মৰিয়নি সমষ্টিৰ বিধায়ক ৰূপজ্যোতি কুৰ্মীলৈ লক্ষ্য কৰি বন্দুকধাৰী নগা দুৰ্বৃত্তই গুলীবৰ্ষণ কৰো ঘটনা সংঘটিত হৈছে। এই ঘটনাত কোনোমতে প্ৰাণৰক্ষা পৰে কংগ্ৰেছী বিধায়কগৰাকীৰ।
জানিব পৰা মতে, বন বিভাগৰ লোক আৰু সাংবাদিকৰ এটা দলৰ সৈতে মৰিয়নিৰ দিচৈ বনাঞ্চলত হোৱা নগা লোকৰ বেদখল পৰিদৰ্শন কৰিবলৈ গৈছিল বিধায়ক ৰূপজ্যোতি কুৰ্মী।
নিউ সোণোৱাল খণ্ড বন কাৰ্যালয়ৰ অন্তৰ্গত তথা নিউ সোণোৱাল সীমান্ত নিৰীক্ষণ চকী তথা খেৰেমীয়া সীমান্ত নিৰীক্ষণ চকীৰ মাজৰ নামনি বনগাঁও আৰু ভৱানীপুৰ গাঁৱৰ কাষতে লাগি থকা দিচৈ ভেলী বনাঞ্চলত নগাই কেইবা হেক্টৰ বনভূমি ধ্বংস কৰি এখন নতুন গাঁও স্থাপন কৰিছে।
নগা লোকৰ এই বেদখল পৰিদৰ্শন কৰিবলৈ বিধায়কগৰাকী বন বিভাগৰ লোক আৰু সাংবাদিকৰ দলৰ সৈতে তালৈ গৈছিল।
এনদৰে বেদখল পৰিদৰ্শন কৰিবলৈ যোৱাৰ সময়তে হাতে হাতে বন্দুক লৈ ওলাই অহা নগা দুৰ্বৃত্তই ৰূপজ্যোতি কুৰ্মীক লক্ষ্য কৰি গুলীচালনা কৰে।
ঘটনাটোক লৈ গোটেই অঞ্চলটোত চাঞ্চল্য অব্যাহত আছে আৰু পৰিস্থিতিৰ প্ৰতি প্ৰশাসনে তীক্ষ্ন দৃষ্টি ৰাখিছে।
উল্লেখ্য যে অসম-নাগালেণ্ড সীমান্তত নগাই অসমৰ ভূমি বেদখল কৰি গৰ সজোৱাৰ অভিযোগ উত্থাপন হৈ অহাৰ মাজতে সংঘটিত এনে ঘটনাই স্বাভাৱিকতে পুনৰ উত্তেজনা সৃষ্টি কৰা পৰিলক্ষিত হৈছে।
