চৈয়দ মুস্তাক আলী টুৰ্ণামেণ্টত অসমৰ ছিনিয়ৰ দলটোৱে মেঘালয়, পডুচেৰীৰ বিৰুদ্ধে লজ্জাজনকভাৱে পৰাস্ত হোৱাৰ পিছত এইবাৰ ২৩ অনূৰ্ধ্বৰ দলটোৰ হতাশাজনক প্ৰদৰ্শনে চিন্তিত কৰি তুলিছে ৰাজ্যৰ ক্ৰিকেটপ্ৰেমীক।
ছিনিয়ৰ দলটোৰ খোজ অনুকৰণ কৰা ২৩ অনূৰ্ধ্বৰ দলটোৱে আপেক্ষিকভাৱে দুৰ্বল নাগালেণ্ডৰ বিৰুদ্ধে বেয়াকৈ মুখঠেকেচা খালে।
সোমবাৰে উৰিষ্যাৰ কটকত অনুষ্ঠিত হোৱা ২৩ অনূৰ্ধ্বৰ প্ৰতিযোগিতাত নাগালেণ্ডে অসমক ৭ উইকেটত পৰাস্ত কৰে।
মেচখনত শক্তিহীন নাগালেণ্ডৰ বিৰুদ্ধে অসমে প্ৰথমে বেট ধৰি মাত্ৰ ২১৩ ৰানহে সংগ্ৰহ কৰিবলৈ সক্ষম হয়। ইয়াৰ প্ৰত্যুত্তৰত নাগালেণ্ডে মাত্ৰ ৪০.৫ অভাৰতে তিনিটা উইকেট হেৰুৱাই নিৰ্ধাৰিত লক্ষ্যত উপনীত হয়।
বেটছমেনৰ দৰে বলাৰৰ প্ৰদৰ্শনো আছিল হতাশাগ্ৰস্ত। মেচৰ কোনো এটা মূহুৰ্ততে নাগালেণ্ডৰ বেটছমেনক প্ৰত্যাহ্বান জনাবলৈ সক্ষম নহ’ল অসমৰ বলাৰ।
নাগালেণ্ডৰ হৈ নিখিল গৌতমে ১০৮ ৰানৰ এক দৰ্শনীয় ইনিংছ খেলে।
উল্লেখ্য যে, যোৱা বছৰ ভাৰতীয় ক্ৰিকেটত খোজ পেলোৱা তিনিটা দলৰ বিৰুদ্ধে ৭১ বছৰ পূৰ্বেই ৰাষ্ট্ৰীয় ক্ৰিকেটত অভিষেক ঘটা অসমৰ এই প্ৰদৰ্শন নিশ্চিতভাৱে চিন্তনীয়।
অসমৰ ছিনিয়ৰ দলটোৱে চৈয়দ মুস্তাক আলী টুৰ্ণামেণ্টৰ ৭ খন মেচৰ ৬ খনতেই পৰাস্ত হৈ বাহিৰ হোৱাৰ পিছত ২৩ অনূৰ্ধ্বৰ দলটোৰ এই প্ৰদৰ্শনৰ বাবে বহুতো ক্ৰিকেটপ্ৰেমীয়ে অসম ক্ৰিকেট সন্থাক দোষাৰোপ কৰিছে।
ক্ৰিকেটক ভালপোৱা একাংশই এয়া অসম ক্ৰিকেটৰ নিৰ্বাচকৰ ভুলৰ বাবেই সংঘটিত হোৱা বুলি মন্তব্য কৰিছে।
ৰাজ্যৰ চুকে কোণে প্ৰতিভাধাৰী ক্ৰিকেটাৰ থকাৰ পাছতো বছৰ বছৰ ধৰি সেই একেই কেইগৰাকী মুখকে দলত স্থান দি থকাৰ আঁৰত এক বৃহৎ ৰহস্য লুকাই থকাৰ সন্দেহ প্ৰকাশ কৰিছে একাংশই।
