নাগালেণ্ডৰ ৰাজ্যপাল আৰ এন ৰবিয়ে নাগালেণ্ডত শান্তি আৰু সমৃদ্ধিৰ নতুন দিগন্তৰ সূচনা হৈছে বুলি মন্তব্য কৰে।
৭৩ সংখ্যক স্বাধীনতা দিৱসৰ পূৰ্বে নাগালেণ্ডৰ জনসাধাৰণলৈ বুধবাৰে শুভেচ্ছা জ্ঞাপন কৰি ৰবিয়ে কয় ‘‘নাগালেণ্ড আজি ইতিহাসৰ শিখৰত। আমি এনে ঐতিহাসিক ক্ষণৰ সুযোগ হেৰুৱাব নালাগে’’।
ৰাজ্যপালগৰাকীয়ে নাগালেণ্ডৰ জনসাধাৰণক নাগালেণ্ডক ভাৰতৰ ভিতৰত এখন উল্লেখযোগ্য ৰাজ্য হিচাপে গঢ়ি তোলাৰ ক্ষেত্ৰত সহযোগিতাৰে আগবাঢ়ি আহিবলৈ আহ্বান জনায়।
ৰবিয়ে নাগালেণ্ড আৰু অন্য আগশাৰীৰ ৰাজ্যৰ মাজত উন্নয়ণৰ হাৰৰ ব্যাৱধান ক্ৰমান্বয়ে হ্ৰাস পাই আহিছে বুলি কয়।
‘‘আমাৰ ৰাজ্যৰ যোগাযোগ ব্যৱস্থা উত্তৰ-পূবৰ অন্য ৰাজ্যৰ তুলনাত আচৰিত ধৰণে পাছপৰা’’। ৰাজ্যপালগৰাকীয়ে উল্লেখ কৰে।
ৰাজ্যৰ ধীৰ গতিৰ উন্নয়ণে নাগালেণ্ডৰ ভবিষ্যতক পিছপেলাই থৈ যাব বুলিও তেওঁ মন্তব্য কৰে।
তেওঁ লগতে কয় যে নাগালেণ্ডৰ মাতৃ, ভগ্নী, কন্যাসকলেও ৰাজ্যখনৰ স্বাস্থ্য ক্ষেত্ৰ, শিক্ষা, নিয়োগৰ সুবিধা আদিৰ উন্নয়ণ আৰু অগ্ৰগতিৰ বাবে সহযোগিতাৰে ওলাই আহিব লাগিব।
দেশৰ অন্য ৰাজ্যৰ তুলনাত নাগালেণ্ডৰ জনতা অধিক পৰিমানে বঞ্চিত হৈ আহিছে যাৰবাবে তেওঁলোকৰ প্ৰতি বিশেষ গুৰুত্ব দিয়া দৰকাৰ বুলিও ৰাজ্যপালগৰাকীয়ে মত প্ৰকাশ কৰে।
ৰাজ্যপালগৰাকীয়ে ৰাজ্যখনৰ যুৱ সকলৰ স্বনিয়োজনৰ বাবে ৰাজ্যখনৰ বন্দুক-বাৰুদৰ আতংকময় পৰিবেশ আৰু ভিন্ন কৰ ব্যৱস্থাৰ অন্ত পৰিব লাগিব বুলিও গুৰুত্বপূৰ্ণ মন্তব্য কৰে।
ৰাজ্যখনৰ যুৱসকলৰ বাবে সহজে উপলব্ধ হোৱা প্ৰযুক্তি ব্যৱস্থাৰ উন্নয়ণ হ’ব লাগিব বুলিও তেওঁ কয়।
ভাৰতে ৭৩ বছৰ ধৰি বিশ্বৰ আটাইতকৈ শক্তিশালী গণতান্ত্ৰিক দেশ হিচাপে ইয়াৰ গণতান্ত্ৰিক মূল্যবোধ আৰু ধৰ্মনিৰপেক্ষ চৰিত্ৰক অক্ষুণ্ণ ৰাখি আগুৱাই যাবলৈ সক্ষম হৈছে বুলি ৰবিয়ে কয়।
