অৱশেষত অপেক্ষাৰ অন্ত পৰিল। ভাৰতীয় মূলৰ আমেৰিকান মহাকাশচাৰী সুনীতা উইলিয়ামছ আৰু তেওঁৰ সংগী বুচ উইলম’ৰ ২৮৬ দিনৰ অন্তত নিৰাপদে পৃথিৱীলৈ উভতি আহিল।
বুধবাৰে পুৱা ৩:২৭ বজাত (ভাৰত সময় অনুসৰি) তেওঁলোকে ইলন মাস্কৰ স্পেচএক্স মহাকাশযানত ফ্ল’ৰিডা সাগৰত অৱতৰণ কৰে ।
মহাকাশৰ পৰা পৃথিৱীলৈ সুনীতা নিৰাপদে উভতি অহা বুলি নাছাই ঘোষণা কৰিছে। নাছাৰ নিক হগ আৰু ৰাছিয়াৰ মহাকাশচাৰী আলেকজেণ্ডাৰ গৰ্বুনভ তেওঁলোকৰ সৈতে একেখন মহাকাশযানেৰে উভতি আহিছে।
স্পেচএক্সৰ ড্ৰেগন নামৰ মহাকাশযানখনে মঙলবাৰে পুৱা ১০:৩৫ বজাত সুনীতাক লৈ আন্তৰ্জাতিক মহাকাশ কেন্দ্ৰ (আই এছ এছ)ৰ পৰা ৰাওনা হয়।
বুধবাৰে আটলাণ্টিক মহাসাগৰৰ ফ্ল’ৰিডাৰ উপকূলত নিৰাপদে অৱতৰণ কৰে মহাকাশচাৰীসকলে। তেওঁলোকক উদ্ধাৰ কৰে আমেৰিকাৰ নৌসেনাৰ এখন জাহাজে।
ড্ৰেগনৰ কেপচুলৰ দুৱাৰখন খোলাৰ পিছত প্ৰথমে নিক হগ ওলাই আহে। ইয়াৰ প্ৰায় ৫ মিনিট পিছত ভাৰতীয় সময় অনুসৰি পুৱা ৪:২২ বজাত সুনীতা উইলিয়ামছে হাঁহি হাঁহি কেপচুলৰ পৰা ওলাই আহে।
তাৰপিছত তেওঁলোকক হিউষ্টনৰ জনছন স্পেচ চেণ্টাৰলৈ লৈ যোৱা হয়। ইতিমধ্যে হিউষ্টনৰ স্পেচ চেণ্টাৰে এই অভিযানৰ সফলতা উদযাপন কৰিছে।
কিন্তু পৃথিৱীলৈ ঘূৰি অহাৰ পাছতো মহাকাশচাৰীসকলে লগে লগে পৰিয়ালক লগ কৰিব নোৱাৰিব। তেওঁলোকক কেইবাদিনলৈ কোৱাৰেনটাইন কৰি ৰখা হ’ব। তাত কেইবা সপ্তাহ ধৰি তেওঁলোকৰ স্বাস্থ্য পৰীক্ষা চলি থাকিব। ইয়াৰ পিছতহে সুনীতা আৰু বুচে পৰিয়ালক লগ কৰিব পাৰিব।
মহাকাশচাৰীসকল অৱতৰণ কৰাৰ পিছত ভাৰতীয় সময় অনুসৰি পুৱা ৫:০৫ বজাত নাছাই এখন সংবাদমেল আয়োজন কৰে। নাছাৰ উপ- সহযোগী প্ৰশাসক জোৱেল মন্টালবানো আৰু অপাৰেচন ক’অৰ্ডিনেচন মেনেজাৰ বিল স্পেইচে কয় যে নাছাৰ সংগীসকলে নিৰাপদে অৱতৰণ কৰিলে। তেওঁলোকে যোৱা ৯ মাহত ১৫০টা বিষয়ৰ ওপৰত ৯০০ ঘণ্টাৰো অধিক গৱেষণা কৰিছে।
