বিশ্বকাপ ফুটবল আৰম্ভ হ‘বলৈ গৈ আছে। এইখন হয়তো বিশ্ব ফুটবলৰ তিনিগৰাকী মহান তাৰকা মেছি, ৰোনাল্ডো আৰু নেইমাৰৰ বাবে শেষ বিশ্বকাপ হ’ব পাৰে। এই মহাযুদ্ধ আৰম্ভ হোৱাৰ ঠিক আগতে আৰ্জেণ্টিনাৰ এখন বাতৰি কাকতক দিয়া এক সাক্ষাৎকাৰত ব্ৰাজিলৰ কিংবদন্তি লেফট বেক খেলুৱৈ ৰবাৰ্টো কাৰ্লোছে নিজৰ মনৰ কথা প্ৰকাশ কৰিছে। বিশ্বকাপৰ কথা আহিলেই তেওঁৰ এনেকুৱা লাগে যেন তেওঁ নিজেই খেলপথাৰত নামিব। তেওঁ কয় যে যাৰ এনেকুৱা অনুভৱ নহয়, তেওঁ আচলতে ফুটবলক ভাল নাপায়।
২০০২ চনৰ পিছত ব্ৰাজিলে বিশ্বকাপ জয় কৰিব পৰা নাই। এইবাৰ ব্ৰাজিলৰ সম্ভাৱনাৰ বিষয়ে সোধাত কাৰ্লোছে কয় যে আৰ্জেণ্টিনাইও বিশ্বকাপ জিকিবলৈ ৩৬ বছৰ সময় লৈছিল। তেওঁ কয় যে ব্ৰাজিলৰ দলটোত ভাল খেলুৱৈ আছে, কিন্তু তেওঁলোকে খেলপথাৰত আবেগ দেখুৱাব লাগিব আৰু দেশৰ জাৰ্ছিৰ গুৰুত্ব বুজিব লাগিব। লেটিন আমেৰিকাৰ ফুটবল সদায় উচ্চমানৰ হয় বুলিও তেওঁ গৌৰৱ কৰে। নেইমাৰৰ বিষয়ে তেওঁ কয় যে দলটোক নেইমাৰৰ অতি প্ৰয়োজন। তেওঁ সম্পূৰ্ণ সুস্থ নে নহয় সেয়া গুৰুত্বপূৰ্ণ, কিন্তু তেওঁ খেলপথাৰত থাকক বা বেঞ্চত বহক, তেওঁৰ উপস্থিতিয়ে দলটোক মানসিকভাৱে শক্তিশালী কৰিব।
ফ্ৰী কিক বিশেষজ্ঞ হিচাপে পৰিচিত কাৰ্লোছে বৰ্তমান সময়ত ফ্ৰী কিক মৰাৰ ক্ষেত্ৰত মেছিক শ্ৰেষ্ঠ বুলি অভিহিত কৰে। তেওঁ কয় যে মেছিয়ে চেট পিচত আগতকৈ বহুত উন্নতি কৰিছে আৰু ৰাষ্ট্ৰীয় দল বা ইণ্টাৰ মিয়ামিৰ হৈ ফ্ৰী কিকৰ পৰা বহুতো গ‘ল কৰিছে। মেছিৰ খেল দেখি তেওঁৰ চকু জুৰ পৰে বুলিও মন্তব্য কৰে। কাৰ্লোছৰ মতে, মেছি বৰ্তমান কেৱল আৰ্জেণ্টিনাৰেই নহয়, সমগ্ৰ লেটিন আমেৰিকান ফুটবলৰ শ্ৰেষ্ঠ বিজ্ঞাপন।
এইখনেই মেছিৰ শেষ বিশ্বকাপ হ‘ব পাৰে বুলি ধাৰণা কৰি কাৰ্লোছে কয় যে মেছিয়ে এই বিশ্বকাপখন সম্পূৰ্ণৰূপে উপভোগ কৰা উচিত। অৱশ্যে নিজৰ শৰীৰৰ যত্ন ল’লে তেওঁ আৰু এখন বিশ্বকাপ খেলিব পাৰে বুলিও কাৰ্লোছে আশা প্ৰকাশ কৰে। তেওঁ লগতে কয় যে আগতে বহু আৰ্জেণ্টিনাৰ সমৰ্থকে ব্ৰাজিলৰ জাৰ্ছি পিন্ধি খেলপথাৰলৈ আহিছিল, কিন্তু এতিয়া মেছিৰ জনপ্ৰিয়তাৰ বাবে ওলোটাটোহে দেখা যায়। ফুটবল এতিয়া বহুত আধুনিক হৈছে আৰু প্ৰতিখন দেশৰে ক্ৰিষ্টিয়ানো ৰোনাল্ডোৰ দৰে একোজনকৈ আইকন আছে। শেষত, ব্ৰাজিলক কোনেও ফেভাৰিট বুলি ভবা নাই বুলি সোধা প্ৰশ্নৰ উত্তৰত তেওঁ সাধাৰণভাৱে কয় যে যিটো দলে বিশ্বকাপত কম ভুল কৰিব, সেই দলটোৱেই শেষত চেম্পিয়ন হ’ব।
