ৰঙা গ্ৰহ মঙলকলৈ বিশ্বৰ বিজ্ঞানীসকলৰ লগতে সাধাৰণ মানুহৰো কৌতূহলৰ অন্ত নাই।
মঙল গ্ৰহৰ ৰহস্য উদ্ঘাটন কৰাৰ বাবে বিগত শতিকাৰ ৬০ৰ দশকৰ পৰাই বিজ্ঞানীসকলে চেষ্টা কৰি আহিছে।
শেহতীয়াকৈ মাৰ্কিন মহাকাশ গৱেষণা সংস্থা নাছাই মঙল গ্ৰহলৈ প্ৰেৰণ কৰিছে পাৰ্ছেভাৰেঞ্চ ৰোভাৰ যান ।
বিশ্বৰ মহাকাশ গৱেষণাৰ ইতিহাসত এক নতুন নজিৰ সৃষ্টি কৰিবলৈ সক্ষম হ’ল মাৰ্কিন মহাকাশ গৱেষণা প্ৰতিষ্ঠান নাছাই ৰঙা গ্ৰহ মঙললৈ প্ৰেৰণ কৰা পাৰ্ছেভাৰেঞ্চ ৰ’ভাৰ নামৰ যান খনে।
যোৱা সোমবাৰে যান খনে মঙলৰ বুকুত হেলিকপ্তাৰ উৰুৱাই নজিৰ সৃষ্টি কৰাৰ পিছত এইবাৰ ৰঙা গ্ৰহটোত থকা কাৰ্বন ডাই অক্সাইড গেছক বিশেষ প্ৰযুক্তিৰে জীৱনদায়িনী অক্সিজেনলৈ ৰূপান্তৰিত কৰাত সফল হ’ল যানখন।
যান খনত সন্নিবিষ্ট কৰা মক্সি নামৰ এটা সৰু যন্ত্ৰৰ সহায়ত মঙলৰ কাৰ্বন ডাই অক্সাইডক অক্সিজেনলৈ ৰূপান্তৰিত কৰাটো সম্ভৱ হৈ পৰে।
ফলত ৰঙা গ্ৰহটোত অদূৰ ভৱিষ্যতে মানুহৰ বসতিস্থল কৰি তোলাৰ সপোনে আৰু এক নতুন মাত্ৰা লাভ কৰিলে।
মঙল গ্ৰহৰ ৰুক্ষ বুকুত প্ৰায় ১০ মিনিট সময় ধৰি এগৰাকী মহাকাশচাৰীয়ে উশাহ লৈ থাকিবলৈ প্ৰায় ৫ গ্ৰাম পৰিমাণৰ অক্সিজেনৰ প্ৰয়োজন হয়।
পাৰ্ছেভাৰেঞ্চ যান খনে প্ৰথমাৱস্থাত সিমান পৰিমাণৰেই অক্সিজেন উৎপাদন কৰি বিজ্ঞানীসকলক আশান্বিত কৰি তুলিছে।এই পদ্ধতিৰে ৰঙা গ্ৰহটোৰ বুকুত মানুহৰ প্ৰাণ স্বৰূপ অক্সিজেন পৰ্যাপ্ত মাত্ৰাত উৎপাদন কৰিব পৰা যাব বুলি নাছাৰ বিজ্ঞানীসকল এতিয়া আশাবাদী হৈ পৰিছে।
উল্লেখ্য জীৱনদায়িনী অক্সিজেনৰ দহনৰ জৰিয়তে ৰকেটো চলে। সেয়ে ৰকেটৰ ইন্ধনো যান খনে স্বয়ংক্ৰিয় ভাবে উৎপাদন কৰাৰ বাট মুকলি হৈ পৰিল।
মঙল গ্ৰহৰ বায়ুমণ্ডল ৯৬ শতাংশ কাৰ্বন ডাই অক্সাইড গেছেৰে পৰিপূৰ্ণ হৈ আছে।গ্ৰহটোৰ বায়ু মণ্ডলত থকা অক্সিজেনৰ পৰিমাণ মাত্ৰ ০.১৩ শতাংশ।
যান খনৰ এনে সফলতা প্ৰসংগত মন্তব্য কৰি নাছাৰ প্ৰযুক্তি অভিযানৰ সঞ্চালক ট্ৰুডি কৰ্টছে কয়—‘মক্সি কেৱল বৰ্হিবিশ্বত অক্সিজেন প্ৰস্তুত কৰিব পৰা প্ৰথম যন্ত্ৰ নহয়,ই এই সম্পৰ্কীয় প্ৰথম প্ৰযুক্তিও। এই প্ৰযুক্তিয়ে এতিয়া মানৱ জাতিক নতুন দিশৰ সন্ধান দিছে।’
প্ৰতি ঘণ্টাত মক্সিয়ে মঙল গ্ৰহৰ কাৰ্বন ডাই অক্সাইডৰ পৰা প্ৰায় ১০ গ্ৰাম অক্সিজেন প্ৰস্তুত কৰিবলৈ সক্ষম হ’ব বুলি আশা কৰা হৈছে।
মঙল গ্ৰহত কোনো সময়ত জীৱৰ বসতি আছিল নেকি, এতিয়াও গ্ৰহটোৰ ক’ৰৱাত কোনো জীৱে বাস কৰি আছে নেকি আদি কথাবোৰৰ উত্তৰ বিচাৰিয়েই নাছাই গ্ৰহটোলৈ প্ৰেৰণ কৰিছে যান খন।
ভাৰতীয় সময় অনুসৰি ১৯ ফেব্ৰুৱাৰীৰ দিনা যান খনে মঙল গ্ৰহৰ বুকুত অৱতৰণ কৰে।যান খনে কঢ়িয়াই নিছে MOXIE নামৰ এটা বিশেষ যন্ত্ৰ।
নাছাৰ বিজ্ঞানী থমাছ জাৰবুচেনে প্ৰকাশ কৰা অনুসৰি যান খনে গ্ৰহটোৰ বিভিন্ন অঞ্চলৰ পৰা মাটি, শিল আদি সংগ্ৰহ কৰিব।ইতিমধ্যে চীনেও মঙল গ্ৰহলৈ টিয়ানৱেন-১ নামৰ এখন যান প্ৰেৰণ কৰিছে।
