বৃহস্পতিবাৰে কৰ্ণাটকৰ মাংগালুৰুত সংঘটিত হয় এটা চাঞ্চল্যকৰ ঘটনা।
শুকুৰবাৰে সংবাদ মাধ্যমত প্ৰকাশিত বাতৰিমতে, এজন ২৩ বছৰীয়া মুছলিম যুৱকক বজৰং দলৰ সদস্যই মাৰপিট আৰু চুৰিকাঘাত কৰে।
অভিযোগ অনুসৰি, বজৰং দলে যুৱকজনক আক্ৰমণ কৰাৰ কাৰণ হৈছে তেওঁ এগৰাকী হিন্দু যুৱতীৰ স’তে এখন বাছেৰে যাত্ৰা কৰি আছিল।
ঘটনাটো সম্পৰ্কত ৪জন লোকক আৰক্ষীয়ে আটক কৰিছে।
আৰক্ষীয়ে জানিবলৈ দিয়ামতে, যুৱতীগৰাকীয়ে ৰাজ্যখনৰ ৰাজধানী বাংগালুৰুলৈ এটা চাকৰি সংক্ৰান্তত গৈ আছিল আৰু যাত্ৰাটোত তেওঁক এজন বন্ধুয়ে সংগ দিয়ে।
মাংগালুৰু চিটি পুলিছ কমিছনাৰ এন শশী কুমাৰে কয় যে ঘটনাটো ৰাতি ৯.৩০ বজাত সংঘটিত হয়।
কমিছনাৰজনে কয় যে বজৰং দলৰ সদস্যসকলে যুৱক-যুৱতীহালক বাছৰ পৰা নামি আহিবলৈ বাধ্য কৰে।
এনডি টিভিৰ এক বাতৰিমতে, যুৱকজনক মাৰপিট কৰা হয় আৰু যুৱতীগৰাকীও আঘাতপ্ৰাপ্ত হয়।
যুৱকজনক পাছত চিকিৎসালয়লৈ প্ৰেৰণ কৰা হয়।
বজৰং দলৰ সদস্যকেইজনৰ ওপৰত আৰক্ষীয়ে ভাৰতীয় দণ্ডবিধি আইনৰ ৩০৯ ধাৰামতে (হত্যাৰ চেষ্টা) গোচৰ আৰোপ কৰে।
আৰক্ষীয়ে সংবাদমাধ্যমক জনোৱামতে, যোৱা তিনিমাহত এনেধৰণৰ চাৰিটাকৈ ঘটনা সংঘটিত হৈছে আৰু ইয়াক প্ৰতিৰোধ কৰিবলৈ ৰাজহুৱা স্থানসমূহত আৰক্ষী বাহিনী নিয়োগ কৰা হৈছে।
তদুপৰি অভিযুক্তকেইজনে ‘লাভ জেহাদ’ৰ বাবেই এই ঘটনা সংঘটিত কৰিছে বুলি আৰক্ষীয়ে প্ৰকাশ কৰিছে।
