নগাঁও লোকসভা সমষ্টিৰ আগন্তুক ২০২৬ বৰ্ষৰ উপ-নিৰ্বাচনৰ প্ৰাৰ্থিত্ব প্ৰত্যাহাৰৰ অন্তিম দিনা শনিবাৰে তিনিগৰাকী প্ৰাৰ্থীয়ে নিজৰ মনোনয়ন পত্ৰ প্ৰত্যাহাৰ কৰে। ইয়াৰ লগে লগে এই উপ-নিৰ্বাচনত মূল প্ৰতিদ্বন্দ্বিতা আগবঢ়াবলগীয়া প্ৰাৰ্থীৰ সংখ্যা ১৫ গৰাকীলৈ হ্ৰাস পায়। ইয়াৰ পূৰ্বে মনোনয়ন পত্ৰসমূহৰ পৰীক্ষণৰ অন্তত ১৮ গৰাকী প্ৰাৰ্থীৰ মনোনয়ন বৈধ বুলি বিবেচিত হৈছিল যদিও শনিবাৰে তাৰে তিনিগৰাকীয়ে প্ৰতিদ্বন্দ্বিতাৰ পৰা আঁতৰি অহাৰ সিদ্ধান্ত গ্ৰহণ কৰে।
প্ৰাৰ্থিত্ব প্ৰত্যাহাৰ কৰা প্ৰাৰ্থী তিনিগৰাকী ক্ৰমে সৰ্বভাৰতীয় তৃণমূল কংগ্ৰেছৰ আব্দুল ছালাৰি, নৱ ৰংগ কংগ্ৰেছ পাৰ্টিৰ কৰিমুল্ল্যাহ শ্বেইখ আৰু নিৰ্দলীয় প্ৰাৰ্থী পুৰুষোত্তম বেহেৰা। ইয়াৰ পূৰ্বে উপ-নিৰ্বাচনটোৰ বাবে সৰ্বমুঠ ২৫ গৰাকী প্ৰাৰ্থীয়ে মনোনয়ন দাখিল কৰিছিল যদিও তাৰে সাতগৰাকী প্ৰাৰ্থীৰ মনোনয়ন পত্ৰ নাকচ কৰা হৈছিল। মনোনয়ন নাকচ হোৱা প্ৰাৰ্থীসকল আছিল নিৰ্দলীয় প্ৰাৰ্থী শ্বাহ আলম, প্ৰণৱ কৌশিক, ৰাবুল হক, খলিল উদ্দিন, ছামছুল আলম, ছিকন্দৰ আলী আৰু জয় প্ৰকাশ জনতা দলৰ পংকজ মৌৰ্য। নগাঁৱৰ জিলা আয়ুক্ত তথা ৰিটাৰ্নিং বিষয়া অৰণ্যক শইকীয়াই এক নিৰ্দেশনাযোগে জানিবলৈ দিয়া মতে, নিৰাপত্তাৰ ধন জমা নিদিয়াৰ বাবে প্ৰণৱ কৌশিকৰ মনোনয়ন পত্ৰ নাকচ কৰা হয় আৰু আনসকলৰ মনোনয়ন পত্ৰ প্ৰ-পত্ৰ ২৬ ৰ শপতনামা সম্পূৰ্ণ নকৰাৰ বাবে বাতিল কৰা হয়।
মনোনয়ন প্ৰত্যাহাৰ পৰ্বৰ অন্তত এতিয়া চূড়ান্ত নিৰ্বাচনী যুঁজত অৱতীৰ্ণ হ’বলগীয়া ১৫ গৰাকী প্ৰাৰ্থী ক্ৰমে ভাৰতীয় জনতা পাৰ্টিৰ দেৱাশিস শৰ্মা, কংগ্ৰেছৰ শিৱামণি বৰা, এআইইউডিএফৰ বদৰুদ্দিন আজমল, এছইউচিআইৰ (কমিউনিষ্ট) বৰ্ণালী শৰ্মা, নেচনেল ৰ’ড মেপ পাৰ্টিৰ হাফিজ বুৰহানউদ্দিন আৰু আৰচিপিআইৰ (আৰবি) ইনামুল হুদা। ইয়াৰ সমান্তৰালভাৱে নিৰ্দলীয় প্ৰাৰ্থী হিচাপে আয়ুষ কুমাৰ সিং, ফাৰুক খান, ছাইফুৰ ৰহমান, মুস্তাকিম আলম, আমিৰন হুছেইন, মণিৰুল হুছেইন, ছাবিনা ইয়াছমিন, নজৰুল ইছলাম আৰু ইউনুছ তামুলীয়ে প্ৰতিদ্বন্দ্বিতা আগবঢ়াব। নিৰ্বাচনী প্ৰক্ৰিয়াৰ পৰৱৰ্তী পৰ্যায়ত এতিয়া এই ১৫ গৰাকী প্ৰাৰ্থীৰ মাজত নগাঁও লোকসভা সমষ্টিত তীব্ৰ প্ৰতিদ্বন্দ্বিতা পৰিলক্ষিত হ’ব।
