দেশত ক্ৰমাৎ বৃদ্ধি পাইছে সাম্প্ৰদায়িক মনোভাৱৰ। দেশৰ ধৰ্মনিৰপেক্ষ চৰিত্ৰলৈ আহিছে ক্ৰমাৎ ভাবুকি।
শাসনাধিষ্ঠ বিজেপি দল আৰু তেওঁলোকৰ ৰাজনৈতিক আদৰ্শৰ অভিভাৱক আৰএছআৰএছএছ- এ ভাৰতবৰ্ষক হিন্দু ৰাষ্ট্ৰৰ ৰূপ দিবলৈ কৰা প্ৰচেষ্টাৰ সমান্তৰাল ভাৱে হিন্দুত্ববাদী আদৰ্শপুষ্ট এচামে এই আদৰ্শক প্ৰতিনিয়ত ৰূপায়ণ কৰিব ধৰিছে।
ভক্তিৰসৰ ‘জয় শ্ৰী ৰাম’ ধ্বনিয়ে লৈছে ক্ৰমাৎ সাম্প্ৰদায়িক শক্তিৰ শ্ল’গানৰ ৰূপ।
যোৱা নিশা মধ্য প্ৰদেশৰ ইন্দোৰত সংঘটিত হৈছে এনে এক ঘটনা।
মধ্য প্ৰদেশৰ ইন্দোৰৰ ওচৰৰ কাম্পেল গ্ৰামপঞ্চায়তত বাস কৰা সাতজনীয়া এটা মুছলমান পৰিয়ালক শনিবাৰে নিশা প্ৰায় ৮.৩০ বজাত ১০০ তকৈও অধিক লোকৰ দলে প্ৰহাৰ কৰি ভাবুকি দিয়াৰ অভিযোগ উত্থাপিত হৈছে।
পৰিয়ালৰ সদস্যসকলে অভিযোগ কৰে যে এই বৃহৎ গোটটোৱে পৰিয়ালটোক ঘৰটো খালী কৰি গাওঁ এৰি যাবলৈ ভাবুকি দি আহিছে।
পৰিয়ালটোৱে অভিযোগ কৰিছিল যে ঘৰ খালি কৰি গাঁৱৰ পৰা আঁতৰি নোযোৱাৰ বাবে এই লোকসকলে জয় শ্ৰী ৰাম ধ্বনি উচ্চাৰণ কৰি তেওঁলোকক প্ৰহাৰ কৰিছিল।
পৰিয়ালটোৰ সদস্য শ্বাহৰুখ লোহাৰে এই সম্পৰ্কে কয়, “তেওঁলোকে ওচৰতে পৰি থকা ৰডবোৰ ব্যৱহাৰ কৰি আমাক প্ৰহাৰ কৰিবলৈ আৰম্ভ কৰিছিল। তেওঁলোকে মোৰ দেউতাক বাৰে বাৰে আঘাত কৰিবলৈ ধৰিছিল আৰু যেতিয়া মোৰ খুৰাই হস্তক্ষেপ কৰিছিল তেওঁলোকে তেওঁকো প্ৰহাৰ কৰিছিল। তেওঁলোকে কৈছিল যে ঘৰ খালী নকৰিলে ভয়ানক পৰিণামৰ সন্মুখীন হ’ব লাগিব।”
শ্বাহৰুখৰ ভগ্নী ফৌজিয়াৰ ভাষ্য মতে আক্ৰমণকাৰী লোকসকল গাড়ীত আহিছিল। ফৌজিয়াই মোবাইলেৰে ঘটনাটো ৰেকৰ্ড কৰিবলৈ চেষ্টা কৰোঁতে আক্ৰমণকাৰী সকলৰ একাংশই তেওঁৰ হাতত ধৰি বাহিৰলৈ টানি নিছিল আৰু হাতৰ পৰা মোবাইলটো কাঢ়ি লৈ টুকুৰা টুকুৰ কৰি পেলাইছিল।
প্ৰায় ২৫ মিনিট ধৰি পৰিয়ালটোৰ ওপৰত আক্ৰমণ চলিছিল। এই আক্ৰমণৰ বিৰুদ্ধে গোচৰ দিবলৈ পৰিয়ালটোৱে ওচৰৰে খুদেল আৰক্ষী চকীত উপস্থিত হয়।
থানাৰ পৰাতেওঁলোকক চিকিৎসা পৰীক্ষাৰ বাবে ইন্দোৰৰ মহাৰাজা যশৱন্তৰাও চিকিৎসালয়লৈ প্ৰেৰণ কৰা হয়। পৰৱৰ্তী সময়ত তেওঁলোকৰ অভিযোগৰ ভিত্তিত থানাত এখন এজাহাৰ পঞ্জীয়ন কৰা হৈছিল।
