নাগালেণ্ডৰ শান্তি আৰু প্ৰগতিৰ বাবে কেন্দ্ৰীয় চৰকাৰ চলিত বৰ্ষতে নাগা চুক্তিৰ শান্তিপূৰ্ণ সমাধানৰ বাবে প্ৰতিশ্ৰুতিবদ্ধ বুলি বুধ বাৰে মত প্ৰকাশ কৰিছে বিজেপিৰ ৰাষ্ট্ৰীয় সাধাৰণ সম্পাদক তথা উত্তৰ-পূবৰ প্ৰভাৰী ৰাম মাধৱে।
নাগালেণ্ডৰ ৱোকহা চহৰত অনুচ্ছেদ ৩৭০ৰ সন্দৰ্ভত অনুষ্ঠিত হোৱা এখন জন জাগৰণ সভাত অংশগ্ৰহণ কৰি ৰাম মাধৱে এনেদৰে মন্তব্য আগবঢ়ায়।
অনুষ্ঠানত ৰাজ্যখনৰ বিভিন্ন প্ৰান্তৰ পৰা অহা বিজেপিৰ নেতা কৰ্মীসকলে অংশগ্ৰহণ কৰে।
জানিব পৰা মতে, ৰাম মাধৱে সভাত অংশগ্ৰহণ কৰি নাগালেণ্ডৰ জনসাধাৰণক অনুচ্ছেদ ৩৭১ সম্বন্ধে ভয়ৰ কোনো কাৰণ নাই বুলি আশ্বাস প্ৰদান কৰাৰ লগতে অনুচ্ছেদ ৩৭০ আৰু অনুচ্ছেদ ৩৭১ ৰ মাজত কোনোধৰণৰ সম্পৰ্ক নাই বুলিও কয়।
আনহাতে, কেন্দ্ৰ আৰু ৰাজ্যত বিজেপি নেতৃত্বাধীন চৰকাৰে শাসন কৰি আছে বুলি উল্লেখ কৰি বিজেপিৰ ৰাষ্ট্ৰীয় সাধাৰণ সম্পাদকগৰাকীয়ে কয় যে বিজেপি চৰকাৰ থকালৈ কোনেও নাগালেণ্ডৰ বিশেষ সাংবিধানিক অধিকাৰক হাত লগাব নোৱাৰে।
নাগালেণ্ডত বিজেপিৰ সহযোগি দল এন ডি পি পি সন্দৰ্ভত মত ব্যক্ত কৰি ৰাম মাধৱে দুয়ো দলৰ মাজত বুজাবুজিৰ মাধ্যমেৰে আখনৰ ভাগ বতৰোৱা কৰা হ’ব বুলি কয়।
তদুপৰি, সভাত অংশগ্ৰহণ কৰি নাগালেণ্ডৰ উপ মুখ্য মন্ত্ৰী ওৱাই পাট্টন আৰু বিজেপিৰ ৰাজ্যিক সভাপতি তেমজেন ইমনাই ৰাজ্যখনত শান্তি সম্প্ৰীতিৰ বাবে বিজেপি কৰ্মকৰ্তা সকলে কাম কৰি আছে বুলি মন্তব্য কৰে।