সকলো ঠিকেই আছিল যদিও শেষ মুহূৰ্তত সিদ্ধান্ত সলনি হ’ল। মোদী চৰকাৰে লোকসভাৰ পৰা প্ৰত্যাহাৰ কৰিলে নতুন ‘আয়কৰ বিল ২০২৫’। ১৯৬১ চনৰ পুৰণি আয়কৰ আইনখনক সলনি কৰি সহজ কৰি তুলিবলৈ এই বিধেয়কখন অনা হৈছিল। কিন্তু বিৰোধীৰ আপত্তিৰ বাবে চৰকাৰে সিদ্ধান্ত সলনি কৰিলে। কেইবাটাও সালসলনি কৰি অহা ১১ আগষ্টত লোকসভাত পুনৰ উত্থাপন কৰা হ’ব বিধেয়কখন।
বৰ্তমানৰ আয়কৰ আইন ১৯৬১ৰ ঠাইত ২০২৫ চনৰ ১৩ ফেব্ৰুৱাৰীত লোকসভাত উত্থাপন কৰা আয়কৰ বিধেয়ক ২০২৫ আনুষ্ঠানিকভাৱে প্ৰত্যাহাৰ কৰা হৈছে।
বৈজয়ন্ত পাণ্ডাৰ অধ্যক্ষতাত নিৰ্বাচিত সমিতিৰ অধিকাংশ পৰামৰ্শ সন্নিবিষ্ট কৰি আয়কৰ বিধেয়কখনৰ নতুন সংস্কৰণ অহা ১১ আগষ্টত উত্থাপন কৰা হ’ব।
বিধেয়কখনৰ একাধিক সংস্কৰণৰ সৈতে বিভ্ৰান্তিৰ পৰা হাত সাৰিবলৈ আৰু সকলো পৰিৱৰ্তন অন্তৰ্ভুক্ত কৰি স্পষ্ট আৰু নবীকৃত সংস্কৰণ প্ৰদান কৰিবলৈ আয়কৰ বিধেয়কৰ নতুন সংস্কৰণ সোমবাৰে সদনৰ বিবেচনাৰ বাবে উত্থাপন কৰা হ’ব বুলি সূত্ৰই জানিবলৈ দিছে।
উল্লেখ্য যে, কমিটীয়ে ২১ জুলাইত সংসদত নিজৰ প্ৰতিবেদন দাখিল কৰে।এইটো ৪৫০০ পৃষ্ঠাতকৈও অধিক আৰু ইয়াত ১৯৬১ চনৰ পুৰণি আইনখনৰ ঠাইত নতুন আয়কৰ বিধেয়ক, ২০২৫ৰ খচৰা উন্নত কৰাৰ বাবে ২৮৫টা পৰামৰ্শ সন্নিবিষ্ট কৰা হৈছে।
