নতুন বছৰত অসমলৈ আহিব নৰেন্দ্ৰ মোদী। ৰাহুল গান্ধীয়ে অসমত ভাৰত জুড়ো ন্যায় কৰি যোৱাৰ পিছত অসমলৈ আহিব প্ৰধানমন্ত্ৰী নৰেন্দ্ৰ মোদী।
অহা ৩ ফেব্ৰুৱাৰীত দুদিনীয়া ভ্ৰমণসূচীৰে প্ৰধানমন্ত্ৰী নৰেন্দ্ৰ মোদী আহিব অসমলৈ ৷ প্ৰধানমন্ত্ৰী মোদীৰ ভ্ৰমণসূচীক লৈ ইতিমধ্যে দিল্লীত উপস্থিত হৈছে ৰাজ্যৰ মুখ্যমন্ত্ৰী হিমন্ত বিশ্ব শৰ্মা আৰু ৰাজ্যিক বিজেপিৰ সভাপতি ভৱেশ কলিতা ৷ সম্পূৰ্ণ চৰকাৰী কাৰ্য্যসূচীত অসমলৈ আহিব দেশৰ প্ৰধানমন্ত্ৰীগৰাকী ৷
সূত্ৰ অনুসৰি ইতিমধ্যে দিল্লীত প্ৰধানমন্ত্ৰীৰ সৈতে আলোচনাত বহিছে হিমন্ত বিশ্ব শৰ্মা আৰু ভৱেশ কলিতা। কা বলবৎ কৰিলে অসমত হ’ব পৰা পৰিস্থিতিৰ বিষয়েও প্ৰধানমন্ত্ৰীৰ লগত আলোচনা কৰিছে হিমন্ত বিশ্ব শৰ্মা আৰু ভবেশ কলিতাই।
খবৰ অনুসৰি মূলত যোৰহাট আৰু গুৱাহাটীৰ সভাত উপস্থিত থাকিব নৰেন্দ্ৰ মোদী।
অহা ৩ ফেব্ৰুৱাৰীত যোৰহাটৰ সুবিশাল লাচিত বৰফুকনৰ প্ৰতিমূৰ্তি উন্মোচন কৰিব নৰেন্দ্ৰ মোদীয়ে।
৪ ফেব্ৰুৱাৰীত খানাপাৰাত অনুষ্ঠিত হব এক বিশেষ ৰাজহুৱা সভা ৷ এই সভাত ঘোষণা কৰা হ’ব অসম চৰকাৰৰ কেইবাটাও প্ৰকল্প ৷
গুৱাহাটীত উপস্থিত হৈ নৰেন্দ্ৰ মোদীয়ে কামাখ্যা মন্দিৰৰ কৰিড’ৰ শুভাৰম্ভ কৰাৰ লগতে আলাবৈৰ ৰণৰ স্মৃতিত নিৰ্মাণ হৈ থকা উদ্যান মুকলি কৰিব ।
