প্ৰথমে ছ’চিয়েল মিডিয়াত প্ৰেম আৰু যৌন আবেদন। তাৰ পাছত সুন্দৰীৰ জালত পৰি এজন বৃদ্ধই দুবছৰত মুঠ ৯ কোটি টকা হেৰুৱালে। এই চাঞ্চল্যকৰ ঘটনা সংঘটিত হৈছে মুম্বাইত। বৃদ্ধজনে অলপতে সকলো হেৰুৱাই আৰক্ষীৰ কাষ চাপে। ইতিমধ্যে ঘটনা সন্দৰ্ভত তদন্ত আৰম্ভ হৈছে।
২০২৩ চনৰ পৰাই এই ঘটনা আৰম্ভ হৈছিল।শৰ্ৱী নামৰ এগৰাকী মহিলাই বৃদ্ধজনক ফেচবুকত ফ্ৰেণ্ড ৰিকুৱেষ্ট প্ৰেৰণ কৰিছিল। তাৰ পৰাই দুয়োৰে কথা পাতিবলৈ ধৰিলে। লাহে লাহে তেওঁলোকৰ সম্পৰ্ক গভীৰ হৈ আহিল। শৰ্ৱীয়ে কয় যে তেওঁ স্বামীৰ লগত নাথাকে। তেওঁ নিজৰ সন্তানৰ সৈতে পৃথকে পৃথকে থাকে। ইয়াৰ পাছত মহিলাগৰাকীয়ে লাহে লাহে ল’ৰা-ছোৱালীৰ অসুস্থতাৰ কথা উল্লেখ কৰি বৃদ্ধজনৰ পৰা টকা বিচাৰিবলৈ ধৰিলে। কিছুদিন পিছত কবিতা নামৰ আন এগৰাকী মহিলাই তেওঁক হোৱাটছএপত মেছেজ কৰিবলৈ ধৰিলে। কবিতাই নিজকে শৰ্ৱীৰ চিনাকি বুলি দাবী কৰিছিল। বুঢ়া মানুহজন লাহে লাহে কবিতাৰ লগত ঘনিষ্ঠ হৈ পৰিল। অভিযোগ অনুসৰি কবিতায়ো তেওঁক বিভিন্ন অশ্লীল ছবি পঠিয়াবলৈ আৰম্ভ কৰিছিল। সেইদৰে বৃদ্ধজনে আৰু দুগৰাকী মহিলাৰ লগত কথা পাতিবলৈ আৰম্ভ কৰে। আৰু এতিয়া অভিযোগ যে প্ৰেম আৰু যৌনতাৰ নামত তেওঁক বিভিন্ন ধৰণে প্ৰলোভিত কৰি ধন আদায় কৰিছিল।
অৱশেষত জুলাই মাহত বৃদ্ধজনে আৰক্ষীৰ কাষ চাপিল। প্ৰাথমিক তদন্তৰ অন্তত আৰক্ষীয়ে অনুমান কৰিলে যে এই জালিয়াতি চক্ৰৰ আঁৰত মাত্ৰ এজন ব্যক্তি আছে। তেওঁ বৃদ্ধজনৰ লগত বিভিন্ন নামেৰে কথা পাতিছিল আৰু যৌনতাৰ প্ৰলোভনেৰে ধন দাবী কৰিছিল। অৱশ্যে এই গোচৰত এতিয়ালৈকে কোনো লোকক গ্ৰেপ্তাৰ কৰা হোৱা নাই।
