বিশ্ববিদ্যালয়ত আতংক বিয়পাবলৈ ফোন কল যোগে বোমা বিস্ফোৰণৰ মিছা ভাবুকি দি ৰঙা ঘৰৰ আলহী হ’ল এজন ব্যক্তি। এই ঘটনা সংঘটিত হৈছে মহাৰাষ্ট্ৰত।
প্ৰকাশিত খবৰ অনুসৰি, অভিযুক্ত ব্যক্তিজনে বুধবাৰে আৰক্ষী নিয়ন্ত্ৰণ কক্ষলৈ ফোন কৰি আৰু ১০ মিনিটৰ ভিতৰত মুম্বাই বিশ্ববিদ্যালয় চৌহদ বোমা বিস্ফোৰণ ঘটাই উৰুৱাই দিয়াৰ ভাবুকি দিছিল।
ব্যক্তিজনৰ ফোন কলৰ পিছত মহাৰাষ্ট্ৰ আৰক্ষীৰ এটা দল বৌম স্কোৱাডসহ বিশ্ববিদ্যালয় চৌহদত উপস্থিত হয়।
কিন্তু ব্যক্তিজনে ফোনত দিয়া বৰ্ণনা অনুসৰি আৰক্ষীয়ে বিশ্ববিদ্যালয় চৌহদত কোনো সন্দেহজনক শুংসূত্ৰ লাভ কৰা নাছিল।
ইয়াৰ পাছতে আৰক্ষী কলটো ভুৱা বুলি নিশ্চিত হয় আৰু ফোন কৰা ব্যক্তিজনৰ অনুসন্ধান চলাই তেওঁক গ্ৰেপ্তাৰ কৰে।
আৰক্ষীয়ে জানিবলৈ দিয়া মতে ছাণ্টাক্ৰুজত অভিযুক্ত ব্যক্তি জনৰ সন্ধান পোৱা গৈছিল আৰু সেই অনুসৰি আৰক্ষীয়ে সেই স্থানত উপস্থিত হৈ বৃহস্পতিবাৰে সন্ধিয়া তেওঁক গ্ৰেপ্তাৰ কৰে।
ধৃত ব্যক্তি জনক সুৰজ যাদৱ বুলি চিনাক্ত কৰা হৈছে।
আৰক্ষীয়ে বৰ্তমান ধৃত সুৰজ যাদৱক সোধা-পোছা অব্যাহত ৰাখিছে।
ব্যক্তিজন পূৰ্বে কোনো অসামাজিক আৰু দেশবিৰোধী কাৰ্যকলাপৰ সৈতে জড়িত আছিল নেকি সেই সম্পৰ্কেও অনুসন্ধান কৰিছে আৰক্ষীয়ে।
