ম্যানমাৰৰ পৰম্পৰাগত নতুন বছৰৰ আৰম্ভণিতে দেশখনৰ চৰকাৰে বিভিন্ন কাৰাগাৰত বন্দী হৈ থকা ৯০০০ গৰাকী কাৰাবন্দীক মুকলি কৰি দিয়াৰ সিদ্ধান্ত কৰিছে।
কাৰাবন্দীসকলক মুকলি কৰি দিয়া সন্দৰ্ভত দেশখনৰ ৰাষ্ট্ৰপতি য়িন মিয়িন্টে কয় যে মানবীয় দৃষ্টিকোণ আৰু শান্তিৰ সমৃদ্ধিৰ প্ৰতি লক্ষ্য ৰাখি নতুন বছৰত ১৬ গৰাকী বিদেশী কাৰাবন্দীকে ধৰি মুঠ ৯,৩৫৩ গৰাকী কাৰাবন্দীক মুকলি কৰি দিয়াৰ সিদ্ধান্ত লোৱা হয়।
ৰাষ্ট্ৰপতিগৰাকীয়ে নিজৰ ফেইচবুক একাউণ্টত প্ৰকাশ কৰা মতে এতিয়াও কোনবোৰ কাৰাবন্দীক মুকলি কৰি দিয়া হ’ব সেই বিষয়ত গৃহ মন্ত্ৰালয় পৰ্য্যায়ত বিচাৰ-বিবেচনা চলি আছে।
এচিচটেণ্ট এচোচিয়েট ফ’ৰ প’লিটিকেল প্ৰিজ’নাৰছ নামৰ এটা মানৱ অধিকাৰ সংস্থাই প্ৰকাশ কৰা মতে মুকলি কৰি দিবলগীয়া কাৰাবন্দীসকলৰ মাজত দুজন ৰাজনৈতিক কাৰাবন্দীও আছে। সংস্থাটোৰ মতে দেশখনত প্ৰায় ৩৬৪ জন খিলঞ্জীয়া সংখ্যালঘু ৰাজনৈতিক কাৰাবন্দীয়ে সেনাক সমালোচনা কৰাৰ অপৰাধত কাৰাবাস খাটি আছে।
আনহাতে, বিভাগীয় গোপনীয়তা আইন (Official Secrets Act.) ভংগৰ অপৰাধত দেশখনত আটক হোৱা ৰয়টাৰ্ছৰ সাংবাদিক দুজনক বৰ্তমান মুকলি কৰি দিয়াৰ কোনোধৰণৰ সম্ভাৱনা নাই।
