তাজমহলৰ নাম ‘তেজোমহল’ বা লক্ষ্ণৌক ‘লক্ষ্মণ নগৰী’ লৈ সলনি কৰাৰ দাবী দীৰ্ঘদিন ধৰি চলি আছে। মোগল স্থাপত্যকলৈও দেশৰ বৰ্তমানৰ শাসকীয় দলৰ সমৰ্থকসকলৰ ওজৰ-আপত্তিৰ অন্ত নাই! চৰম হিন্দুপন্থীসকলে ইয়াৰ বিৰুদ্ধে বহুবাৰ মাত মাতিছে। এইবাৰ সেই সন্দৰ্ভত বিস্ফোৰক মন্তব্য কৰিছে বলীউডৰ প্ৰবীণ অভিনেতা নাছিৰুদ্দিনে।
বলীউড উদ্যোগৰ বহুতো তাৰকাই শ্বাহ বা খান উপাধি হোৱাৰ বাবে সমালোচনা শুনিবলগীয়া হৈছে। আনকি তেওঁলোকৰ নামৰ আঁৰত দেশবিৰোধী টেগো লগোৱা হৈছে। নাছিৰুদ্দিনকো সেই তালিকাৰ পৰা বাদ দিয়া হোৱা নাছিল! তেওঁ বিভিন্ন সময়ত বিভিন্ন ধৰণে সমালোচনা শুনিব লগা হৈছিল। এইবাৰ নাছিৰুদ্দিন শ্বাহে মোগলৰ বিষয়ে অবাঞ্ছিত সমালোচনাৰ উত্তৰ দিছে।
শেহতীয়াকৈ নাছিৰুদ্দিনে জি ফাইফৰ বাবে ‘তাজ’ নামৰ এটা ৱেব ছিৰিজত অভিনয় কৰিছে। সেই ছিৰিজটোৰ প্ৰচাৰৰ সময়ত অভিনেতাজনে মোগলৰ বিষয়ে অবাঞ্চিত সমালোচনাৰ উত্তৰ দিয়া শুনা গৈছে।
নাছিৰুদ্দিনে কয়,”যদি মোগলসকল ইমানেই চয়তান, তেন্তে ইয়াৰ বিৰোধিতা কৰা সকলে তাজমহল, কুতুব মিনাৰ, লালকিল্লা ভাঙি দিয়া নাই কিয়? সেইবোৰ মোগলৰ দ্বাৰা নিৰ্মাণ কৰা হৈছিল। লালকিল্লাক কিয় ইমান পৱিত্ৰ স্থান বুলি গণ্য কৰা হয়? যিদৰে তেওঁলোকক সদায় খলনায়ক বনোৱাৰ প্ৰয়োজন নাই, সেইদৰে তেওঁলোকক মহিমান্বিত কৰাৰ কোনো প্ৰয়োজন নাই।”
অৱশ্যে, প্ৰবীণ অভিনেতাজন ইয়াতে ক্ষান্ত থকা নাই। পাঠ্যক্ৰমৰ পাঠ্যপুথিত মৌৰ্য বা গুপ্ত সাম্ৰাজ্যৰ বিষয়ে ইমান বিতংভাৱে কিয় উল্লেখ কৰা নাই, কেৱল মোগল আৰু ব্ৰিটিছসকলৰে ডাঙৰ ডাঙৰ অধ্যায় পঢ়োৱা হয়? নাছিৰুদ্দিন শ্বাহে সেই প্ৰশ্নও উত্থাপন কৰে।
বিগত বছৰবোৰত বিজেপি চৰকাৰে মোগল সাম্ৰাজ্যৰ স্থাপত্য বা এতিয়াও অস্তিত্ব থকা সেই সময়ৰ ঠাইবোৰৰ নাম সম্পৰ্কে বহু বিৰূপ মন্তব্য কৰিছে। মোগল যুগৰ ৪০ খন গাওঁৰ নাম সলনি কৰাৰ পৰা মোগল বাগিচাৰ নাম সলনি কৰালৈকে, বহুতো ঐতিহাসিক চিহ্ন বিলোপ কৰা হৈছে। নাছিৰুদ্দিন শ্বাহে এইবাৰ সেই সন্দৰ্ভত তেওঁৰ মতামত প্ৰকাশ কৰিছে।
