে দুখন মেচতেই কেকেআৰে জয়লাভ কৰিছিল। অৱশ্যে সকলো বিভাগতে নাইটছক পৰাভূত কৰি মুম্বাই ইণ্ডিয়ানছে মেচখনত জয়লাভ কৰে। চলিত আই পি এলৰ দ্বাদশখন মেচত মুম্বাই ইণ্ডিয়ানছে কলকাতা নাইট ৰাইডাৰ্ছক ১১৬ ৰানতে অল আউট কৰে।
মুম্বাইৰ অধিনায়ক হাৰ্দিক পাণ্ডিয়াই টছত জয়লাভ কৰি ৱানখেড়ে ষ্টেডিয়ামত বলিং কৰাৰ সিদ্ধান্ত লয়। মুম্বাইৰ হৈ অভিষেক ঘটোৱা অশ্বিনী কুমাৰেও ২৪ ৰানত ৪ টা উইকেট দখল কৰি অভিলেখ গঢ়িবলৈ সক্ষম হয়। আই পি এলৰ অভিষেক মেচত ৪টা উইকেট দখল কৰা প্ৰথমজন ভাৰতীয় বলাৰ হিচাপে পৰিগণিত হয়।
খেল আৰম্ভ হোৱাৰ পৰাই কলকাতাই এটাৰ পিছত এটাকৈ উইকেট হেৰুৱাই থাকে। এই মেচত প্ৰত্যাৱৰ্তন কৰা সুনীল নাৰিনে কোনো ৰান নকৰাকৈ আউট হয়। মেচখনৰ প্ৰথম অভাৰৰ তৃতীয় বলত নাৰিনৰ উইকেট দখল কৰি নিউজিলেণ্ডৰ পেচাৰ ট্ৰেণ্ট ব’ল্টে প্ৰথম আঘাত হানে। তাৰ পিছত আৰম্ভ হ’ল কলকাতাৰ বেটছমেনসকলৰ অহা-যোৱা খেল। ২৬.৭৫ কোটিৰ খেলুৱৈ ভেংকটেশ আয়াৰ (৩) পুনৰ ব্যৰ্থ হয়। প্ৰথম ৬ অভাৰত ৪১ ৰানত ৪ টা উইকেট হেৰুৱাই থৰকবৰক হৈ পৰে কেকেআৰ।
২৩ বছৰীয়া বাওঁহতীয়া পেচাৰ অশ্বিনী কুমাৰে ৰিংকু সিং (১৭), মনীষ পাণ্ডে (১৯) আৰু আন্দ্ৰে ৰাছেল (৫)ক এজন এজনকৈ আউট কৰে। এইবাৰৰ আই পি এলত প্ৰথমবাৰৰ বাবে সোমবাৰে ঘৰুৱা দৰ্শকৰ সন্মুখত খেলিছিল মুম্বাই। আৰু প্ৰথমবাৰেই দমনীয় প্ৰদৰ্শন। কেকেআৰৰ হৈ সৰ্বাধিক ৰান সংগ্ৰহ কৰে অংগকৃশ ৰঘুবংশীয়ে (২৬)। শেষৰ ফালে ৰমনদীপ সিঙে (২২)কিছু আক্ৰমণাত্মক খেলি সন্মান বচাবলৈ চেষ্টা কৰে। কিন্তু কেকেআৰে ১১৬ ৰানতকৈ বেছি ৰান কৰিব নোৱাৰিলে।
সংক্ষিপ্ত স্কোৰঃ
কলকাতা নাইট ৰাইডাৰ্ছ : ১১৬ (অংগকৃশ ২৬, ৰমনদীপ ২২)
মুম্বাই ইণ্ডিয়ানছ : ১২১/২ (ৰিকেলটন ৬২*, সূৰ্য্যকুমাৰ ২৭*)
মুম্বাই ইণ্ডিয়ানে ৮ উইকেটত জয়লাভ কৰে।
