নগাঁও আৰক্ষীয়ে ধিঙৰ শালকাটি গাঁৱত ২ নৱেম্বৰত নিশা আৰক্ষীয়ে অভিযান চলাই অবৈধ মাৰণাস্ত্ৰসহ এটা কুখ্যাত অপৰাধী আটক কৰে। আৰক্ষীয়ে আটক কৰা কুখ্যাত অপৰাধীটো শালকাটি গাঁৱৰ মফিদুল ইছলাম বুলি জানিব পৰা গৈছে।
নগাঁও জিলাৰ উপ-আৰক্ষী অধীক্ষক জন দাসৰ নেতৃত্বত চলা এই অভিযানত মফিদুল ইছলামৰ ঘৰৰ পৰা এটা পিষ্টল, এটা গ্ৰেনেডসহ চাৰিটা সজীৱ গুলী উদ্ধাৰ কৰে।
জানিব পৰা মতে কুখ্যাত অপৰাধীটোৱে আৰক্ষীৰ অভিযান কালত তেখেতৰ ঘৰৰ দুৱাৰ খুলি দিয়া নাছিল, ফলত আৰক্ষীয়ে ধিং চক্ৰ বিষয়া মৃণাল বৰাক তেখেতৰ গৃহত উপস্থিত কৰোৱাই দুৱাৰ ভাঙি ভিতৰত প্ৰৱেশ কৰি মফিদুলক আটক কৰে ৷
ধিং আৰক্ষীয়ে মাৰণাস্ত্ৰৰ লগতে কুখ্যাত অপৰাধী মফিদুলক আটক কৰি ধিং থানাত জেৰা অব্যাহত ৰাখিছে। আনহাতে ধৃত মফিদুল ইছলাম বিগত সময়তো বহুকেইটা অপৰাধৰ লগত জড়িত আছিল।