শ্বাহৰুখৰ মতে এই আক্ৰমণকাৰীসকলে আগতেও পৰিয়ালটোক গাওঁখন এৰি যাবলৈ ভাবুকি দিছিল। তেওঁলোকে এই বিষয়ে গাওঁ পঞ্চায়তত গোচৰ দিছিল আৰু পঞ্চায়ত প্ৰধানকৈ অৱগত কৰিছিল।
ভাড়াঘৰত বাস কৰা পৰিয়ালটোৱে ওচৰতে মাটি ক্ৰয় কৰা কথা আছিল যদিও ভাবুকিৰ পিছত এই সিদ্ধান্ত বাতিল কৰে।
ভুক্তভোগী পৰিয়ালটোৰ অভিযোগৰ ভিত্তিত খুদেল আৰক্ষীয়ে আইপিচিৰ ধাৰা ৩২৩, ৫০৬, ২৯৪, ৪২৭, ১৪৭ আৰু ১৪৮ – ৰ অধীনত নজন লোকৰ বিৰুদ্ধে এজাহাৰ পঞ্জীয়ন কৰিছে।
আনহাতে খুদেল আৰক্ষী চকীৰ উপ-পৰিদৰ্শক বিশ্বজিৎ তোমৰে ঘটনাটো সম্পৰ্কত আন এক অভিযোগহে অৱতাৰণা কৰিছে। তেওঁ কয় যে, “লোহাৰ পৰিয়ালটোক ট্ৰলী নিৰ্মাণৰ বাবে আন টো গোটে কিছু টকা দিছিল। কিন্তু তেওঁলোকে ট্ৰলীখন তৈয়াৰ কৰা নাছিল বা তেওঁলোকে টকা ঘূৰাই দিয়া নাছিল। ইয়াৰ ফলতে ঘটনাটো আৰম্ভ হয় আৰু দুয়োটা গোটৰ মাজত সংঘৰ্ষ হৈছিল। গাওঁখনৰ ওচৰত বাস কৰা বিকাশ পেটেলৰ অভিযোগৰ ওপৰত ভিত্তি কৰি আন এটা অভিযোগ পঞ্জীয়ন কৰা হৈছ।”
আক্ৰমণকাৰী সকল আৰএছএছৰ বুলি পৰিয়ালটোৱে কৰা অভিযোগৰ বিষয়ে সোধাত আৰু তেওঁলোকক এমাহ আগতে গাওঁ এৰি যাবলৈ ভাবুকি দিয়াৰ বিষয়ে সাংবাদিকে কৰা প্ৰশ্নৰ উত্তৰত তোমৰে এনে কোনো তথ্য পোৱাৰ কথা অস্বীকাৰ কৰে।
কিন্তু তোমৰৰ এনে অভিযোগক ভুৱা আখ্যা দিছে উচ্চতম ন্যায়ালয়ত অনুশীলন কৰি থকা অধিবক্তা এহতেছম হাছমীয়ে।
হাছমীৰ ভাষ্য অনুসৰি তেওঁ শনিবাৰে নিশা পৰিয়ালটোৰ পৰা ফোন পাইছিল আৰু চিকিৎসা পৰীক্ষাৰ বাবে মহাৰাজা যশৱন্তৰাও চিকিৎসালয়লৈ প্ৰেৰণ কৰাত তেওঁ তাত উপস্থিত হৈছিল। আৰক্ষীয়ে পঞ্জীয়ন কৰা ক্ৰছ-অভিযোগক সম্পূৰ্ণ প্ৰৱঞ্চনা বুলি তেওঁ অভিযোগ কৰিছে।
তেওঁ কৰা অভিযোগ অনুসৰি পৰিয়ালটোৱে আৰক্ষীক দিয়া লিখিত আবেদনৰ ওপৰত ভিত্তি কৰি আৰক্ষীয়ে এজাহাৰ পঞ্জীয়ন কৰিবলৈ অস্বীকাৰ কৰিছিল। ইয়াৰ পৰিৱৰ্তে তিনি – চাৰিজন উপ-পৰিদৰ্শকে শ্বাহৰুখৰ সৈতে কথা পাতে আৰু তাৰ পিছত দৰিদ্ৰ পৰিয়ালটোক হেঁচা দিবলৈ এটা ভুৱা এজাহাৰ পঞ্জীয়ন কৰিছে।
গতিকে ঘটনাটোৰ ক্ষেত্ৰত আৰক্ষীৰ ভূমিকাও এতিয়া সন্দেহৰ আৱৰ্তত সোমাই পৰিছে। আৰক্ষীয়ে আক্ৰমণকাৰী গোটটোক সুৰক্ষা দি ভুক্তভূগী পৰিয়ালটোৰ ওপৰত ভুৱা অভিযোগ পঞ্জীয়ন কৰিছে বুলি চৰ্চিত হৈছে।