প্ৰথমখন ছবিৰেই আন্তঃৰাষ্ট্ৰীয় মঞ্চত এক ডাঙৰ স্বীকৃতি। নাগালেণ্ডৰ প্ৰথমখন পূৰ্ণদৈৰ্ঘ্যৰ ছবি ‘আংঘ’য়ে টৰন্টো আন্তঃৰাষ্ট্ৰীয় চলচ্চিত্ৰ মহোৎসৱ (টিআইএফএফ)ত প্লেটফৰ্ম বঁটা লাভ কৰিছে।
এইবাৰৰ ১২খন ছবিৰ প্লেটফৰ্ম প্ৰতিযোগিতাত নাগালেণ্ডৰ প্ৰেক্ষাপটত নিৰ্মিত এই ছবিখন একমাত্ৰ ভাৰতীয় ছবি আছিল। পুৰস্কাৰৰ মূল্য ২০ হাজাৰ কানাডিয়ান ডলাৰ, ভাৰতীয় মুদ্ৰাত প্ৰায় ১৩.৮৬ লাখ টকা।
সময় ষাঠিৰ দশকৰ আৰম্ভণি, ভাৰত-ম্যানমাৰ সীমান্তৰ সমীপৰ নাগালেণ্ডৰ এখন দুৰ্গম গাঁও। কেন্দ্ৰীয় চৰিত্ৰটো হৈছে আংবা, পৰিত্যক্ত জনজাতীয় নগা গাঁৱৰ শেষৰটো জীৱিত মুখীয়াল। অসুস্থ পত্নী আৰু কণমানি পুত্ৰৰ সৈতে তেওঁ এক বিচ্ছিন্ন জীৱন কটায়। এজন আমেৰিকান মিছনেৰীৰ আগমনৰ লগে লগে সেই জীৱন সলনি হয়।
খ্ৰীষ্টান ধৰ্ম আৰু কিছুমান নতুন ৰীতি-নীতি মিছনেৰীসকলৰ জৰিয়তে গাঁওখনলৈ আহে। লাহে লাহে আংবাৰৰ ল’ৰাটোও সেই নতুন পৃথিৱীখনৰ প্ৰতি আকৰ্ষিত হৈ পৰে। তাৰ পৰাই পিতৃ-পুত্ৰৰ মাজত দ্বন্দ্ব গঢ় লৈ উঠে। এফালে নগা সম্প্ৰদায়ৰ দীৰ্ঘদিনীয়া বিশ্বাস, ৰীতি-নীতি আৰু জীৱনশৈলী, আৰু আনফালে নতুন ধৰ্মীয় প্ৰভাৱ – এই সংঘাত ছবিখনৰ অন্যতম মূল বিষয়বস্তু।
ৰিঅ’ই ছবিখনৰ উপাদানসমূহ নগা সম্প্ৰদায়ৰ মৌখিক ইতিহাস, পৰম্পৰা আৰু আধ্যাত্মিক বিশ্বাসৰ পৰা লৈছে। পৰ্দাত এই সময়ছোৱা বিশ্বাসযোগ্য কৰি তুলিবলৈ সমগ্ৰ ছবিখনৰ শ্বুটিং ১৬ মি.মি. কৰা হৈছে।
‘আংঘ’ আচলতে ৰিঅ’ৰ ২০২১ চনৰ একে নামৰ চুটি ছবিখনৰ সম্প্ৰসাৰিত সংস্কৰণ। সেই ছবিখনে ক্লেৰমন্ট-ফেৰাণ্ড আন্তঃৰাষ্ট্ৰীয় চুটি চলচ্চিত্ৰ মহোৎসৱত বিশেষ জুৰী বঁটা লাভ কৰিছিল। ৰিঅ’ই ৰাজকুমাৰ কণ্ডামুৰীৰ সৈতে পূৰ্ণদৈৰ্ঘ্যৰ ছবিখনৰ চিত্ৰনাট্য লিখিছিল।
নাগালেণ্ডৰ বাসিন্দা ৰিঅ’ই ব্ৰিটেইনৰ নেশ্যনেল ফিল্ম এণ্ড টেলিভিছন স্কুলত অধ্যয়ন কৰিছিল। তেওঁৰ পূৰ্বৰ ছবিৰ ভিতৰত আছে ‘চেকপোষ্ট’ আৰু ‘আদে (অন এ ছানডে)’।
ছবিখনত অভিনয় কৰিছে বাফটা বিজয়ী অভিনেতা ডগলাছ হেনশ্বলে। ইয়াৰ উপৰিও আছে নাগালেণ্ডৰ কেইবাজনো জনজাতীয় শিল্পী—আংহালুং কন্যাক, ছবিনো ৰেংমা, জেনপাই কন্যাক, আমাহ কন্যাক আৰু ৱাংটন কন্যাক।
১৫ ছেপ্টেম্বৰত টৰন্টো চলচ্চিত্ৰ মহোৎসৱত ৱৰ্ল্ড প্ৰিমিয়াৰ হৈছিল ছবিখনৰ। প্লেটফৰ্ম বঁটা লাভ কৰাৰ ফলত ২০২৭ চনৰ একাডেমী বঁটাত আন্তঃৰাষ্ট্ৰীয় ফিচাৰ ফিল্ম শাখাৰ বাবে ‘আংঘ’ক বিবেচনা কৰাৰ পথো মুকলি হৈছে।
