হোজাই জিলাৰ ১৪১৪টা খিলঞ্জীয়া পৰিয়ালৰ নাম শনিবাৰে প্ৰকাশ পোৱা চূড়ান্ত এন আৰ চিৰ তালিকাত বাদ পৰিছে।
জিলাখনৰ লামডিং সমষ্টিৰ অন্তৰ্গত ডৰাপথাৰ গাঁৱৰ কোচ-ৰাজবংশী, গাৰো, ডিমাচা, দালো আৰু বঙালী সম্প্ৰদায়ৰ এই লোকসকলৰ নাম এন আৰ চিত নাহিল।
ধৰ্মীয় নিৰ্যাতনৰ বলি হোৱাৰ পাছত ১৯৬৪ চনত পূব পাকিস্তানৰ পৰা তদানীত্বন প্ৰধান মন্ত্ৰী জৱাহৰলাল নেহৰুৰ আহ্বানত পৰিয়ালকেইটা অসমলৈ আহিছিল।
প্ৰথম অৱস্থাত তেওঁলোকে গোৱালপাৰা জিলাৰ বিভিন্ন শৰণাৰ্থী শিৱিৰত আশ্ৰয় গ্ৰহণ কৰিছিল।
ইয়াৰ পাছত তেওঁলোকক ৰাজ্য চৰকাৰৰ ফালৰ পৰা শৰণাৰ্থীৰ প্ৰমান পত্ৰ দিয়া হয় আৰু ১৯৬৭ চনত ডৰাপথাৰ গাঁৱলৈ স্থানান্তৰ কৰা হয়।
তেওঁলোকক জীয়াই থকাৰ বাবে মাটি,গৰু,ধন আদি আগবঢ়োৱা হৈছিল।
১৯৬৪ চনত পূব পাকিস্তানৰ পৰা অসমলৈ অহা শৰণাৰ্থীসকলৰ ভিতৰত একমাত্ৰ জীৱিত ব্যক্তি প্ৰবেশ সৰকাৰে এন আৰ চি সন্দৰ্বত শংকা ব্যক্ত কৰিছে।
অৱশ্যে তেওঁৰ নাম এন আৰ চিৰ চূড়ান্ত তালিকাত আছে যদিও তেওঁৰ ভাতৃৰ নাম বাদ পৰিছে।
তেওঁ কয়,’’ আমি চৰকাৰে দিয়া শৰণাৰ্থীৰ প্ৰমান পত্ৰৰ লগতে সকলোবোৰ নথি দাখিল কৰিছিলো যদিও এইবোৰ এন আৰ চি কৰ্তৃপক্ষই গ্ৰহণ নকৰিলে।‘’
‘’ডৰাপথাৰ গাঁৱৰ ১৪১৪টা পৰিয়ালৰ প্ৰায় ৪০০০ লোকৰ নাম চূড়ান্ত এন আৰ চিত বাদ পৰিছে,’’-তেওঁ জানিবলৈ দিয়ে।
‘’যদি বিদেশী ন্যায়াধীকৰণত আবেদন কৰাৰ পাছতো আমাৰ নাম এন আৰ চিত নাহে, আমি এন আৰ চিৰ বিষয়াসকলৰ বিৰুদ্ধে এক বিশাল প্ৰতিবাদী কাৰ্যসূচী গ্ৰহণ কৰিবলৈ বাধ্য হ’ম,’’-ডৰাপথাৰ গাঁৱৰ এগৰাকী বাসিন্দাই কয়।