গুৱাহাটীৰ বেলতলাত সুস্মিতা বসুমতাৰীৰ ৰহস্যজনক মৃত্যু, অভিযুক্ত আকাশ প্ৰসাদক গ্ৰেপ্তাৰ
গুৱাহাটী মহানগৰীত পুনৰ এক চাঞ্চল্যকৰ ঘটনা সংঘটিত হৈছে। বেলতলাৰ এটা ভাড়াঘৰত সুস্মিতা বসুমতাৰী নামৰ এগৰাকী যুৱতীৰ ৰহস্যজনকভাৱে মৃত্যু হৈছে। যুৱতীগৰাকীৰ ঘৰ ওদালগুৰি জিলাৰ নতুন নলবাৰী গাঁৱত। তেওঁ গুৱাহাটীৰ এটা ব্যক্তিগত প্ৰতিষ্ঠানত কাম কৰি আছিল। বুধবাৰে পুৱা তেওঁৰ মৃতদেহটো ভাড়াঘৰৰ ভিতৰত উদ্ধাৰ কৰা হয়।
মৰণোত্তৰ পৰীক্ষাৰ পিছত আৰক্ষীয়ে যুৱতীগৰাকীৰ মৃতদেহ পৰিয়ালক চমজাই দিয়ে। কিন্তু এই মৃত্যুৰ পিছতেই সুস্মিতাৰ পিতৃয়ে এক ডাঙৰ অভিযোগ উত্থাপন কৰিছে। তেওঁৰ মতে, সুস্মিতাই নিজে নিজৰ জীৱন শেষ কৰা নাই, বৰঞ্চ তেওঁক পৰিকল্পিতভাৱে হত্যা কৰা হৈছে। এই সন্দৰ্ভত পিতৃয়ে হাতীগাঁও আৰক্ষী থানাত এখন এজাহাৰ দাখিল কৰিছে। পৰিয়ালৰ দাবী অনুসৰি, মঙলবাৰে নিশা সুস্মিতাৰ লগত তেওঁৰ প্ৰেমিক আকাশ প্ৰসাদ আছিল।
পৰিয়ালৰ অভিযোগৰ ভিত্তিত হাতীগাঁও আৰক্ষীয়ে ইতিমধ্যে পল্টনবজাৰৰ চলাপাৰা ৰোডৰ বাসিন্দা আকাশ প্ৰসাদক গ্ৰেপ্তাৰ কৰিছে। পৰিয়ালটোৱে দাবী কৰিছে যে আকাশে সুস্মিতাক মানসিক নিৰ্যাতন চলাই এই চৰম সিদ্ধান্ত ল‘বলৈ বাধ্য কৰাইছিল। জানিব পৰা মতে, সুস্মিতাৰ লগত প্ৰেমৰ সম্পৰ্ক থকাৰ পিছতো আকাশে আন যুৱতীৰ লগতো অবৈধ সম্পৰ্ক ৰাখিছিল।
মঙলবাৰে নিশা আকাশ আৰু সুস্মিতাই বেলতলাৰ ভাড়াঘৰত একেলগে আছিল। সেই সময়তে আন যুৱতীৰ সৈতে থকা সম্পৰ্কক লৈ দুয়োৰে মাজত তীব্ৰ কাজিয়া হৈছিল। নিশা ১ বজালৈকে দুয়োৰে মাজত যোগাযোগ হৈ আছিল বুলি জানিব পৰা গৈছে। কিন্তু বুধবাৰে পুৱা ৭ বজাৰ পৰা সুস্মিতাৰ লগত কোনেও যোগাযোগ কৰিব পৰা নাছিল। আৰক্ষীয়ে সন্দেহ কৰিছে যে পুৱতি নিশা এই দুখজনক ঘটনাটো সংঘটিত হৈছে আৰু বৰ্তমান সমগ্ৰ ঘটনাৰ তদন্ত অব্যাহত আছে।