আৰম্ভ হৈছে সূৰ্যৰ ২৫সংখ্যক ‘চোলাৰ চাইক’ল’: কি প্ৰভাৱ পৰিব পৃথিৱীত?
আমেৰিকাৰ মহাকাশ গৱেষণা সংস্থা নাছাৰ বিজ্ঞানীসকলে সূৰ্যৰ ২৫সংখ্যক ‘চোলাৰ চাইক’ল’ আৰম্ভ হোৱাৰ কথা জানিবলৈ দিছে।
প্ৰকৃততে চোলাৰ চাইক’লনো কি আৰু পৃথিৱীত ইয়াৰ কেনে প্ৰভাৱ পৰিব পাৰে সেয়া জানিবলৈ সকলোৱে আগ্ৰহী হৈ পৰিছে।
নাছাৰ বিজ্ঞানীসকলে জানিবলৈ দিছে যে সূৰ্যৰ ২৫সংখ্যক চোলাৰ চাইক’ল আৰম্ভ হৈ গৈছে।
অৰ্থাৎ সূৰ্যত এতিয়া শক্তিশালী সৌৰ ধুমুহাৰ সৃষ্টি হ’ব পাৰে। ইয়াৰ গতিবিধিত পৰিৱৰ্তন আহিব পাৰে।
যোৱা কেইমাহ ধৰি নিষ্প্ৰভ হৈ আছিল সূৰ্য। ইয়াৰ ৰশ্মিও নিস্তেজ আছিল। কোনো ধৰণৰ সৌৰ ধুমুহা বা আন কোনো পৰিঘটনা লক্ষ্য কৰা হোৱা নাছিল।
কিন্তু অনুমান কৰা হৈছে যে আগন্তুক দিনত সূৰ্যত পৰিৱৰ্তন আহিব পাৰে।
নাছাৰ বিজ্ঞানীয়ে জানিবলৈ দিয়া মতে, বৰ্তমান এটা শ্কতিশালী কৰ’নিয়াল তৰংগ অৰ্থাৎ এটা সৌৰ শিখা দেখা গৈছে। ইয়াৰ লগতে এটা ক’লা দাগো প্ৰত্যক্ষ কৰা গৈছে।
এইটোৱে সূৰ্যই ইয়াৰ নতুন চোলাৰ চাইক’লৰ কাম আৰম্ভ কৰাৰ ইংগিত দিছে।
বিজ্ঞানীসকলৰ মতে, এইটো এটা স্বাভাৱিক প্ৰক্ৰিয়া। সূৰ্য যেতিয়া নিষ্প্ৰভ হৈ পৰে তেতিয়া কেইবা মাহ বা বছৰ ধৰি এনেকুৱা হৈ থাকে।
ইয়াৰ পূৰ্বে জাৰ্মানীৰ মেক্স প্লাংক ইনষ্টিটিউটে দাবী কৰিছিল যে পৃথিৱীত সূৰ্যই একমাত্ৰ শক্তিৰ উৎস। পিচে, বিগত ৯,০০০ বছৰ ধৰি ই ধাৰাবাহিকভাৱে নিস্তেজ হৈ আহিছে আৰু ইয়াৰ উজ্বলতা পাঁচগুণ হ্ৰাস পাইছে।
বিজ্ঞানীসকলৰ মতে আন নক্ষত্ৰৰ তুলনাত সূৰ্যৰ উজ্বলতা নিষ্প্ৰভ হৈ পৰিছে।
সূৰ্যৰ বৰ্তমান বয়স ৪.৬ বিলিয়ন বছৰ বুলি অনুমান কৰা হয়।