মঙলবাৰে পুৱতি নিশা ওদালগুৰি জিলাৰ মাজবাট আৰক্ষী থানাৰ অন্তৰ্গত ডিমাচাঙ অঞ্চলত নিৰাপত্তা বাহিনীৰ সৈতে হোৱা সংঘৰ্ষত নিহত হয় নেশ্যনেল লিবাৰেশ্যন ফ্ৰন্ট অফ বডোলেণ্ড (এন এল এফ বি)ৰ এজন দুৰ্ধৰ্ষ উগ্ৰপন্থী।
দীৰ্ঘদিন ধৰি আৰক্ষীৰ নজৰত আছিল মৃত এনএলএফবিৰ উগ্ৰপন্থীজন।
এক বিশেষ তথ্যৰ ভিত্তিত ওদালগুৰি আৰক্ষীয়ে চলোৱা অভিযানত এনএলএফবিৰ জিলা সেনাধ্যক্ষ জয়ফ্ৰুশ ওৰফে এন জংখাল নিহত হয়।
ঘটনাস্থলীৰ পৰা আৰক্ষীয়ে এটা পিষ্টল আৰু কেইবা জাঁয়ো সজীৱ গুলি উদ্ধাৰ কৰে।
সূত্ৰসমূহে কয় যে আৰক্ষী আৰু নিৰাপত্তা বাহিনীয়ে নিহত উগ্ৰপন্থীজনৰ গতি বিধিৰ ওপৰত সুক্ষ্ম দৃষ্টি ৰাখিছিল আৰু অৱশেষত এই অভিযানৰ জৰিয়তে ৱান্টেড উগ্ৰপন্থীজনক নিহত কৰে।
নিহত উগ্ৰপন্থীজন বাতৰি অনুসৰি এনডিএফবি (এছ)ৰ প্ৰাক্তন দুৰ্ধৰ্ষ বিদ্ৰোহী নেতা এম বাথাৰ ডেপুটি আছিল। বাথাই তৃতীয়খন বড়ো শান্তি চুক্তিৰ পাছত পুনৰ জংঘললৈ ঘুৰি গৈ এন এল এফ বিৰ মুৰব্বী হৈছিল আৰু বড়ো অঞ্চলত কেইবাটাও ধন দাবী সম্পৰ্কীয় ঘটনাত জড়িত আছিল।
সূত্ৰসমূহে লগতে প্ৰকাশ কৰে যে এগৰাকী মহিলাকে ধৰি তেওঁৰ চাৰিজন সহযোগীক পূৰ্বে গুৱাহাটীত অসম আৰক্ষীৰ অপৰাধ শাখাই গ্ৰেপ্তাৰ কৰিছিল আৰু তেতিয়াৰ পৰাই নিহত উগ্ৰপন্থীজন আত্মগোপন কৰি আছিল।
