সুৰা নীতিৰ কেলেংকাৰীত বৃ্হস্পতিবাৰে নিশা গ্ৰেপ্তাৰ হোৱাৰ পিছত আজি এই সন্দৰ্ভত প্ৰতিক্ৰিয়া প্ৰকাশ কৰিছে দিল্লীৰ মুখ্যমন্ত্ৰী তথা আপ মুৰব্বী অৰবিন্দ কেজৰিৱালে। তদন্তকাৰী সংস্থা ইডিয়ে আদালতলৈ নিয়াৰ সময়ত কেজৰিৱালে সাংবাদিকৰ আগত প্ৰকাশ কৰিছে প্ৰতিক্ৰিয়া।
“মোৰ জীৱন দেশৰ প্ৰতি উৎসৰ্গিত। মই কাৰাগাৰৰ ভিতৰত থাকিলেও দেশৰ সেৱা কৰি যাম।”- এই মন্তব্য কৰিছে আপৰ মুৰব্বীগৰাকীয়ে। কেজৰিৱালৰ এনে মন্তব্যৰ বিপৰীতে ইডিয়ে আদালতৰ মজিয়াত কেজৰিৱালৰ বিৰুদ্ধে তুলিছে বিস্ফোৰক অভিযোগ।
ইডিয়ে দাবী কৰা মতে, অৰবিন্দ কেজৰিৱাল হৈছে এই গোচৰৰ মূল ষড়যন্ত্ৰকাৰী। তদন্ত সংস্থাটোৰ হৈ হাজিৰ হোৱা অতিৰিক্ত চলিচিটৰ জেনেৰেল এছ ভি ৰাজুৱে আদালতৰ মজিয়াত কেজৰিৱাল সুৰা নীতি ৰূপায়ণ আৰু ‘দক্ষিণ গোট’ক সহায় কৰাত প্ৰত্যক্ষভাৱে জড়িত বুলি উল্লেখ কৰে।
তদন্তকাৰী সংস্থাটোৱে লগতে পঞ্জাৱ নিৰ্বাচনৰ বাবে অৰবিন্দ কেজৰিৱালে ‘দক্ষিণ গোট’ৰ একাংশ অভিযুক্তৰ পৰা ১০০ কোটি টকা দাবী কৰিছিল বুলিও আদালতত কয়। ‘দক্ষিণ গোট’ৰ পৰা লাভ কৰা ৪৫ কোটি টকা ২০২১-২২ চনত গোৱা নিৰ্বাচনৰ প্ৰচাৰত আপে ব্যৱহাৰ কৰিছিল বুলি দাবী কৰিছে ইডিয়ে।