‘‘কেৱল প্ৰেৰণাই নহয়, তাড়না অবিহনে কোনো কবি হ’ব নোৱাৰে’’ – সাহিত্য-সংস্কৃতিৰ অনুষ্ঠান ‘চৰ্য্যা’ আৰু ‘মুনীন বৰকটকী স্মাৰক ন্যাস’ৰ যুটীয়া উদ্যোগত কালি (১৫ মাৰ্চ) সন্ধিয়া পাঁচ বজাত শিলপুখুৰীৰ পঞ্চৱটীৰ ‘সভাঘৰ’ত আয়োজিত মনোজ্ঞ অন্তৰংগ সাহিত্য আলাপৰ অনুষ্ঠান ‘কবিতাৰ ঈশান-নৈৰ্ঋত’ত এনেদৰে কয় প্ৰসিদ্ধ কবি সমীৰ তাঁতীয়ে৷
‘চৰ্য্যা’ আৰু ‘মুনীন বৰকটকী স্মাৰক ন্যাস’ৰ সাহিত্য-সংস্কৃতিৰ নিয়মীয়া অনুষ্ঠান ‘বোধবেলি’ৰ দ্বিতীয়টো সংস্কৰণত অংশগ্ৰহণ কৰি কবি তাঁতীয়ে আৰু কয়— ‘‘কবিতা থাকে মানে মানুহ মানুহ হৈ থাকিব৷’’
বিশিষ্ট লেখক, সাংবাদিক, সাহিত্য তথা চলচ্চিত্ৰ সমালোচক মুনীন বায়নে এই আলাপত অংশগ্ৰহণ কৰি কবি সমীৰ তাঁতীৰ জীৱন, সৃষ্টি আৰু দৃষ্টি, তেওঁৰ সমকাল আৰু দশোদিশৰ আৰ্থ-ৰাজনৈতিক, সমাজ-সাংস্কৃতিক, পৰম্পৰা-পাৰিৱেশিক আদি ভিন্ন প্ৰেক্ষাপটৰ প্ৰসংগৰে অনুষ্ঠানটো সজীৱ আৰু গাম্ভীৰ্য্যপূৰ্ণ কৰি তোলে৷
বায়নৰ প্ৰশ্নৰ সঁহাৰিস্বৰূপে তাঁতীয়েও প্ৰতিটো প্ৰসংগৰে বিস্তাৰিত অন্তদৃৰ্ষ্টিসম্পন্ন মননশীল প্ৰত্যুত্তৰ সমৱেত শ্ৰোতা-দৰ্শকৰ আগত ব্যক্ত কৰে৷ ইয়াৰ পাছতে আৰ্য্য বিদ্যাপীঠ মহাবিদ্যালয়ৰ ইংৰাজী বিভাগৰ অৱসৰী অধ্যাপক সুৰজিত বৰুৱাই পাঠ কৰে সমীৰ তাঁতীৰ তেওঁ কৰা দুটি কবিতাৰ ইংৰাজী অনুবাদ৷
প্ৰায় ডেৰ ঘণ্টাজোৰা ‘বোধবেলি-২’ৰ প্ৰথম খণ্ড সাহিত্য আলাপ আৰু অনুবাদ কবিতা পাঠৰ পাছত আৰম্ভ হয় বিশিষ্ট কবিৰ কবিতা পাঠ৷ আমন্ত্ৰিত অসমীয়া ভাষাৰ দুগৰাকী জ্যেষ্ঠ আৰু খ্যাতনামা কবিৰ ভিতৰত প্ৰথমেই কবিতা পাঠ কৰে আনিছ উজ্ জামানে৷ জামানে প্ৰায় দহ মিনিট সময় পাঠ কৰে তেওঁৰ কেইটিমান নিৰ্বাচিত কবিতা৷
আনহাতে, আমন্ত্ৰিত আনগৰাকী কবি নীলিম কুমাৰ স্বাস্থ্যজনিত কাৰণত অনুপস্থিত থকাত তেওঁৰ দুটি কবিতা অনুষ্ঠানত পাঠ কৰি শুনায় কবি কুশল দত্তই৷
কালিৰ সভাৰ আৰম্ভণিতে সদ্যপ্ৰয়াত প্ৰসিদ্ধ কণ্ঠশিল্পী, গীতিকাৰ, কবি, অনুবাদক, শিক্ষাবিদ ডঃ লক্ষহীৰা দাসৰ সোঁৱৰণত এক মিনিট সময় মৌন প্ৰাৰ্থনা জনোৱা হয়৷ ইয়াৰ পাছতে সভাৰ উদ্দেশ্য ব্যাখ্যা আৰু আদৰণী ভাষণ দিয়ে ‘চৰ্য্যা’ৰ সভাপতি কবি অনুভৱ তুলসীয়ে৷ আৰম্ভণিৰেপৰা শেষলৈ কবি ডাঃ কৌশিক বাস্যসে সুন্দৰভাৱে আঁত ধৰা অনুষ্ঠানটোৰ শেষত শলাগৰ শৰাই আগবঢ়ায় ‘চৰ্য্যা’ৰ উপ সভাপতি, আকাশবাণী গুৱাহাটীৰ প্ৰাক্তন কেন্দ্ৰ সঞ্চালক, কবি ৰাজীৱ বৰুৱাই৷
